Oqaasiliortut 2008 – 8

OQAA – 220808(gl)

Oqaasiliortut Ataatsimiinnissaat tallimanngorneq aggustip 22-anni 2008 nal. 9.00 Ilimmarfimmi Oqaasileriffiup ataatsimiittarfiani.

 

Peqataasut: Eva Møller Thomassen, Ellen J.Karlsen, Abia Abelsen, Stephen Heilmann aamma Carl Chr. Olsen

Allatsi: Katti Frederiksen

 

Oqaluuserisassatut siunnersuutit:

1. Tikilluaqqusineq
2. Kingullermik ataatsimiinnermit imaqarniliap akuerineqarnera aamma kingullermik ataatsimiinnerup siuliani imaqarniliap akuerineqarnera.
3. Saaffiginnissutit suliassartallit:
   1. GTE-mi taaguutit (9.juni 08)
   2. Center for Arbejdsmarked og Kompetenceudvikling – Sulisoqarnermik Piginnaaninngorsarfimmut Aqutsisoqarfik (12.juni 08)
   3. Opdatere (14.juli 08)
   4. funktionær (27.juni 08)
   5. qallunaatut imalt danskisut? (27.juni 08)
   6. sygeplejestudiet kalaallisut taaguutissaa (4.juli 08)
   7. Rødliste kalaallisut (16.juli 08)
   8. immateriel (tigussaanngitsut) (30.juli 08)
   9. bygdebestyrelse aamma bygderåd (5.aug 08)
   10. udryddelses truede dyr og planter (6.aug 08)
   11. qujanartoq qallunaatut (6.aug 08)
   12. individuel kontrakt
   13. Perorsaanermi taaguutit (20.aug 08)
4. Allat

Inussiarnersumik inuulluaqqusilluta

Carl Chr. Olsen                                          Katti Frederiksen

Siulittaasoq                                               Allatsi

 

1 aamma 2 pillugu:

Siulittaasoq Carl Chr. Olsen tikilluaqqusereermat imaqarniliat kingulliit marluk eqqartorneqariarlutik saaffiginnissutit suliassartallit tikinneqarput. Imaqarniliami 28.29.majimiit atimut Angitivimmut tunngatillugu oqaasertaliussassaq imaattunngortinneqarpoq: ‘Sumiorpaluutsimik akuersillutik taamatut atsiisoqarsinnaanera akueraat..’. Imaqarniliami tassanissaaq Naalakkersuisoqarfinni taaguutit pillugit naqqiissutissat ilagaat journalip kalaallisut allanneqarnissaa: allagaatinut toqqorterivinngorlugu, tassanilu oqaatsip journalip naalakkersuisoqarfiup iluani atuuttuunissaa nassuiaatigineqarluni. Kiisalu Avannaamioqatigiit Killiit oqaasiliortunik akuerineqarluni atuuttussanngortitaq atuutissasoq Vestnorden pineqaraangat, kiisalu Nunat Avannarliit pinnagu taaguut Avannaamioqatigiit atuutissasoq Norden pineqaraangat.

3 pillugu:

Saaffiginnissutit suliassartallit:

1. GTE-mi taaguutit akissusiorneqareersut maanna Oqaasiliortunit akuerineqarput, tassaasut:

1) Grønlands Turist- & Erhvervsråd (GTE)- Nunatsinni Takornariaqarnermut Inuussutissarsiornermullu Siunnersuisoqatigiit (NTIS)

2) Økonomi- & Adm.chef – Aningaasaqarnermut allaffissornermullu pisortaq

3) HR Koordinator – Sulisoqarnermut ataqatigiissaarisoq

4) IT Koordinator – Qarasaasialerinermut ataqatigiissaarisoq

5) Udviklingschef – Ineriartortitsinermut pisortaq

6) PR og Projektkoordinator – PR-imut suliniutinullu ataqatigiissaarisoq

7) Projektkoordinator – Suliniutinut attaveqaqatigiinnermullu ataqatigiissaarisoq 

8) Markedschef – Nittarsaassinermut pisortaq

9) MICE-koordinator – MICE-mut ataqatigiissaarisoq

10) PR- & Marketingskoordinator – PR-imut nittarsaassinermullu ataqatigiissaarisoq

11) Marketingskoordinator – Nittarsaassinermut ataqatigiissaarisoq

3. 2. pillugu:

Saaffiginnissut 3.2. Center for Arbejdsmarked og Kompetenceudvikling Sulisoqarnermik Piginnaaninngorsarfimmut Aqutsisoqarfimmik taaneqarsimasoq Oqaasiliortunit aalajangersagaareersut malillugit ima taaguuteqassasoq siunnersuutigineqarpoq Sulisoqarnermut Piginnaanngorsaanermullu Ingerlatsivik.

