Oqaatsitta ilisimatusaatigineqarnerat pillugu isumasioqatigiinneq

Ilinniartitaanermut, Kultureqarnermut, Timersornermut Ilageeqarnermullu Naalakkersuisup Peter P. Olsenip oqaatsitta ilisimatusaatigineqarnerat pillugu isumasioqatigiissitsinera pivoq Nuummi ulluni 12. – 13. oktobarimi 2022-mi.

Kalaallit oqaasii pillugit isumasioqatigiissitsineq qulequtaqarpoq: Oqaatsitta ineriartortinneqarneranni ilisimatusaatigineqarnerannilu anguniakkat najoqqutallu.

Isumasioqatigiissitsinermi siunertaavoq kalaallit oqaasiisa ilisimatusarfigalugillu nalilersuiffigineqartarnerisa siunissami timitalimmik iluaqutaasumillu kinguneqartinneqartarnissaat anguniarlugu aqqutissat assigiinngitsut eqqartorneqarlutillu innersuussuteqarfigineqarnissaat.

Isumasioqatigiissinneqartussat nunatta avataaneersunik ilaqartinneqarput pingaaruteqarmat oqaatsitta ilisimatusaatigineqarneranni avammut qiviarluni allanut assersuuffeqartarnissaq; oqaatsit sannaat assigiissuteqarpallaanngikkaluartut ilisimatusarnermi katersuinermilu suleriaatsit atortorissaarutillu naleqqersorfigissallugit pingaaruteqarmat.

Isumasioqatigiissitsineq malitseqartinneqartussaavoq ataatsimeersuarnermik. Ataatsimeersuarneq pissaaq 2023-mi. Tassanani qulequtaassaaq: Oqaatsitta atugaaneranni ilinniartitsissutaanerannilu anguniakkat najoqqutallu.

Isumasioqatigiinnermi oqaatsinik ineriartortitsineq ilisimatusarnerlu sammineqarnerusussaammata peqataasussat killeqartinneqarput pineqartunut susassaqarnerusunut. Isumasioqatigiissitsinerup malitsigisassaani ataatsimeersuarnermi oqaatsit atugaanerannik ilinniartitsissutaanerannillu eqqartuisoqassaaq, taamaattumillu peqataasussat siammasinnerusumeersut amerlanerusullu peqataatinneqarnissaat naatsorsuutigineqarpoq.

Peqataasussat amerlanerunissaat eqqarsaatigalugu isumasioqatigiisitsinermut naleqqiullugu ataatsimeersuarnissap ingerlanneqarnissaa allaanerussaaq. Inuit amerlagaluarlutik iluamik oqaloqatigiittarnissaat pingaaruteqassammat oqallittarfinnik saqqummiinerit akunneqartittarnissaat eqqarsaataavoq. Meeqqat atuarfianni, ilinniaqqiffinni tusagassiuutinilu oqaatsitta atugaanerat ilinniartitsissutaanerallu eqqartorneqartussani pingaaruteqartussaassaaq.

Oqaatsitta ilisimatusaatigineqarnerat pillugu isumasioqatigiinnermi saqqummiunneqartut eqimattakkuutaarnernilu eqqartorneqartut, eqikkarneqarneri, kiisalu oqaatsitta ilisimatusaatigineqartarnerat pillugu innersuussutit qulit tulliuttuni atuarneqarsinnaapput.

MALUGIUK pdf-it aaneqarsinnaasut tungujortumik qaamasumik qalipaateqarmata.

Pingasunngorneq 12. oktobari 2022 · KILLIFFIK - MAANNAMUT ANGUSAT

  • Tikilluaqqusineq – Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter P. Olsen
  • Isumasioqatigiinnermi peqataasut naatsumik imminnut ilisaritinnerat

Isumasioqatigiinnermi ullormi siullermi siunertarineqarpoq kalaallit oqaasiisa ilisimatusaatigineqarnerisa killiffiannik nalilersuinissaq, ilaatigut apeqqutit makku eqqartorneqarlutik:

  • Ilisimatusarnikkut politikkikkullu anguniakkat ingerlaqatigiippat?
  • Nunanut allanut naleqqiulluta killiffipput qanoq ippa?

