Nunat Aqqinik Aalajangiisartut 2010 – 7

NAA.13.10.10

Nunat Aqqinik Aalajangiisartut oktobarip 13-anni 2010-mi Oqaasileriffimmi ataatsimiinnerat

Peqataasut.: Carl Christian Olsen aamma Abia Abelsen. (Taamaattoq Karl Elias Olsen ullormi tassani ataatsimiinnermi siunnersuutaasut pillugit siunnersuutigineqartut pillugit pilertortumik isumaqatigilluinnarlugit akissuteqarmat siunnersuutigineqartut pisortatigoortumik akuerineqarput).
Peqataanngitsut: Stephen Heilmann napparsimagami ataatsimeeqataanngilaq, Tukummeq Qaavigaq-p uiata arnaa toqusimammat aallartussanngorami pisinnaasimanngilaq, kiisalu Karl Elias piffissaarunnini pissutigalugu peqataanngilaq.
Allatsi: Lisathe Møller Kruse.

Oqaluuserineqartut makkuupput:

  1. Tikilluaqqusineq
  2. Imaqarniliap akuerinera (septembarip 24-anni ataatsimiinnermit imaqarniliaq)
  3. Aatsitassanut Ikummatissanullu Pisortaqarfimmiit suliakkiissutit
    • a. Høringsanmodning vedr. ansøgning om efterforskningslicens i Sydgrønland (2011/03)
    • b. Høringsanmodning vedr. ansøgning om speciel efterforskningslicens (2011/04)
    • c. Forespørgsel om navne til eneretstilladelser til efterforskning af olie/gas
  4. Kalluarniarfik (Hans Kruse-mut apeqqutigisaq)
  5. Qeqertarsuup Ilulissallu nunataata akornanniittoq ikkanneq ”Porsild Grund”-imik akuerisatut nalunaarsugaagallartoq
  6. Kangaatsiap eqqaani nunat aqqi nalunaarsorlugit katersukkat, tunumi Illoqqortoormiut avannaani nunat aqqi marluk pissarsiat ilanngullugit
  7. Taasariaqartut allat

1. pillugu

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

2. pillugu

Septembarip 24-anni 2010-mi Nunat Aqqinik Aalajangiisartut ataatsimiinnerannit imaqarniliaq akuerineqarpoq.

3. pillugu

Aatsitassanut Ikummatissanullu Pisortaqarfimmiit saaffiginnissutit Nunat Aqqinik Aalajangiisartunit eqqartorneqareerlutik uku akuerisaasumik taaguutaasussatut aalajangerpaat:

  • a. Fil: ELA 2011-03_kort og koordinater.doc Kuutsiaq (Kujataani Saqqarmiut Timaata avannaaniittoq)

Uani erseqqissarneqassaaq sumiiffiit marluk ataatsimiinnermi immikkut atserneqarsimagaluarmata avannarleq “Qaamasoq”-mik ateqartussatut kujallerlu “Kuutsiaq”-mik ateqartussatut, Aatsitassanulli Pisortaqarfimmiit ataasiinnarmik ateqartussatut aalajangiivigineqareersimammata Nunat Aqqinik Aalajangiisartut siulittaasuata Carl Christian Olsenip sumiiffik pineqartoq “Kuutsiaq”-mik ateqartussatut aalajangerpaa.

  • b. Fil: ELA 2011-04_kort og koordinater.doc Allak (Tunup kujataani Timmiarmiut kujatinnguaniittoq)

c. Fil: Blokinddeling Baffin Bugt udbudsrunde.jpg:

2) Qamut
5) Anu
6) Pitu
8) Napu
9) Tooq
13) Napariaq
14) Ingoraq

Sumiiffiit qulaani pineqartut uuliasiorfissatut gasimillu ujarlernermi misissuivissat Qimusseriarsuup eqqaaniit Qeqertarsuup avannaani Qeqertarsuatsiap kitaanut killipput.

Uuliasiorfissat gasimillu ujarlernermi masissuivissat allat suli saaffiginnissutigineqanngitsunut uku atissatut Nunat Aqqinik Aalajangiisartunit piareersimatinneqarput: Orseq, ilaat, nuluutit, naqitarut, peersaat, tiiarut, iperaataq, suloraq kiisalu taalutaq.

4. pillugu

Kingullermik ataatsimiinnermi Nunat Aqqinik Aalajangiisartut aalajangerpaat nunap aqqa nunaqarfiup Niaqornat ilaaniittoq “Kalluarniarfik” pisortatigoortumik akueritinnagu qanoq isumaqarnersoq paasiniarneqaqqaassasoq.

Niaqarnarmiumut Niaqornat eqqaanni nunat aqqinik suleqatigineqarsimasumut Hans Kruse-mut Kalluarniarfik qanoq isumaqartinneqarluni taamatut ateqartinneqarnersoq paasiniarneqarmat Hans Kruse ima nunap aqqa pineqartoq pillugu nassuiaateqarpoq: “Kalluarniarfik taamanikkut timmiarniarlutik qammavigalugu kalluarniarfigisarsimavaat. Isumaqarpoq allunaasaq ujarattalerlugu timmissat qattaarpata allunaasaq qummut milorujullugu napiariartarlugu. Tassa allunaasaq timmissamut nermunniarsaralugu”.

Nunat Aqqinik Aalajangiisartut nunap aqqa Kalluarniarfik qanoq isumaqartinneqarluni taamatut ateqartinneqarnersoq paasigamikku sumiiffik pineqartoq “Kalluarniarfik”-mik ateqartussatut pisortatigoortumik aalajangerpaat.

5. pillugu

Kingullermik ataatsimiinnermi Nunat Aqqinik Aalajangiisartut aalajangerpaat ikkanneq Porsild Grund Ilulissat Qeqertarsuullu akornanniittoq qallunaatuinnaq pisortatigoortumik ateqartut nalunaarsoqqasoq kalaallisut ateqartinneqarnersoq paasiniarneqassasoq. Ilulissani Aalisartut Piniartullu siulittaasuannut Ove Rosbachimut paasiniarneqarmat paasitinneqarpugut “Poorsilip Ikkannera”-nik taaneqartartoq, aperineqartullu ilanngullugu oqaatigivaa allatut taaneqartoq tusarsimanagu.

Nunat Aqqinik Aalajangiisartut eqqartoreerlugu aalajangerput taanna ikkanneq “Ikkanneq Porsild”-imik pisortatigoortumik ateqassasoq. Nunat Aqqinik Aalajangiisartut tunngavilersuutigivaat Porsildip ikkanneq pineqartoq piginngikkaa, tamannalu pissutigalugu “Poorsilip Ikkanera”-nik pisortatigoortumik ateqartariaqanngitsoq.

6. pillugu

Kangaatsiap eqqaani nunat aqqi nalunaarsorlugit katersukkat, tunumilu Illoqqortoormiut avannaani nunat aqqi marluk pissarsiat Nunat Aqqinik Aalajangiisartunit eqqartorneqanngikkallarlutillu aalajangiivigineqanngikkallarput. Taamatut aalajangernermut pissutaavoq Nunat Aqqinik Aalajangiisartut marluinnaat ataatsimeeqataanerat.

7. pillugu

—————————–

Carl Chr. Olsen Lisathe M. Kruse

Siulittaasoq Allatsi