Oqaasiliortut 2020 – 6 (gl)

OQAA – 081020 (gl)

Oqaasiliortut oktobarip 8-anni 2020-mi ataatsimiinnerannit imaqarniliaq

 

Peqataasut:

Oqaasiliortut: Mariia Simonsen, Karen Ramsøe, Knud Møller & Hans Kristian Olsen
Oqaasileriffimmit: Lisathe Møller & Katti Frederiksen

Oqaluuserisassat:

1. Oqaluuserisassat akuerineqarnerat.
2. Kingullermik ataatsimiinnermit imaqarniliap akuerineqarnera.
3. Siulittaasumit Oqaasileriffimmillu ilisimatitsissutit.
   1. Oqaasileriffimmit ilisimatitsissutit
4. Suliat allat pillugit ilisimatitsineq
   1. Inuit aqqi pillugit saaffiginnissutit
   2. Taaguutilerinermi suleriaatsinik saqqummiineq
5. Aalajangiivigisassat allat:
   1. Oqaasiliortut suleriaasiat
   2. Ukiumoortumik nalunaarusiaq 2019 (suleriaatsimi § 9)
   3. 2021-imut aningaasanut missingersuut (suleriaatsimi § 9)
6. Kalaallisut taaguusigassat:
   1. Epidemikommissionen
   2. Isikkamik arsarnermi taaguusersuutit akuerineqarnissaat
7. Ataatsimiinnissap tulliata ullulerneqarnera.
8. Tamalaat

 

Imaqarniliaq

1. Oqaluuserisassat akuerineqarnerat

Oqaluuserisassat tulleriinneri qulaanisut allannguuteqartinneqarlutik akuerineqarput.

2. Kingullermik ataatsimiinnermit imaqarniliap akuerineqarnera.

24/9- 2020 ataatsimiinnermit imaqarniliaq akuerineqarpoq.

3. Siulittaasumit Oqaasileriffimmillu ilisimatitsissutit.
   1)Siulittaasup ilisimatitsissutigaa Juaaka Lyberth Oqaasiliortunut ilaasortaanerminit tunuarsimasoq namminersortutut sulinerminut isertitallu eqqarsaatigalugit naapertuukkunnaarmat. Oqaasileriffimmit ilisimatitsissutigineqarpoq taaguusiornermik ilisimatuup Henrik Nilssonip Oqaasiliortunut saqqummiinissaa pisinnaanngortoq, aalajangerneqarporlu oktobarip 21-anni tamanna pissasoq. Ilisimatitsissutit sinnerit tusaatissatut tiguneqarput.
4. Suliat allat pillugit ilisimatitsineq
   1) Inuit aqqi pillugit saaffiginnissutit tusaatissatut tiguneqarput.
   Ataatsimiinnerup kingulliup kingorna aqqit Oqaasiliortunit akuersissutigineqartut tassaapput nukappiaqqat aqqi Aqqalutsi Ingkasilu.
   – Aqqalutsi ilaasortanit tamanit tallimanit akuersissutigineqarpoq.
   – Ingkasi amerlanerussuteqartut akuersissutigaat pingasut, ilaasortat marluk akuersinerminnik akuersinnginnerminnilluunniit nalunaanngillat.b) Taaguutilerinermi suleriaatsinik saqqummiineq
   Lisathe Møller taaguutilerinermi suleriaatsinik saqqummiivoq.

5. Aalajangiivigisassat allat:

1)Oqaasiliortut suleriaasiat

Oqaasiliortut suleriaasissaattut  Ilinniartitaanermut, Kultureqarnermut Ilageeqarnermullu Naalakkersuisoqarfiup atsiugassatut  2018-imi akuerineqartumit allaanerussuteqarmat iluarsaataq akuerineqarpoq. .

§ 4 ima allanngortinneqarpoq:
Oqaluuserisassatut siunnersuutit pisariaqarpallu taakkununnga ilanngussat Oqaasileriffimmut nassiunneqareersimassapput ataatsimiinnissaq kingusinnerpaamik ullunik suliffiusunik arfineq-marlunnik sioqqullugu. Pissutissaqavitsillugu siulittaasoq pisinnaatitaavoq killiliussamik allanngortitsissalluni. Ullormut oqaluuserisassat siulittaasumit akuerineqassapput. 

2) ukiumoortumik nalunaarusiaq 2019 (suleriaatsimi § 9)
2019-imut ukiumoortumik nalunaarusiaq naqqiissorneqareermat akuerineqarpoq.

3) 2021-mut aningaasanut missingersuut (suleriaatsimi § 9)
2021-mut aningaasanut missingersuut Ilinniartitaanermut, Kultureqarnermut Ilageeqarnermullu Naalakkersuisoqarfimmut ingerlateqqinneqareersoq Oqaasiliortunit misissuataarneqarpoq. Aningaasanut missingersuutip Naalakkersuisoqarfimmut nassiunneqartinnani Oqaasiliortunut akuerisassanngorlugu saqqummiunneqaqqaartarnissaa kissaatigineqarpoq, soorlu suleriaatsimi tamanna aalajangersarneqarsimasoq.

      6. Kalaallisut taaguusigassat:

1) Epidemikommissionip kalaallisut taaguusernissaa.
Epidemikommissionip kalaallisut taaguutissaata eqqartunnginnerani Oqaasiliortut maajip 28-anni 2008-mi kommissionimut taaguutissatut aalajangigaat  isumalioqatigiissitat eqqartorneqarpoq. Oqaasiliortunit siornatigut taaguutissatut aalajangiussaareersoq  ilumut qasseersiutaasariaqarnersoq eqqartorneqarpoq.  Isumalioqatigiissitat qasseersiutaassasoq aalajangiigamik tunngavilersuutigisimavaat isumalioqatigiissitat qinikkanik taamaallaat ilaasortaqaratik avataanit allanik ilaqartarnerat. Taamani Oqaasiliortuni siulittaasup sianerfigineqarluni taama nassuiarpaa. Epidemikommissionip taaguutaa allanngortinneqanngikkallarpoq misissuisoqarluareerpat  uterfigineqarumaarluni. Aalajangigassami uani uniffigineqartut ilagaat Oqaasiliortut aalajangeriigaat allanngortinneqassagaangata tunngavissaqarluartarnissaq.

2) isikkamik arsarnermi taaguusersuutit akuerineqarnissaat
Kinguartinneqarpoq.

7. Ataatsimiinnissap tulliata ullulerneqarnera.

5/11-2020 nal. 10-14 ataatsimiiffiussaaq.

8. Tamalaat.

 

Ataatsimiinnermi peqataasut:

Mariia Simonsen, siulittaasoq

Karen Ramsøe, siulittaasup tullia

Hans Kristian Olsen, siulittaasoq

Knud Møller, siulittaasoq