Nunat Aqqinik Aalajangiisartut 2011 – 2

NAA.10.03.11

Nunat Aqqinik Aalajangiisartut marsip 10-anni 2011-mi Oqaasileriffimmi ataatsimiinnerat

Peqataasut.: Carl Christian Olsen, Abia Abelsen, Stephen Heilmann, Tukummeq Qaavigaq aamma Lotte Holm.
Allatsi: Lisathe Møller Kruse.

Oqaluuserineqartut makkuupput:

1. Tikilluaqqusineq
2. Imaqarniliat akuerineri (2010-mi oktobarip 29-anni, novembarip 5-anni, 12-anni kiisalu novembarip 19-anni 2010-mi ataatsimiinnermit imaqarniliaq aamma januaarip 3-anni 2011-mi ataatsimiinnermit imaqarniliaq)
3. Aatsitassanut Ikummatissanullu Pisortaqarfimmiit suliakkiissutit
   • i. Frants Torp Madsenip saaffiginnissutai
     1. 2011/28
     2. 2011/32
   • ii. Benjamin Esberg Greve
     1. 2011-40.pdf (Illoqqortoormiut kitaaniippoq)
     2. 2011-39.pdf (Qaanaap eqqaaniippoq)
4. Sirkka Paikkalap saaffiginnissutai
   • i. Cape Morris Jesup (English) / Kap Morris Jesup (Danish)
   • ii. Atlantic Ocean (English) / Atlanterhavet (Danish)
5. Kangaatsiap eqqaani nunat aqqi nalunaarsukkat akuerineqanngikkallartut akuerinissaat
6. Tyskip Kai Maluckip Tunumi “Kangertivartikajik”-up eqqaani sumiiffiit aalajangersimasut atissaannik siunnersuutai
7. Taasariaqartut allat

1. pillugu

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

Ataatsimiinnerullu aallartivinnginnerani CCO-p nassuiaatigivaa Nunat Aqqinik Aalajangiisartunngortut toqqarneqaqqammermata ataatsimiinnerlu siulliummat siulittaasussamik siulittaasullu tullissaannik toqqaasoqassasoq.

Siulittaasutut toqqarneqarpoq Carl Christian Olsen, siulittaasullu tulliattut Abia Abelsen toqqarneqarluni.

2. pillugu

Januaarip 3-anni 2011-mi Nunat Aqqinik Aalajangiisartut ataatsimiinnerannit imaqarniliaq akuerineqarpoq.

Ilanngullugu 2010-mi oktobarip 29-anni, novembarip 5-anni, 12-anni kiisalu novembarip 19-anni Nunat Aqqinik Aalajangiisartut ataatsimiinnerannit imaqarniliaq akuerineqarportaaq. Ataatsimiinnerup siuliani imaqarniliaq pineqartoq akuerineqanngikkallarneranut pissutaavoq, allatsi napparsimanera pissutigalugu peqataannginnera.

3. pillugu

Aatsitassanut Ikummatissanullu Pisortaqarfimmiit saaffiginnissutit Nunat Aqqinik Aalajangiisartunit eqqartorneqareerlutik uku akuerisaasumik taaguutaasussatut aalajangerpaat:

Frants Torp Madsenip saaffiginnissutai

1. 2011/28 Qaqqartooq
2. 2011/32 Nannunniarfik

Benjamin Esberg Greve-p saaffiginnissutai

1. 2011-40.pdf (Illoqqortoormiut kitaaniippoq) Ikerasaat

2. 2011-39.pdf (Qaanaap eqqaaniippoq) Kangerluarsuup Timaa

4. pillugu

Finlandimiup Sirkka Paikkalap nunat aqqi saaffiginnissutai marluk Nunat Aqqinik Aalajangiisartunit eqqartorneqartut tassaapputtaaq:

1. Cape Morris Jesup (English) / Kap Morris Jesup (Danish)
2. Atlantic Ocean (English) / Atlanterhavet (Danish)

Nunat Aqqinik Aalajangiisartut nunap aqqa Kalaallit Nunaata avannarpasinnerpaaffianiittoq nuujusoq pisortatigoortumik “Kap Morris Jesup”-imik ateqartoq allanngortinnagu taamatut ateqartiinnarpaat.

