Nunat Aqqinik Aalajangiisartut 2009 – 1

NAA.31.03.09

Nunat Aqqinik Aalajangiisartut marsip 31-anni 2009-mi Oqaasileriffimmi ataatsimiinnerat

Peqataasut.: Carl Christian Olsen, Karl Elias Olsen, Tukummeq Qaavigaq aamma Abia Abelsen.
Peqataanngitsut: Stephen Heilmann, napparsimanini pissutigalugu.
Allatsi: Lisathe Møller Kruse.

Oqaluuserineqartut makkuupput:

  1. Tikilluaqqusineq
  2. Imaqarniliap akuerinera (januaarip 28-anni ataatsimiinnermit imaqarniliaq)
  3. Aatsitassanut Ikummatissanullu Pisortaqarfimmiit suliakkiissut
    • a. Signe I. Andersen Report17824
  4. Paamiut eqqaani isorartuumi nunat aqqi nalunaarsukkat akuerinissaat (Marianne Hansenip Paamiunukarluni nunat aqqinik ilisimasallit suleqatiginerisigut nalunaarsugai). Ilanngullugit sammineqassapput nunap isuata eqqaani Aappilattumeersup nalunaarsueqatiginerani nunat aqqi nalunaarsukkat akuerinissaat.
  5. Taasariaqartut allat

1. pillugu

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

2. pillugu

Januaarip 28-anni 2009-mi Nunat Aqqinik Aalajangiisartut ataatsimiinnerannit imaqarniliaq akuerineqarpoq.

3. pillugu

Aatsitassanut Ikummatissanullu Pisortaqarfimmiit suliakkiissut Nunat Aqqinik Aalajangiisartunit eqqartorneqareerluni ima taaguuteqartussatut aalajangiunneqarpoq:

Report17824 Moriusap Sineriaa

4. pillugu

Nunat aqqi akuerisat amerlanerpaat Paamiut eqqaanneersuupput, ikinnerusullu nunap isuata eqqaani Nanortallip kujataani Aappilattup eqqaaneersuunerullutik.

Marsimi 2009-mi Oqaasileriffimmi ikiortaasoq Marianne Hansen Paamiunut nunat aqqinik nalunaarsuiartorpoq, Paamiut eqqaat nunat aqqinik ilisimasallit peqatigalugit nalunaarsuiffigiartorlugu.

Nunat aqqinik ilisimasallit Paamiut eqqaat pillugu Mariannep suleqatigisimasai tassaapput: Adolf Frederiksen (Paamiut), Sem A. Lorentzen (Paamiut), Peter Petersen (Paamiut), Tittus Lorentzen (Paamiut), Lars Eigeldsen (Paamiut), Nathan Andreassen (Paamiut), Karl Knudsen (Paamiut), Aqqaluk Petersen (Paamiut), Lars Karl Jensen (Paamiuni ukiorpaaluppassuarni najugaqarsimasoq, massakkullu Nuummi najugaqartoq).

Nunat aqqi Paamiut eqqaaneersut nalunaarsoqqammisat Nunallu Aqqinik Aalajangiisartunit akuerineqartut 266-upput. Taakkulu saniatigut nalunaarsugaataareersunit naqqiissutit allannguuteqartullu Paamiut eqqaaneersut 47–llutik. Nunat aqqi nalunaarsoqqammisat naqqiissutaasullu saniatigut nunat aqqi GIS-mi inissaannut inissilluakkat Paamiut eqqaaneersut 698-upputtaaq. Qulaani taaneqartut fil-imi imatut atilimmiipput: Paamiut Aappilattullu eqqaat_AKUERISAT.pdf.

Paamiut eqqaanni nunat aqqi Nunat Aqqinik Aalajangiisartunit akuerineqanngikkallartut nunallu aqqinik ilisimasalinnut apeqqutigisassat ukuupput: 1) Lars Eigelsenimit ”Kippartut”-nik ateqartinneqartoq Sem A. Lorentzenimit “Kippatit”-nik ateqarnerarneqartoq, 2) nalunaarsugaataareersuni “Illusarseriitsut”-nik ateqartinneqartoq, Lars Eigelsenimilli “Illusarseriitsoq”-mik ateqartinneqartoq, aamma 3) nalunaarsugaataareersuni Lars Eigelsenimiillu “Takisuukasik”-mik ateqartinneqartoq, Nathan Andreassenimiilli Sem A. Lorentzenimiillu “Puttallarsiivik”-mik ateqartinneqartoq, 4) kiisalu “Terianniap Pissigaa” Nathan Andreassen Sem A. Lorentzenilu peqatigalugit nalunaarsugaq, NAA-llu paaserusuppaat taassuma nunap aqqata suminngaanniit aallaaveqarnera. Qulaani taaneqartut fil-imi imatut atilimmiipput: Paamiut Aappilattullu eqqaat_AKUERISAT.pdf.

Nunap isuata eqqaani Aappilattumeersoq Hans Levisen Nuummut ulloq ataaseq aqqusaartoq iluatsillugu Lisathe Møller Krusep marsip 17-anni 2009-mi nunat aqqinik nalunaarsueqatigivaa.

Nunat aqqi Aappilattup eqqaaneersut nalunaarsoqqammisat Nunallu Aqqinik Aalajangiisartunit akuerineqartut 75-upput. Taakkulu saniatigut nalunaarsugaataareersunit naqqiissutit allannguuteqartullu Aappilattup eqqaaneersut qulingiluaallutik.

Qulaani taaneqartut fil-imi imatut atilimmiipput: Paamiut Aappilattullu eqqaat_AKUERISAT.pdf.

5. pillugu

—————————–

Carl Chr. Olsen Lisathe M. Kruse

Siulittaasoq Allatsi