Nunat Aqqinik Aalajangiisartut novembarip 26-anni 2008-mi Oqaasileriffimmi ataatsimiinnerat
Peqataasut.: Carl Christian Olsen, Tukummeq Qaavigaq, Karl Elias Olsen, Stephen Heilmann.
Peqataanngitsut: – Abia Abelsen, piffissaarussimanini pissutigalugu.
Allatsi: Lisathe Møller Kruse.
Oqaluuserineqartut makkuupput:
- Tikilluaqqusineq
- Imaqarniliap akuerinera (oktobarip 30-anni ataatsimiinnermit imaqarniliaq)
- Paamiut eqqarpiaani nunat aqqi nalunaarsoqqammisat. (Amerlanngillat)
- Nunat aqqi nalunaarsugaatigeriikkat immap assingani 1300-miittut misissorneri. Exel-filimiipput imatut atilimmi: kort1300.xls.
- Immap assingani 1300-mi immat aqqi qallunaatuut Kalaallit Nunaata avatingaatsiaaniittut eqqartugassat isummerfigisassallu.
- Aatsitassanut Ikummatissanullu Pisortaqarfimmiit suliakkiisuut. Tunumi Tasiilap avannaani Kangerlussuup nalaa pillugu misissuiffissamik atseeqqusissut.
- Taasariaqartut allat
1. pillugu
Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.
2. pillugu
Oktobarip 30-anni 2008-mi Nunat Aqqinik Aalajangiisartut ataatsimiinnerannit imaqarniliaq akuerineqarpoq.
3. pillugu
Nunat aqqi immap assingani 1250-miittut pillugit Paamiuni aalisartut piniartullu siulittaasuat Nikolaj Knudsen suleqatigineqarpoq. Nikolaj Knudsenip nunat aqqinik ilisimasallit pissarsiareriarlugit nunat aqqinik nalunaarsueqatigivai, suleqatigisai tassaallutik Paamiut eqqaani nunat aqqinik ilisimasaqarluartut arfineq pingasuusut.
Paamiut eqqarpiaani nunat aqqi nunat aqqinik ilisimasalinnit nalunaarsorneqaqqammersut Nunallu Aqqinik Aalajangiisartunit akuerineqaqqammersut aqqaneq marluuupput, ukuullutik: Puja (Ø), Qimmilivik (Ø), Imerniartarfikasik (Ø), Siaarsivik (Ø), Kujaffik (Ø), Qulaattariaq (Ø), Sukkanarteq (SUND), Kittorsannguit (ØER), Seernalinngivit (FJORD), Akerortuup Ikkarlua (SKÆR), Qimatulivik (Ø), Iliveqarfiup Kangerlukasia (FJORD).
Nunat aqqi nalunaarsugaatigeriikkat nunat aqqinik ilisimasalinnit naqqiissuteqarfigineqartut Nunallu Aqqinik Aalajangiisartunit akuerineqartut ukuupput: Pingortusoq (Ø) Pilortusoq-nngortinneqarpoq, Qummuk (Ø) Qummooq-nngortinneqarluni, Qernertunnguaq (SKÆR) Qernertunnguit-nngortinneqarluni.
Nunap aqqa nalunaarsugaatigeriigaq Aarfit nunat aqqinik ilisimasalinnit Aarrit-nik taaguuteqartinneqartoq Nunat Aqqinik Aalajangiisartunit aalajangerneqarpoq aqqa allanngortinneqarani Aarfit-uinnassasoq.
Nunap aqqa nalunaarsugaatigeriigaq Alleruusat (Ø) nunat aqqinik ilisimasalinnit naqqiissuteqarfigineqarsimavoq Allerillat-nngortinneqarluni qeqertanullu marlunnut atigitinneqartutut nalunaarsorsimalluni, naak siullermik qeqertamut ataasiinnarmut ateritinneqartutut nalunaarsugaagaluarluni. NAA-t ataatsimiinnerminni aalajangiussinnginnerminni paasilluaqqaarusuppaat tamarmik eqqortuunersut imaluunniit naqqiissutaanersoq. Taamaattumik nunat aqqinik ilisimasalinnut apeqqutigineqareerpat NAA-t ataatsimiinnerminni sammeqqissagaat aalajangerneqarpoq.
4. pillugu
Nunat Aqqinik Aalajangiisartut nunat aqqi nalunaarsugaatigeriikkat immap assingani 1300-miittut misissorpaat. Naqqiissutigineqarpoq Qooqquniittoq Fåreavlsstationip immap assinganiit peeqquneqarnissaa KMS-ikkormiunut nalunaarutigineqassasoq.
Taassuma saniatigut immat aqqi 1300-miittut Kalaallit Nunataata avatingaatsiaaniittut eqqartunngilaat misissuiffigineqareerpata avataasiortullu isumasiorneqareerpata aatsaat samminiarlugit. Nunallu aqqinik ilisimasalinnut avataasiortunut immat aqqi apeqqutigineqartussat tassaapput: Fiskenæs Banke, Godthåb Dyb, Sukkertop Dyb, Fyllas Banke, Toqqusaq Banke, Lille Hellefiskebanke, Sukkertoppen Banke.
Efraim Hansenimut Nuup Kangerluata ilaaniittup Ujarassuarnik atillip kangerluttaa qanoq ateqarnersoq apeqqutigineqassasoq aalajangiunneqarportaaq.
5. pillugu
Qulaani immikkoortumi 4-mi sammineqareermat immikkoortoq 5 sammineqanngilaq.
6. pillugu
Aatsitassanut Ikummatissanullu Pisortaqarfimmiit suliakkiissutigineqartoq tassaavoq tunumi Tasiilap avannaani Kangerlussuup nalaa misissuiffissaq atseqqullugu. NAA-t misissuiffissaq taanna
atserpaat Atasut-nik. Ilaliussani ukuusuni sumiiffippiaa takuneqarsinnaavoq: 2009_09_stort kort.pdf aamma 2009_09_fortrolig.pdf.
7. pillugu
Sermitsiap kitaatungaaniittoq qeqertaq Qeqertaarsukasik-mik nalunaarsugaatigisarput Nasuakasik-mik ateqartinneqartoq ilisimaneqarmat Nuummiut utoqqartaasa ilaannut Kristian Heilmannimut apeqqutigineqassasoq aalajangerneqarpoq.
Kiisalu NAA-t tulliani ataatsimiilerpata nunat aqqi aalajangikkat avammut paasissutissiissutigineqartarnissaat pillugu eqqartuisoqassasoq aalajangerneqarpoq.
—————————–
Carl Chr. Olsen Lisathe M. Kruse
Siulittaasoq Allatsi