Saaffiginnissutip aappaani Atlanterhavet kalaallisut ateqarnersoq apeqqutigineqarpoq. Nunat Aqqinik Aalajangiisartut nalornissutiginagu “Atlantikoq”-mik ateqassasoq aalajangerpaat. Taamatut aalajangernerannut pissutaavoq ulluinnarni Atlantikoq imartarujussuarmut pineqartut atitut nalinginnaasumik atorneqalereernikuummat.

5. pillugu

Kangaatsiap eqqaani nunat aqqi 2010 aasaagaa nalunaarsukkat Nunat Aqqinik Aalajangiisartut novembarimi 2010-mi ataatsimiinnerminni akuerinngikkallagaat ataatsimiinermi uani eqqartorneqarlutillu aalajangiivigineqarput.

Attormiumut Jens Filemonsenimut apeqqutigineqartut ukuupput:

– “Aligik”-mik ateqartutut nalunaarsugaataareersoq Attormiullu “Aligioq”-mik

ateqartutut naqqiissutaat Aligormit aallaaveqarnersoq Jensimut paasiniarneqarpoq. Ajoraluartumik Jensip nunap aqqa pineqartoq sumit aallaaveqarnersoq ilisimanngilaa,

ilimagaluguli Aligoqarsimanera pissutigalugu Aligioq-mik taaneqartartoq. Nunat Aqqinik Aalajangiisartut pineqartoq eqqartoreerlugu “Aligoq”-mik pisortatigoortumik ateqassasoq aalajangerpaat.

– Nunap aqqa Aki kangerliumanertut nalunaarsugaatigisaq Nunat Aqqinik Aalajangiisartunit ippigineqarmat qeqertavittaa ateqarnersoq Jensimut paasiniarneqarpoq. Pineqartoq Jensimut apeqqutigineqarpat Jensip nassuiaatigivaa kangerliumarnup pineqartup sineriaa imaanut atasumik innaaqqissuusoq, nassuiaatigalugulu soorlugooq akinnatut isikkoqarluni. Nunat Aqqinik Aalajangiisartut pineqartoq eqqartoreerlugu kangerliumarnup atia allanngortinnagu “Aki”-mik ateqassasoq aalajangerpaat.

– Nalunaarsugaataareersuni “Aleqarsua”-mik ateqartinneqartoq attormiunit Anton

Inuusuttumillu naqqiissutigineqarluni “Aleqasua”-mik ateqartinneqartoq pillugu Nunat Aqqinik Aalajangiisartut naqqiissuteqartunut apeqqutigerusussimavaat sooq “Aleqasua”–mik taaneqartarnersoq. Sooq “Aleqasua”-mik taaneqartarnersoq Jensimut apeqqutigineqarmat Jensip nassuiaatigivaa nammineq kangerluk pineqartoq Aleqasua Tununngasormiunit ilikkagaralugu, tassamigooq nunarsuarimmassuk nammineq Tununngasormiut upperigamigit. Nunat Aqqinik Aalajangiisartut pineqartoq eqqartoreerlugu “Aleqasua”-mik ateqalissasoq aalajangerpaat.

– Julius Jeremiassenimut Niaqornaarsummiumut apeqqutigineqartut ukuupput:

– Nalunaarsugaataareersuni “Ilagisuusaakkat Qeqertaa”-nik ateqartinneqartoq

Juliusimit “Qerrussap Qeqertaa”-nik ateqartutut naqqiissutigineqarpoq. Nunat Aqqinik Aalajangiisartut Juliusimut apeqqutigerusussimavaat pineqartup eqqaani nunamik “Qerrussat”-nik ateqartoqarnersoq. Juliusip nassuiaatigivaa eqqaani qerruinnik ersittoqanngitsoq, qerrualuilli kitaatungaani takussaasut. Taakkugooq ateqaatigisinnaavaat. Juliusip nassuiaatigivaattaaq Ikamiormiut tamaavimmik qeqertaq pineqartoq “Qerrussap Qeqertaa”-nik ateqartikkaat. Nunat Aqqinik Aalajangiisartut pineqartoq eqqartoreerlugu “Qerrussap Qeqertaa”-nik ateqalissasoq aalajangerpaat.

