Inuit Aqqinik Akuersisartut 2010 – 4

IAA – 171110

INUIT AQQINIK AKUERSISARTUT Novembarip 17-ianni 2010, nal. 13.00 ataatsimiinnerannit imaqarniliaq

Peqataapput: Carl Chr. Olsen, Isak Davidsen

Peqataanngilaq: Ellen J. Karlsen.

Imaqarniliortoq: Nuka Møller

Oqaluuserisassat:

1. Tikilluaqqusineq

Siulittaasoq tikilluaqqusivoq, naatsumillu aqqit allamiut oqaasiinit kingoqqisut eqqartutsiarlugit.

2. Kingullermik ataatsimiinnermit imaqarniliat akuerineqarneri

 Imaqarniliaq 041010 ullulerneqarsimasoq akuerineqarpoq.

3. Atit akuereqqullugit qinnutigisat

4. 1. Kiimi – niviarsiaqqat nukappiaqqallu atiattut akuerineqarpoq. Qallunaat Nunaanni aqqit akuerisat nalunaarsorsimaffianni paasineqarmat ersiutaa sivitsuusernagu Kimi niviarsiaqqat nukappiaqqallu atiattut akuerisat akornanniittoq, taanna tunngavigalugu kalaallisut ersiutaa sivitsorlugu atorneqarsinnaavoq.

4. Aqqit pillugit suliat ataatsimiinnerup avataatigut ingerlaavartut.
5. 1. Narti, Avanersuarmiutut Nielsinep taaguutitut atorneqarnera kuissutitut qinnutigineqaraluarmat IAA-mi ilaasortat innersuutigaat taaguutitut atuinnaqqullugu. Palaseqarfimmit ilisimatitsissutigineqarpoq tamannali tusarliunneqanngitsoq kuisitsiniartut taamaassasoq aalajangersimasut.
   2. Aqqit isumaat pillugit apeqqutit: Allatsip ilisimatitsissutigaa ullumi ateq Majaq qanoq isumaqarnersoq saaffiginnissutigineqarsimasoq. Misissorneqassaaq, tassunga atatillugu siulittaasoq ilisimatitsivoq Alaskami aamma atiullunilu kinguliaasoq Avanersuarmiutullu aqqit Alaskami arlaqartut nassaassaasartut, s.i. Tukummeq, Eqilat allallu. Arraq Nunavumiut ilaata apeqqutigisaa ilimatsaannerarpaa /gg/-imik allanneqarsimassagaluartoq. Maalik pillugu saaffiginnissummi aqqit ilaasa ersiutaata sivitsorneqartarnerat mianersuutissaanerarpaa, soorlu aamma Ivalu Iivalumik allanniarneqartartoq. Uliukutuii akissusiarineqarneratut ilimagineqarpoq aqaataassasoq. Ilisimatitsissutigineqarpoq Iluuna suli ilumut Tunumiusuumit naggueqarnersoq nalornissutigineqarallartillugu nittartakkamut ikkunneqassanngikkallartoq, aammalu Anuik kalaallisuik naggueqaqqaarsimanngikkaluartoq kalaallisut nipeqarnera pillugu akuerineqarsimasoq erseqqissaatigineqarpoq.
   3. Aqqit nittartakkamut ikkussuunneqarsimasut annerusumik tusaatissatut tiguneqarput, taamaattoq Suersaq pillugu nassuiaammi ateq pissuseqataa Massagaq (mamisagaq) aamma timitta saatsinniittup aammik pilersuisua taama taaneqartartoq erseqqissaatigineqarluni. Taamatuttaaq ilisimatitsissutigineqarpoq Kunuk Alaskami Canadamilu atiullunilu kinguliaasartoq.

5. Taasariaqartut allat
6. 1. Ilisimatitsissutigineqarpoq Karla Jessen Williamson Oqaasileriffimmut saaffiginnissimasoq aqqit pillugit Ilinniusiorfik suleqatigalugu atuakkiaaqqanik arlaqartunik suliaqalersaarluni. Tassani Oqaasileriffik siunnersortitut inissisimassalluni piareersimasutut akuersaarsimavoq.
   2. Kanku Naak kalaallit aqqattut akuerineqannginnera aalajangiusimaneqaraluartoq, paasisat naapertorlugit Qallunaat Nunaanni aterineqartutut nalunaarsorsimavoq, taamaattoq Qallunaat Nunaanni akuerisaniinnani. Narsami palaseqarfiup/qinnuteqartut Qallunaat Nunaanni Familiestyrelsemut akuerineqaqqullugu qinnuteqaateqarnissaat aalajangiusimaneqarpoq.
   3. Ukiumoortumik nalunaarusiaq. Oqaasiliortut allattaannut piareerlugu tunniunneqartussaavoq januaarip 15-ianni 2011-mi. Decembari qaammat missingersuusiorlugu suliarineqassaaq. Naammasseriarpat ilaasortat qimerluussavaat ilassutissaqassappallu tamakku ikkussorneqarumaarput.
   4. Tulliani ataatsimiinnissaq 2011-mi januaarip aallartinnerani pissasoq siunniunneqarpoq. Annerusumik sammineqassaaq ukiumoortumik nalunaarusiap missingersuusiorneqarnerata qimerlooreerlugu akuerinissaa. Taamaattoq pinartoqartillugu naapeqatigiinnissaq attaveqaqatigiittarnissarlu ammaffigineqarput.

Inussiarnersumik inuulluaqqusilluta

Carl Chr. Olsen, puju                        Nuka Møller

Siulittaasoq                             Aqqit pillugit isumaginnittoq