Oqaasiliortut 2010 – 1

OQAA – 140110(gl)

Oqaasiliortut Ataatsimiinnerat sisamanngorneq januaarip 14-ianni 2010 nal. 10.00 Ilimmarfimmi Oqaasileriffiup ataatsimiittarfiani.

Peqataasut: Ellen J.Karlsen, Abia Abelsen, Eva Møller Thomassen aamma Carl Chr. Olsen.
Allatsi Katti Frederiksen

Oqaluuserisat:

1. Tikilluaqqusineq
   Siulittaasoq tikilluaqqusereermat ilisimatitsissutitut nalunaarutigineqarpoq Oqaasileriffik ilinniartumik tiimimmusiaqartussamik ikiortimik pissarsiormat, Inuit nunallu aqqinik sulianik, Oqaasiliortullu suliassaqarfiinik oqilisaaqataasinnaasumik.

   Ordbogilerinermik ilisimasallit Pia Jarvad aamma Jens Erlandsen februaarimi sap.ak. 7-imi tikissapput suleriaqqinnissarlu aaqqissuunneqarluni isumaqatigiissutigineqassalluni.

   Nunavummi oqaatsit pillugit isumasioqatigiisitsinissamut Inuit Language Summit-imik taasamut tunngatillugu qaaqqusissut Oqaasileriffimmiunit aamma peqataaffigineqarnissaa nalunaarutigineqarpoq.

2. Kingullermik imaqarniliap akuerineqarnera – akuerineqarpoq.
3. Oqaatsit minutsimut – KNR Oqaasileriffiullu oqaatsit ataasiakkaat pillugit nassuiaanerit allakaatittalerniarlugit isumaqatigiissutaat Oqaasiliortunit taperserneqarluni tigulluarneqarpoq peqataaffigiumaneqarlunilu. Oqaasiliortunut ilaasortat makkuninnga aallakaatitsinissaminnik toqqaapput:

   Abia: perorsaanermut tunngasut

   Eva ilinniartitaaneq

   Ellen atuakkialerineq

   Puju eqqartuussinermi inatsimmi taaguutit

   Katti oqaasilerineq.

4. Unnuk kulturisiorfik pillugu Oqaasiliortut sammisaqartitsinissamik takorluugaqanngillat, taamaattorli siunnersuutigineqarluni suleriaaseq/misissueriaaseq Oqaasileriffimmi atorneqartoq pillugu, immaqa ullormi tassanerpiaanngikkaluami, nassuiaasoqarsinnaagaluartoq.
5. Bo Nørreslet: Trainerguiden: Tasiorti (16.12.09)

   Kingullermi ataatsimiinnermi trainerguidenimut taaguutissatut aalajangiunneqartoq Ilakannaaq Oqaasiliortunit aalajangiusimaneqaannassasoq oqaatigineqarpoq.

   Tamatumunnga tunngavilersuutigineqarpoq taaguummi Tasiortimi ilinniartitsisoq pineqarmat, aammalu oqaatsip tasiortip imarisaani arlaatigut sapernerusunut, ikiugassaanerusunut pituttoqarnermik paasineqarsinnaammat, Ilakannaamilu inuit marluk akornanni naligiissumik ingiaqatigiinnerat pineqarmat; tassalu apeqqutaanani sorleq pineqarnersoq.

6. Karl C. Kajusen: initoqut/inikequt (20.06.09)
   Apeqqummi matumani oqaatsit taakkua tamarmik arlaatigut atorneqarsinnaaneri unnerneqarpoq, uanili apeqqutaaginnarluni suna (ini imalt. nerrivik)/kina pineqarnersoq. Nerrivik imaluunniit ini tassani apeqqummi aalajangiisuusinnaapput. Assersuutitut taaneqarpoq nerrivik inimi inikilliortitsippat, taava nerrivik tassaassaaq initoqut, kisiannili inimi inikequt.

   Sumiorpaluutit ilaanni oqaatsit taakkua ilaatigut assigiimmik isumalimmik atorneqartartut maluginiarneqarsimavoq, taamaakkaluartorli oqaatsit nagguisiornerini assigiinngequtaat ersertarlutik.

7. Knud Seblon: siunnersuuteqartoq (28.10.09)

   Kalaallisut taaguusernissaannut siunnersuutit assigiinngitsut makkuupput:

   Serviet, Godmorgen, 32, 45, 3 korns rundstykke, 3 korns rundstykker, 3 korns brød, Støvsuger, Bus klippekort, Tandtråd, Kommune aamma Internet.

   Knud Seblon nalunaarfigineqassaaq ordbogini allaqqareersut ulluinnarnilu inuit akornanni atugaareersut attatiinnarneqassammata, kiisalu kisitsisinut tunngasut pillugit, bus klippekortimut, kommune aamma internet pillugit Oqaasiliortut isummereernikuullutik.

8. Michael Petersen: lysbue (11.01.10)

   Oqaasiliortut taaguummut tassunga kalaallisut nutaamik taaguutissamik siunnersuuteqarput: Innaalaneq.

   Taaguutitut siunnersuutip allani atugaannginnera qularnaariarlugu pisortatigut taaguutissatut akuerinissaa isumaqatigiissutigineqarpoq.

9. Allat

   Saaffiginnissut alla:

   Sapaatip-akunnerisa kalaallisut taaguutaannut tunngasumik aperisoq akineqassaaq taaguusiisimanermi sapaat (sabbat) upperisarsiornermut atatillugu taaguutitut aallaavigineqarsimasoq.

   Aallaqqaammut sapaat kisiat ullunit allanit immikkooruteqartutut periarlugu taakkua sapaatit akunneriniittut ullut kisitsisaativut malittariinnarlugit taaguuserneqarsimasut. Taamaattumik ‘eqqortoq’ malillugu sapaatit akunnerannik taaguuteqartussaagunaraluartoq ulluinnarni atuinitsinni oqaatsitut katitatut pissuseqalersimavoq imaalerluni: sapaatip-akunnera.

   Sapaat       ↔       Sapaat

   taakkua akunnerat

Inussiarnersumik inuulluaqqusilluta

Carl Chr. Olsen                                         Katti Frederiksen
Siulittaasoq                                               allatsi