Isumasioqatigiinnermi eqimattakkuutaanit saqqummiunneqartut ataatsimoortillugit ima eqikkarneqarput:

  • Aningaasat assaallu amigarput
  • Oqaatsinut suliassat ilisimatusarfissallu eqqarsaatigalugit ataqatigiissaarineq amigarpoq
  • Oqaaserpassualerineq siuarsartariaqarpoq
  • Ordboginik suliaqarneq aaqqissuussamik ingerlaavartumillu ingerlanneqartariaqarpoq
  • Oqaatsit ilisimatusaatigineranni suut amigaatigineqarnersut erseqqissarneqartariaqarpoq
  • Politikkikkut sorpiaat anguniagaanersut erseqqissarneqassapput
  • Nutserisoqarfiit – pingaartumillu inatsisilerineq eqqarsaatigalugu – suleriaasii iluarsaanneqartariaqarput
  • Oqaatsinut inatsisip atuutsinneqarnera timitalersorneqarneralu nakkutigineqartariaqarpoq
  • Oqaatsinut inatsisiliortarneq qanoq pisariaqartiginersoq oqallisigineqassaaq
  • Kalaallisut oqaatsinik ilisimatusarsinnaanerup annertusarneqarnissaa pingaaruteqarpoq
  • Ilisimatusartut ilisimatusaataallu saqqumilaarnerusariaqarput
  • Kalaallinut naleqqussakkamik tuluttut atuartitsisarnissaq inerisarneqassaaq, oqaatsit allat aqqutigeqqaarnagit
  • Kalaallit oqaasiisa ilitsoqqussarinagit oqaatsitut ilinniartitsissutigineqarnissaannut ilitsersuummik suliaqartoqartariaqarpoq
  • Oqaasileriffimmi assigisaannilu suliaasut tamanut atoruminarsarnissaat pisariaqarpoq, apuunneqarlutillu atuisussanut

Sisamanngorneq 13. oktobari 2022 · INGERLAQQINNERMI NAJOQQUTASSAT

Isumasioqatigiinnermi ullormi tullermi siunertarineqarpoq oqaatsitta ineriartortinnissaat pillugu siunnerfiit najoqqutassallu eqqartussallugit ingerlaqqinnermilu najoqqutassanut inassuteqaatit qulit isumaqatigiissutigissallugit. Apeqqut tamatumunnga tunngasoq eqimattakkuutaanit oqallisigineqartoq tassaavoq:

  • Kalaallit oqaasiisa ineriartortinnerat sunik naleqqerfeqarluni ingerlassava?

Isumasioqatigiinnermi eqimattakkuutaanit saqqummiunneqartut kingorna inerniliiniarluni ataatsimut oqallinneq inassuteqaasiornerlu ingerlanneqarpoq, inassuteqaatillu qulit tassaapput:

  1. Oqaatsitsinnik atuartitsineq ilinniusiornerlu ataqatigiissoq, taakkunanngalu ilinniartitsisinnaasut amerlanerusut
  2. Kalaallisut ilinniusianik atortussanillu ineriartortitsineq digitalinngorsaanerlu
  3. Oqaatsitsinnik suliat ilisimatusaatillu tamanut saqqummiunneqarlutillu iluaqutaanerunissaat
  4. Oqaatsit ilisimatusaatigineranni aningaasalersuinissamut ajornannginnerusumik aaqqissuussisoqarnissaa
  5. Oqaaserpassualerinerup sprogteknologip inerisarneqarlunilu inatsisitigut tunngaveqalernissaa
  6. Oqaatsivut pillugit inatsisit iluarsaanneqarnissaat
  7. Oqaatsitsinnik ilisimatusarfiup ataavartup pilersinneqarnissaa
  8. Inatsisinik nutserisoqarfik pilersinneqassaaq
  9. Oqaatsivut pillugit nutaanik suliniuteqartoqassatillugu immikkut aningaasaliisoqartarnissaa pisariaqarpoq
  10. Oqaatsivut pillugit suliniuteqarluartut inerisaasullu tapersersorneqartarnissaat malugiarneqartarnissaallu