Nunat Aqqinik Aalajangiisartut 2009 – 4

NAA.25-29.08.09

Nunat Aqqinik Aalajangiisartut Septembarip 25-anni aamma septembarip 29-anni 2009-mi Oqaasileriffimmi ataatsimiinnerat

Septembarip 25-anni 2009-mi ataatsimiinnermi:

Peqataasut.: Carl Christian Olsen, Tukummeq Qaavigaq aamma Abia Abelsen.
Peqataanngitsut: Stephen Heilmann, ilinniartitsinini pissutigalugu, Karl Elias Olsen, angalaarsimanini pissutigalugu.
Allatsi: Lisathe Møller Kruse.

Septembarip 29-anni 2009-mi ataatsimiinnermi:

Peqataasut.: Carl Christian Olsen, Tukummeq Qaavigaq, Abia Abelsen aamma Karl Elias Olsen.
Peqataanngitsut: Stephen Heilmann, ilinniartitsinini pissutigalugu.
Allatsi: Lisathe Møller Kruse.

Oqaluuserineqartut makkuupput:

  1. Tikilluaqqusineq
  2. Imaqarniliap akuerinera (aggustip 24-anni ataatsimiinnermit imaqarniliaq)
  3. Nunat aqqi nalunaarsoqqammisat akuerinissaat. (Nanortallip eqqaani, Qaqortup eqqaani, Aasiaat eqqaani, Niaqornaarsuullu eqqarpiaani nunat aqqi nalunaarsorlaat 365-t akuerisassaapput. Taassuma saniatigut naqqiiterpaaluit akuerisassaapput, kiisalu Mapinfo-mi inissilluakkat nalunaarsugaataareersut qimerluugassat 1600 missaaniillutik)
  4. Taasariaqartut allat

1. pillugu

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

2. pillugu

aggustip 24-anni2009-mi Nunat Aqqinik Aalajangiisartut ataatsimiinnerannit imaqarniliaq akuerineqarpoq.

3. pillugu

Nunat aqqi nalunaarsoqqammisat akuerisat Nanortallip, Qaqortup, Niaqornaarsuup kiisalu Aasiaat eqqaanneersuupput.

Aggustip ingerlanerani Marianne Hansen Aasianniinnermini nunat aqqinik nalunaarsuineq siorna 2008-mi ingerlanneqareersoq nangippaa.

Nunat aqqinik ilisimasallit Mariannep suleqatigisimasai tassaapput: Otto Storch, Emanuel Storch, Jørgen Larsen, Piitannguaq Hansen, Thele Petersen, kiisalu Jørgen Reimer.

Nunallu aqqi Aasiaat eqqaaneersut nalunaarsugai nalunaarsugaatiginngisavut Nunallu Aqqinik Aalajangiisartuniillu akuerineqaqqammersut 65-upput.

Aggustip naalernerani Lisathe Møller Kruse Nanortaliliarpoq nunat aqqinik nalunaarsuiartorluni, uternerminilu Qaqortup aqqusaarnerani Gerhard Jakobsen Qaqortup eqqaani nunat aqqinik nalunaarsueqatigalugu, siorna Katti Frederiksenip Qaqortumiinneranit nalunaarsuinera nangillugu.

Lisathep kujataaniinnermini nunat aqqinik ilisimasallit suleqatigisai tassaapput: Hans Levisen (Nanortalik), Louis Elisassen (Nanortalik), Peter Poulsen (Nanortalik), Hans Josenius (Nanortalik), Kasper Ludvigsen (Nanortalik), kiisalu Gerhard Jakobsen (Qaqortoq). Lisathep iluatsillugu Niaqornaarsummi peroriartorsimasoq Lars Filemonsen Nanortalimmiinnermini nunat aqqinik Niaqornaarsuup eqqaaneersunik aamma nalunaarsueqatigivaa.

Lisathep Nanortalimmiinnermini Lars Filemonsen suleqatigalugu Niaqornaarsuup eqqaaneersut nunat aqqi nalunaarsugai NAA-nit nalunaarsugaatigineqanngitsut, Nunallu Aqqinik Aalajangiisartunit akuerineqaqqammersut 67-upput.

Lisathe Qaqortumiinnermini nunat aqqinik ilisimasalik Gerhard Jakobsen suleqatigalugu nunat aqqi NAA-nit nalunaarsugaatigineqanngitsut nalunaarsoqqammisai NAA-niillu akuerineqaqqammersut 24-pput.

Lisathe Nanortalimmiinnermini nunat aqqinik ilisimasallit suleqatigalugit nunat aqqi NAA-nit nalunaarsugaatigineqanngitsut nalunaarsoqqammisai NAA-niillu akuerineqaqqammersut 226–upput.

