Oqaasiliortut aamma Inuit Aqqinik Akuersisartut ataatsimiinnerat ataasinngornermi novembarip 7.-anni, 2005 nal. 11.00 Oqaasileriffimmi
Oqaluuserisassatut siunnersuutit:
- Ilisimatitsissutit
- Oqaluuserisassat akuerisassanngorlugit saqqummiunnerat
- Kingullermik ataatsimiinnernit imaqarniliat
- Inuit aqqinik nalunaarsuutit
- Oqaatsit aalajangersaavigisassat:
- Sammenslutningen af Brancheskoler
- Valgbarometer
- Telemedicin
- Ledende skolespsykolog
- Assisterende skolepsykolog
- Specialundervisningskonsulent
- Kontorfuldmægtig
- Oqaatsit isumaat apersuutigineqartut (ilisimatitsissutitut)
- Qupaloraarsuk, tulugaq, naaja
- Uumasut miluumasut
- Siunnersuutit isumaliutigisassat (Kristian Poulsenimit)
- Borgmester
- Kommunaldirektør
- Kommunalbestyrelse
- Byråd; byrådssal
- Nunat Aqqinut tunngasoq:
Nordostrundingen: Kangersuaq? - Taasariaqartut allat
– 1 pillugu –
Oqaasiliortut siulittaasuat Carl Chr. Olsen (puju) ataatsimiigiartunik tikilluaqqusivoq. Tikilluaqqusereerami ilisimatitsissutitut oqaatigaa Deklaration om Nordisk Sprogpolitik tusarniaassutigineqartussaasoq. Oqaasiliortunit malinnaaffigineqarsimavoq naammagisimaarneqarlunilu. Pujup oqaatigaa siuariarneq annertusoq, tassami kalaallit oqaasii inuiaqatigiinni nappataasutut nalilerneqarmata naalagaaffinni oqaatsit inuiaqatigiinni nappataanerisa pingaartinneqarnerisalu saniatigut.
Pujup oqaatigaa FN-imi nunat aqqinik akuerisanik nalunaarsuisarneq aalajangersaasarnerlu pillugit ataatsimititamut (United Nations Group of Experts on Geographical Naming, Nordic Division) nunatsinni Nunat Aqqinik Aalajangiisartut ilannguttut. Taamaalillutik Nunat Aqqinik Aalajangiisartut aalajangigaat nunarsuarmut siammarsinnaanngorput, assigiinngitsunik taaguisarnerit pinngitsoorsinnaanngussallutik.
– 2 pillugu –
Oqaluuserisassat ataatsimiigiartunit akuerineqarput.
– 3 pillugu –
Kingullermik ataatsimiinnermit imaqarniliaq akuerineqarpoq.
– 4 pillugu –
Nuka Møller saqqummiivoq kalaallit aqqinik nalunaarsuinerminik Inuit Aqqinik Akuersisartut qanoq suleriaaseqarsimanersut. Oqaatigaa kalaallit aqqi akuerisat kingullermik 1999-imi taassumalu siuliani 1985-imi saqqummersinneqarsimasut. Massakkut kalaallit aqqinik nalunaarsuinermi kinguliaqutit 34-nik ilasimasut oqaatigaa, tassa 1999-imi saqqummersumit amerlanernik kinguliaqutinik imaqalerlutik.
Avanersuarmiut aqqi 175-it akuerisaniinngitsut nalunaarsorneqarsimapput. Taamatut nalunaarsuinermini atuakkiortut atuakkiaat ukua nalunaarsuinermini atorsimallugit oqaatigaa; Inûterssuak Uvdloriak, Guy Mary Rosselière aamma Rolf Gilberg. Oqaatigaa atit amerlanerusut ilaasussatut innersuussutigalugit, taamaallaallu Iterfiluk aamma Usuitsoq eqqarsarnartoqartillugit. Kaajallaasitaq 1-99, imm. 5-i naapertorlugu taakkua atit eqqarsarnartoqartippai.
Tunumiut aqqi akuerisani nalunaarsorneqarsimanngitsut katillutik 30-t nalunaarsorneqarput, annermillu telefonbogi najoqqutaralugu nassaarisarsimallugit Nuka Møllerip oqaatigaa.
Ellen Jensenip maluginiarpaa Avanersuarmiut aqqi Kujataamiutuunngorsarneqarsimanngitsut. Tassungalu atatillugu CCO-p oqaatigaa Avanersuarmiut Tunumiullu aqqi sumiorpaluutitik aallaavigalugit atseerusukkunik taamaaliorsinnaasut. Kingornalu Ellen Jensenip oqaatigaa (atuagaq saqqummilerpat) nassuiaammi tamanna erseqqissarneqartariaqartoq, tassa atinik akuerisanik akuersinerminni tunngaviusut nassuiarnissaat pisariaqarmat.