3. 3. pillugu:

Qallunaatut oqaaseq opdatere ORDBOGEN malillugu imatut allaqqavoq: nutaanik ilaartorpaa aammalu opdatering: paasissutissat kingulliit ilanngullugit takussutissiaq. Taamaattumik Oqaasiliortut ataatsimiinnerminni taakkua tunngavigalugit opdatere allaqqatillugu oqaaseqatigiit sumut tunngasuuneri sunalu pillugu oqaatsip atorneqarnera apeqqutaatillugu kalaallisut oqaasertalerneqarsinnaanera oqallisigaat. Orbogini allaqqasut saniatigut qarasaasianut tunngatillugu atorneqassatillugu oqaatsit ukua tulluartuutippaat: [paasissutissanik] nutarsaaneq.

3. 4. pillugu:

Qallunaatut oqaaseq alla saaffiginnissutaasimasoq funktionær ORDBOGEN-imi allaqqasut malillugit tassaavoq atorfilik [allaffimmi] (tjenestemand). Tamannalu aamma eqqortuuvoq, immaqali ullumikkut oqartarnerput malillugu oqassaagut pisortanik sullissisoq.

Funktionærip ataani sulisut assigiinngitsorpaasusinnaapput, tamarmilli pisortat pigisaanni atorfeqartuullutik.

Taaguutit ullumikkut funktionærip ataani inissisimasut soorlu fuldmægtig, AC-medarbejder il.il. atugaraavut, qallunaatulli oqaatsip funktionærip atorunnaarsimasinnaanera Oqaasiliortut isummerfigiuminaatsippaat, taamaattorli oqaatigiinnassallugu funktionærlovimik peqarmat malitassanik aalajangersimasunik atuutitsisussamik.

3. 5. pillugu:

Saaffiginnissummi apeqqutigineqarpoq taaguut sorleq qallunaatut imalt danskisut eqqortuunerunersoq imaluunniit ullutsinnut naleqquttuunersoq. Tassani erseqqissaatigineqassaaq oqaaseq qallunaaq inuiannut kalaaliunngitsunut pingaartumik Europamit kingoqqisunut tamanut taaguutaammat, danskillu tassaallutik inuiannut aalajangersimasunut, tassa Danmarkimiit kingoqqisunut taaguut. Ullutsinnili taakkuninnga atuinitsinni qallunaamik oqaraangatta danskit eqqarsaatiginerusarpavut, taamaattorli  Danmarkimiit pisuuneri erseqqissaaviginiaraangatsigik taaguut danskit atortarlutigu.

3. 6. pillugu:

Sygeplejestudiep kalaallisut taaguutissaa siornali saaffiginnissutaasimasoq uninngatikkallarneqarsimavoq ilisimatusarfiup aaqqissuuteqqinneqarnerani ilinniarfiit assigiinngitsut Ilisimatusarfiup ataaniilertussat qanoq atserneqarnissaat utaqqimaaqqaarniarlugit. Maannalu pisortatigoortumik sygeplejestudiep kalaallisut taaguutissaa aalajangerneqarpoq: Peqqissaanermik Ilisimatusarfik.

3. 7. pillugu:

Qallunaatut oqaaseq rødliste Oqaasiliortut ataatsimiinnerminni oqaluuserereerlugu kalaallisut ima taaguuteqarnissaa aalajangiuppaat:

nungutaaratarsinnaasunut allattuiffik. Tassani uumassusillit suulluunniit nungutaaratarsinnaasut pineqartut rødlistemut aallaaviummata oqaatsit navianartorsiortut imaluunniit mianerisariallit atornagit nungutaaratarsinnaasut eqqornerusumik oqaatiginnimmat atorneqarnissaa aalajangiivigineqarpoq.

