Oqaasiliortut 2009 – 6

OQAA – 240809(gl)

Oqaasiliortut Ataatsimiinneranni ataasinngorneq aggustip 24-ianni 2009 Ilimmarfimmi Oqaasileriffiup ataatsimiittarfiani imaqarniliaq.

 

Peqataasut: Abia Abelsen, Stephen Heilmann, Eva Møller Thomassen aamma Carl Chr. Olsen

Allatsi: Marianne Hansen

Peqataanngitsoq/-ut: Ellen J. Karlsen

Elleni nalunaarpoq ullaap tungaani ataatsimiinnissamut pingasunngorneq tallimanngornerlu kisiisa piffissaqarfigalugit, ualikkut periarfissaqartuassaarli.

 

Oqaluuserisat:

  1. Tikilluaqqusineq:
    Carl Christian Olsen tikilluaqqusivoq, nalunaarutigalugulu klynge-ammunition kisiat sammineqassasoq. Sinneri ulloq alla aalajangiiffigineqassapput.

    Carl Christian Olsenip, Namminersornermi oqaatsit kalaallisut danskisullu katitat atugaanerat pillugu akuersisimannginnerat, Inatsisartut Allattoqarfiat oqaloqatigisimavaa, tassanilu paasissutissatut Pia Jarvadip nassuiaataa tunniussimallugu. Suli tuttaqaqqissimanngillat.

    Oqaasiliortunit eqqaaneqarpoq, Inatsisartut piffissami aalajangersimasumi aalajangertariaqaleraat qaqugu kalaallisuinnaq taaguutit atorneqalissanersut.

  2. Kingullermik ataatsimiinnermi aggustip 12-ani imaqarniliaq akuerineqarpoq
  3. Oqaatsip klyngeammunition kiisalu oqaatsit tassunga attuumassutillit  kalaallisut taaguusernissaanut suliassiissut.
    Oqaaseq klyngeammunition pillugu aalajangiunneqarpoq amerlasuujusat qaartussiat. Aalajangiinermut pissutaavoq amerlasuutut pissuseqartarmata. Oqaaseq imassat/pequtissat oqaatsip “amerlasuujusat” iluaneereermat immikkut ilanngunneqassanngilaq.

    Oqaaseq ammunition pillugu aalajangiunneqarpoq patruuni, tassani peqqutaavoq oqaatsit imassat kiisalu pequtissat allatut isumaqarsinnaasarmata.

    Oqaaseq bombe pillugu aalajangiunneqarpoq qaartartoq, taanna qangali atugaareerpoq.

    Oqaaseq mine pillugu aalajangiunneqarpoq qaartussiaq, tassani nassuiaataavoq arajutsisitsilluni qaartussianngorlugu imaani nunamiluunniit inissinneqartarmat.

    Oqaaseq subammunition pillugu aalajangiunneqarpoq qaartussiartaa, tassani pissutaavoq amerlasuujusat qaartussiat qaartussiartarimmassuk.

  4. Allat

Inussiarnersumik inuulluaqqusilluta
Carl Chr. Olsen                                          Marianne Hansen
Siulittaasoq                                               Ataatsimiinnermi imaqarniliortoq

 

Ullormi aggustip 24-ianni ataatsimiinnermi oqaatsit aalajangiussat:

ammunition:             patruuni

bombe:                      qaartartoq

klyngeammunition:    amerlasuujusat qaartussiat

mine:                        qaartussiaq

subammunition:        qaartussiartaa