Lise Egede Hegelundip atitoqqat paquminarsinnaasut ilanngunneqarsinnaagaluartut oqaatigaa, nalinginnaaleqqissinneqarsinnaagaluarnerat oqaatigalugu, CCOlu tassunga ilaliivoq.
CCO naggasiivoq aqqit nalunaarsukkat misissorlugit suliareqqitassanngortut.
– 5 pillugu –
5a. Qitiusumik ilinniarfiit (brancheskoler) kattuffimmik pilersitsisimanerannut tunngatillugu qanoq taanna ateqarsinnaaneranik kattuffiup allatsigiligaanit apeqqutigineqarsimavoq kalaallisut qanoq ateqarsinnaanersoq apeqqutigalugu. Qallunaatut taaguuteqalersimavoq imatut; Sammenslutning af Brancheskoler. Apeqquteqartuusorlu Jesper Nielsen kattuffimmi allatsinngorsimasoq nassuiaavoq forstanderit ataatsimiinnerminni imatut kalaallisut ateqarsinnaanerat siunnersuutigisimagaat; INUUSSUTISSARSIUTITIGUT ILINNIARFIIT SULEQATIGIIFFIAT. Taanna siunnersuutaat Oqaasiliortunit akuerineqarpoq.
5b. TV-imi kalaallisuunngortitsisartup Aqqalu Olsvigip apeqqutigisimavaa valgbarometer kalaallisut qanoq taaguuteqarsinnaanersoq. Nuka Møllerillu siunnersuutigisimavaa ima kalaallisut taaguuteqarsinnaasoq; qinersinermut atatillugu uuttuutit. Taannalu siunnersuut Oqaasiliortunit akuerineqarpoq.
5c. Peqqissutsimut Pisortaqarfimmi atorfillip Aka Julia Knudsenip apeqqutigaa telemedicin kalaallisut qanoq taaneqartarnersoq. Oqaasiliortut telemedicin kalaallisut ima taaneqartassasoq siunniuppaat akueralugulu; telemedicin. Tassa oqaasersianngortinneqarpoq nassuiaaserlugulu atorneqartussatut oqaatigalugu.
5d. PPR Nord-imi ledende skolepsykologiugallartup Johanne Carstensenip apeqqutigaa ledende skolepsykolog kalaallisut qanoq taaguuteqarnersoq. Kalaallit oqaasiini akuerisani ilaanngimmat Oqaasiliortut eqqartoreerlugu kalaallisut ima taaguuteqarnissaat akueraat; atuarfeqarfimmi psykologit pisortaat.
5e. PPR Nord-imi ledende skolepsykologiugallartup Johanne Carstensenip apeqqutigaattaaq assisterende skolepsykolog kalaallisut qanoq taaguuteqarnersoq. Kalaallit oqaasiini akuerisani ilaanngimmat Oqaasiliortut eqqartoreerlugu kalaallisut imatut taaguuteqarnissaa akueraat; atuarfeqarfimmi psykologi.
5f. Qulaani apeqquteqartuusup Johanne Carstensenip apeqqutaasa ilagaat specialundervisningskonsulent kalaallisut qanoq taaguuteqarnersoq. Oqaasiliortullu akueraat kalaallisut ima taaguuteqassasoq; immikkut atuartitsinermi siunnersorti.
5g. Johanne Carstensenip apeqqutaa kingulleq tassaavoq kontorfuldmægtig kalaallisut qanoq taaguuteqarsinnaanersoq. Oqaasiliortullu akueraat kalaallisut ima taaguuteqassasoq; kutsiorti.
– 6 pillugu –
Ilisimatitsissutitut Oqaasiliortunut saqqummiunneqarput oqaatsit isumaat apersuutigineqartut ukuusut; qupaloraarsuk, tulugaq, naaja aamma uumasut miluumasut. Oqaatigineqarpoq taakkua suliarineqartut.
– 7 pillugu –
7a. Oqaasiliortunut qallunaatut oqaatsit sisamat kalaallisut qanoq taaguuteqarsinnaanerinik siunnersuutit isumaliutigisassatut saqqummiunneqarput. Siunnersuuteqartuusup Kristian Poulsenip ukua kalaallisut taaguuteqalernissaat siunnersuutigaa; borgmester, kommunaldirektør, kommunalbestyrelse aamma byråd; byrådssal.
– 8 pillugu –
Nunat aqqinut tunngasoq:
Oqaasiliortunut nalunaarutigisat ilagivaat Kristian Poulsenip siunnersuutaasa ilaat nunap aqqanut tunngasoq. Kristian Poulsenip siunnersuutigaa Nordostrundingen kalaallisut ima taaguuteqalersinnaasoq Kangersuaq. Apeqqut taanna Nunat Aqqinik Aalajangiisartunut ingerlateqqinneqassaaq.
– 9 pillugu –
Oqaasiliortut ataatsimiinneranni allanik taasariaqartoqanngilaq.
Carl Chr. Olsen Lisathe M. Kruse
Siulittaasoq Allatsi