Ilitsoqqussaralugu oqaatsit ulluannik malunnartitsisarneq pillugu
Novembarip 17-ianni 1999-imi UNESCO-p tamanut nalunaarutigaa ulloq februaarip 21-at tassaassasoq Nunarsuaq Tamakkerlugu Ilitsoqqussaralugu Oqaatsit Ulluat.
Ilitsoqqussaralugu Oqaatsit Ulluannik malunnartitsisarnermi siunertarineqarpoq nunarsuarmi tamanit makku eqqummaariffigineqarnerulissasut: oqaatsit, kulturikkut assigiinngissitaarneq, kiisalu arlariinnik oqaaseqarneq.
Ilitsoqqussaralugu Oqaatsit Ulluat siullerpaamik februaarip 21-anni 2000-imi nunarsuaq tamakkerlugu malunnartinniarneqaqqaarpoq ullorlu maanna tikillugu ukiut tamaasa nunarsuaq tamakkerlugu malunnartinniarneqartarluni.
UNESCO-p ilitsoqqussaralugu oqaatsit ulluannik malunnartitsisalernissaq aallarnersimavaa oqaatsit suulluunniit nukittorsarniarlugit, kiisalu ilitsoqqussaralugu oqaatsit salliutinneqarnissaasa pingaassusiat immikkut ittumik malunnartinniarlugu. Tamatuma saniatigut UNESCO-mit pingaartinneqarpoq inuiaqatigiit akornanni kulturikkut oqaatsitigullu assigiinngiiaassutsit inuiaqatigiinni piusut paaseqatigiiffiunerusumik akaareqatigiinnerusumillu tunngaveqartumik ataqatigiinnerulernissaat anguniarneqassasoq, tamannalu pillugu ilitsoqqussaralugu oqaatsinik ineriartortitsinerup saniatigut arlariinnik oqaaseqarneq annertusarneqassasoq.
Ilitsoqqussaralugu Oqaatsit Ulluata ullormi februaarip 21-anni malunnartinneqartarneranut peqqutaasoq tassaavoq februaarip 21-anni 1952-imi ilinniartut sisamat Bangladeshimi oqaatsit pillugit akerleriissuteqarnermi akerliussutsimik takutitsisoqarnerani toqutaanikuummata ukiorpassuarnilu toqqissisimanngitsoqartoqarneranut pisimasoq peqqutaanikuulluni. Taamaattumik UNESCO-p aalajangersimavaa ulloq taannarpiaq ilitsoqqussaralugu oqaatsit malunnartinniarneqartassasut.
Ukioq manna UNESCO-mit qulequtaritinneqartoq
Ukioq manna nunarsuaq tamakkerlugu ilitsoqqussaralugu oqaatsit ulluanni Unescomit qulequtaritinneqarpoq:
Arlariinnik oqaaseqarluni ilinniartitsineq
- nunarsuarmi arlariinnik oqaaseqarfiusumi ilinniartitaanermik naleqqussaanissamut pisariaqartoq
Ilitsoqqussaralugu oqaatsinik aallaveqarluni ilinniartitsineq arlariinnik oqaaseqalersitsinissamik siunertaqartoq tassaavoq amerlanerpaat ilikkagaqarnissaannut peqataatinneqarnissaannullu aqqutissiuussisuusoq, pingaartumik innutaasunik makkuninnga:
- inuiaqatigiinni oqaatsinik pingaarnernik oqaaseqanngitsunik
- inuiaqatigiinni amerlanerussuteqartut oqaasiinik oqaaseqanngitsunik
- nunap inoqqaavisa oqaasiinik oqaasilinnik
Ilitsoqqussaralugu oqaatsit ulluannik assigiinngitsutigut malunnartitsiniaasoqarsinnaavoq. Assersuutigalugu oqalugiartitsinernik, saqqummiisitsinernik, oqallitsitsinnernik, aliikkusersuisitsinernik aaqqissuussisoqarsinnaavoq allatulluunniit sammisaqartitsisoqarsinnaalluni ilitsoqqussaralugu oqaatsit arlariinnillu oqaaseqarneq immikkut sammisaralugit.
Kikkulluunniit ullormik malunnartitsiniaallutik arlaannik aaqqissuusserusuttut plakatit ataani saqqummiunneqartut atorsinnaavaat.
PLAKATIT
ULLORMIK MALUNNARTITSINISSAMI ISUMASSARSIORFISSAQQISSUT
Oqallisigisassaqqissut
Paasisassarsiorfigineqarsinnaasut
- Ilitsoqqussaralugu oqaatsit suuppat aamma sooq pingaaruteqarpat?
- Arlariinnik oqaaseqarneq suua aamma sooq pingaaruteqarpa?
- Oqaatsitigut assigiinngiiaassutsip arlariinnillu oqaaseqarnerup iluaqutissartai suuppat?
- Tamanik qanoq peqataatitsisoqarsinnaava?
- Arlariinnik oqaaseqarluni ilinniartitsineq qanoq aaqqissuunneqarsinnaava?
Meeqqanut naleqquttut
Paasisassarsiorfigineqarsinnaasut
- Nunarsuarmi oqaatsit qassiuppat?
- Nunarsuarmi oqaatsit nungutaanissaminnut ulorianartorsiortutut taaneqarsinnaassut qassiuppat?
- Oqaatsit nungutaannginnissaat pillugit suliniutaasinnaasut suusinnaappat?
- Oqallisigisiuk oqaatsit ilaat sooq nungutaasimasinnaanersut
- Oqallisigisiuk qanoq ililluta kalaallisut oqaatsitta nungutaanissaminnut ulorianartorsiulersinnaanerat pinaveersaartinniarsinnaaneripput
- Issittumi oqaatsit sumiorpaluutsillu nalunaarsukkat qimerloorsigit
- Kalaallisut oqaatsit oqaatsinut ilaqutariinnut sorlernut ilaappat?
- Kalaallisut oqaatsit ilaqutaat allat annertunerusumik paasisassarsiorfigisigit – suut paasivisigit?
- Erfalasumik titartaagitsi qalipallugulu. Kingorna makku pillugit paasiniaagitsi:
- Erfalasoq qanoq ateqarpa/taaneqartarpa?
- Kikkut erfalasoraat?
- Taakkua oqaatsit suut oqaaseraat?
- Oqaatsini taakkunani qanoq imminnut ilassisarpat?