– 3. 8. pillugu –

Immateriel kalaallisut qanoq taaguuteqarnissaa tamanit akuersaarneqarluni tigussaanngitsut-nik taaneqarpoq.

3. 9. pillugu:

Oqaatsit bygdebestyrelse aamma bygderåd ordbogini allaqqaneri malillugit ullumikkut atugaanngimmata saaffiginnittup apeqqutigaa aalajangersimasumik taaguuteqarnersut. Taaguut bygderåd qanga atuussimasoq ullumikkut bygdebestyrelsinngornikuuvoq, taannalu nunaqarfinni aqutsisunik taaneqartartoq Oqaasiliortut unnerpaat, bygderådilu ullumikkut atuukkunnaanikuugaluartut ordbogit malillugit nunaqarfimmiut sinniisaannik allassimavoq.

3. 10. pillugu:

Udryddelses truede dyr og planter kalaallisut mianerisarialinnik oqaasertalerneqarsimanera ippigalugu saaffiginnittoq isumaqatigineqarluni kalaallisut ima eqqornerusumik oqaasertalerneqarnissaa siunnersuutigineqarpoq: uumasut naasullu nungutaaratarsinnaasut.

3. 11. pillugu:

Saaffiginnissut kalaallisut oqaatsip qujanartoq-p qallunaatuumut nutserniarnerani ikioqqusup Oqaasiliortut qanorpiaq nutserinissamut pisussaatitaanerlutik apeqquserpaat, taamaattorli kalaallisut oqaatsip oqaatsit suussusiinut assigiinngitsunut pingasunut inissinneqarsinnaanera eqqartorpaat, tassaasinnaammat taggit, oqaluut taggisaasaq aammalu oqaaseeraq. Uanili apeqquteqartup taggisitut aqaatitut oqariaatsitullu atormagu immaqa qallunaatut ima taaneqarsinnaavoq kær, lille pus, lille nor il.il.

3. 12. pillugu:

Oqaasiliortut isumaqatigiissutigaat qallunaatut individuel kontrakt kalaallisut immikkut isumaqatigiissummik taaneqartassasoq, soorluttaaq aamma suliffeqarfinni inuillu akornanni taamatut atugaareersoq.

3. 13. pillugu:

Perorsaanermi taaguutit pillugit saaffiginnissuteqartoq qujarullugu iluarineqarpoq. Bente Hegelund saaffiginnissuteqartoq Nuummiillatsiarnerani naapeqatiginiarneqarpoq.

4. Allat:

Schultz Lorentzenip ordbogiliaa tunngavigalugu ordbogiliassaq tuluttuumiit-kalaallisuumut, kalaallisuumiit-tuluttuumut Inerisaaviup Oqaasileriffiullu suleqatigiissutigisaat pillugu Abia ilisimatitsivoq suliffeqarfiit ikiortiserineqarnikuunerinut atatillugu peqqinnissaqarfimmiut kisiartaallutik tunniussisimanerinik.

Kalaallisuumiit kalaallisuumut ordbog maanna naqitertinneqartoq aamma ilisimatitsissutigineqarpoq.

Allagaateqarfimmiit digitaliseeriineq ingerlanneqartussaammat Poul Egedep Fabriciusillullu ordbogii digitaliseererneqassasut, aamma Schultz-Lorentzenip atugaaraliaa: Det grønlandske folk og folkesind digitalisererneqassasoq  Pujup siunnersuutigisimavaa.

Oqaasileriffimmut saaffiginnissutigineqarluni apeqqutigineqallattaasarpoq ordbogi qallunaatuumiit-kalaallisuumut elektroniskimik pineqarsinnaanersoq, tamanna Inerisaavimmiit suliarineqarsimammat Abiap suleqatiminut anngutissallugu neriorsuutigivaa.

Naggataatigut eqqaaneqarpoq KNR nuna tamakkerlugu sullissisussaalluni tusartitsisartuummat Notabenep tusaqqusaarutaa naqqiissuteqarfigilaaqqullugu, tassani nittartakkap nalunaarutigineqarnerani naggat toornermik taaneqarmat, naak toorneq naggallu aamma assigiinngissuteqaraluartut.

 

Inussiarnersumik inuulluaqqusilluta

 

Carl Chr. Olsen                                          Katti Frederiksen

Siulittaasoq                                               Allatsi