– Nalunaarsugaataareersuni “Ilagisuusaakkap Tasersua”-nik ateqartinneqartoq

Juliusimit “Qerrussap Tasersua”-nik ateqartutut naqqiissutigineqarpoq. Nunat Aqqinik Aalajangiisartut Juliusimut apeqqutigerusussimavaat pineqartup eqqaani nunamik “Qerrussat”-nik ateqartoqarnersoq. Juliusip nassuiaatigivaa eqqaani qerruinnik ersittoqanngitsoq, qerrualuilli kitaatungaani takussaasut. Taakkugooq ateqaatigisinnaavaat. Juliusip nassuiaatigivaattaaq Ikamiormiut tamaavimmik taseq pineqartoq “Qerrussap Tasersua”-nik ateqartikkaat. Nunat Aqqinik Aalajangiisartut pineqartoq eqqartoreerlugu “Qerrussap Tasersua”-nik ateqalissasoq aalajangerpaat.

– Nalunaarsugaataareersuni “Sarfarsuup Niaqunaa”-nik ateqartinneqartoq Juliusimit

“Niaqunaa”-nik ateqartutut naqqiissutigineqarpoq. Nunat Aqqinik Aalajangiisartut Juliusimut apeqqutigerusussimavaat Niaqunaa niaqornarmit aallaaveqarnersoq. Juliusip nassuiaatigivaa pineqartup portunerunera niaqunganeralu pissutigalugu taamatut atserneqarsimasoq. Nunat Aqqinik Aalajangiisartut pineqartoq eqqartoreerlugu “Niaqunaa”-mik ateqalissasoq aalajangerpaat.

– Nalunaarsugaataareersuni “Sarfannguup Niaqunaarua”-nik ateqartinneqartoq

Juliusimit “Niaqunaarua”-nik” ateqartinneqartutut naqqiissutigineqarpoq. Nunat Aqqinik Aalajangiisartut Juliusimut apeqqutigerusussimavaat Niaqunaarua niaqornarmit aallaaveqarnersoq. Juliusip nassuiaatigivaa pineqartup portunerunera niaqunganeralu pissutigalugu taamatut ateqartoq. Nunat Aqqinik Aalajangiisartut pineqartoq eqqartoreerlugu “Niaqunaarua”-nik ateqalissasoq aalajangerpaat.

6. pillugu

Tyskip Kai Maluckip Tunumi “Kangertivartikajik”-up eqqaani sumiiffiit aalajangersimasut tunumiusut atserusutani siunnersuutigalugit Oqaasileriffimmut saaffiginnissutigai. Nunat atserusutai 23-usut Nunat Aqqinik Aalajangiisartunit eqqartorneqarput. Nunat Aqqinik Aalajangiisartut aalajangerpaat nunat aqqi siunnersuutigineqartut suliarineqanngikkallarlutillu aalajangiivigineqanngikkallassasut. Taamatut isummernerminnut pissutigivaat Tunumi nunat aqqinik nalunaarsuiartortoqartussaanera, ilimanaateqarluarsinnaammammi sumiiffiit atserusutai tunumiunit uagut ilisimanngiinnakkatsinnik qangarsuaaniilli ateqartinneqareersut.

Taamaattumik nunat aqqinik atseerusulluni siunnersuuteqartoq Kai Maluck allaffigineqassaaq nunat aqqinik nalunaarsuiartortoqareerpat aatsaat nunat aqqi siunnersuutai aalajangiivigineqarumaartut.

7. pillugu

—

Carl Chr. Olsen Lisathe M. Kruse

Siulittaasoq Allatsi