Taakku saniatigut nalunaarsugaataareersunit naqqiissutit allannguuteqartullu katillutik 179–pput.

Kiisalu nunat aqqi nalunaarsoqqammisat naqqiissutaasullu saniatigut nunat aqqi GIS-mi inissaannut inissilluakkat katillutik 1588-upputtaaq. Qulaani taaneqartut fil-imi imatut atilimmiipput: Autoriseret stednavne_Nanortalik, Qaqortoq, Aasiaat Niaqornaarsuk.xlsm.

Nanortallip eqqaanni nunat aqqi Nunat Aqqinik Aalajangiisartunit akuerineqanngikkallartut nunallu aqqinik ilisimasalinnut apeqqutigisassat ukuupput:

1) nalunaarsugaataareersuni ”Naaliguttoq”-mik ateqartinneqartoq Louis
Elisassenimit Peter Poulsenimiillu “Naaliguttut”-nik ateqarnerarneqartoq,
2) nalunaarsugaataareersuni “Tilliit”-nik ateqartinneqartoq, Louis Elisassenimit Peter Poulsenimiillu “Siggiit”-nik ateqartinneqartoq,
3) nalunaarsugaataareersuni “Qunnersuaarsuk”-mik ateqartinneqartoq, Louis Elisassenimit Peter Poulsenimiillu “Qunnertuarsuk”-mik ateqartinneqartoq,
4) Tasiusap akianiittoq “Iatituaq” qanoq isumaqarnersoq sunalu tunngavigineraa Louis Elisassenimut Peter Poulsenimullu apeqqutigineqassaaq,
5) nalunaarsugaataareersuni “Nunngarut”-mik ateqartinneqartoq Kasper Ludvigsenimiillu “Nunngaritseq”-mik ateqartinneqartoq,
6) “Inugap Nuua” qanoq isumaqarnersoq sunalu tunngavigineraa Hans Joseniusimut apeqqutigineqassaaq, kiisalu
7) nalunaarsugaataareersuni “Sivinganerup Nuua”-nik ateqartinneqartoq Hans Levisenimilli “Ilillit Nuuat”-nik ateqartinneqartoq.

Qaqortup eqqaani nunap aqqa Nunat Aqqinik Aalajangiisartunit akuerineqanngikkallartoq Gerhard Jakobsenimullu apeqqutigineqartussaq tassaavoq:

Atikerleq, qanoq isumaqartinneqarnersoq sunalu tunngavigineraa apeqqutigineqassalluni.

Niaqornaarsuup eqqaani nunat aqqi marluk Nunat Aqqinik Aalajangiisartunit akuerineqanngikkallartut Lars Filemonsenimullu apeqqutigineqartussat tassaapput:

1) “Aqqaria” qanoq isumaqartinneqarnersoq sunalu tungavigineraa apeqqutigineqassaaq,
2) nalunaarsugaataareersuni “Alanngorleq”-mik ateqartinneqartoq Lars Filemonsenimilli “Alanngorlia”-nik ateqartinneqartoq.

Aasiaat eqqaanni nunat aqqi Nunat Aqqinik Aalajangiisartunit akuerineqanngikkallartut nunat aqqinik ilisimasalinnut apeqqutigineqartussat tassaapput:

1) Nalunaarsugaataareersuni “Innersuartooq”-mik ateqartinneqartoq Jørgen Larsenimilli “Innersuartuut”-nik ateqartinneqartoq,
2) Nalunaarsugaataareersuni “Usuttalik”-mik ateqartinneqartoq Jørgen Larsenimilli Jørgen Reimerimillu “Ussuttalik”-mik ateqartinneqartoq,
3) nalunaarsugaataareersuni “Uperniviup Kangerlua”-nik ateqartinneqartoq Piitannguaq Hansenimilli “Upernaviup Kangerlua”-nik ateqartinneqartoq,
4) nalunaarsugaataareersuni “Equuat”-nik ateqartinneqartoq Piitannguaq Hansenimilli “Equuaaat”-nik ateqartinneqartoq,
5) nalunaarsugaataareersuni Jørgen Reimerimiillu “Kujammut Nuua”-nik
ateqartinneqartoq Emanuel Storchimit Otto Storchimillu “Manermiut Karra”-nik ateqartinneqartoq.

Qulaani taaneqartut fil-imi imatut atilimmiipputtaaq: Autoriseret stednavne_Nanortalik, Qaqortoq, Aasiaat Niaqornaarsuk.xlsm.

4. pillugu

—————————–

Carl Chr. Olsen Lisathe M. Kruse

Siulittaasoq Allatsi