Oqaasiliortut Ataatsimiinnerat tallimanngornermi februaarip tallimaanni 2010 nal. 10.00 Ilimmarfimmi Oqaasileriffiup ataatsimiittarfiani.
Peqataasut: Ellen J.Karlsen, Abia Abelsen, Stephen Heilmann, Eva Møller Thomassen aamma Carl Chr. Olsen.
Allatsi: Katti Frederiksen
Oqaluuserisassatut siunnersuutit:
- Tikilluaqqusineq
Siulittaasup ilisimatitsissutigaa Oqaatsit minutsimut KNR-ikkut aallakaatitassiap aallartilluarsimanera, kiisalu Oqaasileriffimmi sulisut Oqaasiliortunilu ilaasortat aallakaatitassioreeriarpata sinerissamit peqataasussat immiussillutik aallartissinnaanngussasut.
- Kingullermik imaqarniliap akuerineqarnera – akuerineqarpoq.
- Ilisimatitsissutit
Ilitsoqqussaralugu Oqaatsit ulluata Oqaasileriffiup ukiut tamaasa aaqqissuuttalersimasaa ukioq manna aamma pisarnertut aaqqissuuteqqinneqarnissaa nalunaarutigineqarpoq, – tassani qulequtaritinneqassallutik oqaatsinik ilinniarneq nutserisarnerlu.
Nunavumi Inuit oqaasii pillugit isumasioqatigiisitsilluni ataatsimeersuarnissamut kikkut qaaqqusaasimaneri nalunaarutigineqarpoq, tassunga ilaallutik Oqaasileriffi pisortaq aammalu Oqaasiliortunut allatsi. Inuit Language Summit marsip 8-niit 12-ata tungaanut Iqalunni ingerlanneqassaaq.
- Radarimut taaguutitut siunnersuut ’isiginiut’
Oqaasiliortut siunnersuummut akuersaarput, kisiannili taaguutitaap isiginiutip taaguutaareersoq radar mattutissanngikkaa erseqqissaassutigalugu; tassa oqaatsit makkua marloqiusanik taagorneqartut pissuseqatigalugit atorneqarsinnaaqqullugu: qulimiguulik ~ helikoper, oqarasuaat angallattagaq ~ mobil il.il. - Rådhusip kalaallisut taaguutissaa (21.01.10)
Apeqqummi matumani Oqaasiliortut eqqartorpaat kommunip rådhusillu ulluinnarni atuuffii suunersut, taakkualu tunngavigalugit aalajangerneqarpoq rådhus kalaallisut kommuneqarfiup allaffianik taaguuteqalissasoq, tassani kommunalbestyrelsip aalajangersaalluni ataatsimiittarfiattut aamma paasineqassalluni, sinnerili kommunekontorit illoqarfinni allani inissisimasut, tassa immikkut qinikkanit aalajangersaaviunngikkaluartut, kommunip allaffiinik taagorneqassallutik. - Sumiorpaluutit pillugit saaffiginnissut (febr.10)
KNR-imut saaffiginnissut Oqaasileriffimmullu ingerlateqqitaq, sumiorpaluutinik, kiisalu Oqaasileriffiup ingerlanneqarneranut tunngasumik isornartorsiuineq pillugu Oqaasiliortut isumaqarput tammatsaaliineq inuit namminneq attanniartussaagaat, taamaattorli Oqaasileriffiup tungaaniit najoqqutassanik tikkuussinikkut ikiuuttoqarsinnaasoq. Ulloq manna tikillugu Oqaasiliortut (Tunumiusut Avanersuarmiutullu) allattaatsimik pilersitsiniarlutik siunnersuummik tigusaqarneqanngillat.
Ilisimatusarfimmi oqaasilerinermik atuartitsinermi sumiorpaluutit aamma pinngitsooratik sammitinneqartarput, ilinniartullu piumagunik sumiorpaluutinik aalajangersimasunik itisiliillutik samminnissinnaanissaminnut periarfissaqartitaareerlutik.
Saaffiginnittup oqaatsinik sumiorpaluutinillu soqutiginnilluni oqallissaarinera tapersiinnartariaavoq, erseqqissaqqilluguli Oqaasiliortut Inatsisit tunngavigalugit, kiisalu allattaatsimik inatsit 1973-imeersoq malillugu sulimmata. - Allattaatsimik siunnersuuteqartoq (27.01.10)
Kalaallisut allattarnitsinni naqinneq t atortagarput d-mik taarserneqarnissaanik noqqaassuteqarluni siunnersuuteqartoq nassuiaanneqassaaq allattaatsip tunngavii 1973-imeersut malillugit allattaaserput aaqqissugaammat, tassanilu immikkut erseqqissaassutigineqassapput nipisiuinermi ilisarnaatit naqinnerillu atortakkavut immikkooruteqarmata, kiisalu allattaatsitsinni naqinnerup t-p allanngortinneqarnissaa siunertarineqanngimmat, taamaattumik foneminik immikkoorsitsisarneq nassuiaatigineqaannassaaq. - Killiffilersuutinut tunngasoq: kittoraateeraq.
Kalaallisut kittoraateeqqap kittoraatillu atuufii eqqartorneqareerlutik ilisimatitsissutigineqarpoq danskisut killiffilersuutit nutarterneqarlutik allanngortinneqarsimammata kalaallisut killiffilersuutit Oqaasileriffiup suliaa isumaliutissatut eqqarsaatigeqqinneqassasoq, taassumami tunngavigimmagu danskit allattaatsiminni killiffilersueriaasiat. - Tusarniaaneq: Center for Verdens Sprog
Islandimi centerimik pilersitsiniarneq Oqaasiliortunit tunngaviusumik taperserneqarpoq, taamaallaalli uagut nunatsinni suliniutiginiakkatsinnit aallerfiunnginnissaa piumasaqaatitut minnerpaatut tunngaviusariaqarluni, tassami kalaallit oqaasii eqqarsaatigissagaanni taakkununnga ilisimatusarnerit taakkununngalu tunngasunik sullissiniarnerit ullumikkut kipiluttunareersut allanut tunniunnissaat orniginanngimmat.
Inussiarnersumik inuulluaqqusilluta
Carl Chr. Olsen Katti Frederiksen
Siulittaasoq allatsi