Nunat Aqqinik Aalajangiisartut marlunngorneq oktobarip 4-anni 2011-mi Oqaasileriffimmi ataatsimiinnerat
Peqataasut.: Carl Christian Olsen, Stephen Heilmann, Abia Abelsen aamma Lotte Holm.
Peqataanngilaq: Tukummeq Qaavigaq, Nuummiinnginnini pissutigalugu.
Allatsi: Lisathe Møller Kruse.
Oqaluuserineqartut makkuupput:
- Tikilluaqqusineq
- Imaqarniliap akuerisassatut saqqummiunnera (septembarip 15-anni 2011-mi ataatsimiinnermit imaqarniliaq)
- Aatsitassanut Ikummatissanullu Pisortaqarfimmiit saaffiginnissutit
- i. Stednavn 2012-01.pdf (Tunup avannaani Scoresby Landip kangia)
- ii. Stednavn 2012-02.pdf (Tunup avannaani Traill Ø-miippoq)
- Itillip avannaaniittoq imatut ateqartutut nalunaarutigineqarsimasoq
- i. Ivissuartuunnguaq (siornatigut nalunaarsuinermeersoq), Ivissuartuunnguit (David Johansen), Ivissuartunnguaq (Geertheeraq Dahl).
- Ivittuut avannaatunginnguaniittoq kangerlummi “Eqaluit”-nik atilimmiittoq qeqertaq “Eqaluit Qeqertaat”-nik ateqartutut nalunaarutigisaq
- Taasariaqartut allat
1. pillugu
Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.
2. pillugu
Septembarip 15-anni 2011-mi ataatsimiinnermit imaqarniliaq akuerineqarpoq.
3. pillugu
Aatsitassanut Ikummatissanullu Pisortaqarfimmiit saaffiginnissutit Nunat Aqqinik Aalajangiisartunit eqqartorneqareerlutik uku akuerisaasumik taaguutaasussatut aalajangerpaat:
- i. Stednavn 2012-01.pdf Itinneq
(Tunup avannaani Scoresby Landip kangia)
- ii. Stednavn 2012-02.pdf Innaaqqik
(Tunup avannaani Traill Ø-miippoq)
4. pillugu
Itillip avannaaniittoq qeqertaq ataatsimiinnermi kingullermi akuerineqanngikkallartoq pillugu nunat aqqinik ilisimasallit LMK-mit paasiniaaffigineqarput.
David Johansen nammineq naliliinera malillugu Assaqutarmiuusoq nassuiaavoq qeqertat imminnut qanillutik marluusut, “Ivissuartuunnguit”-nillu ateqartut. Geertheeraq Dahlili Itillermiu nassuiaavoq qeqertaq ataasiinnaasoq avannaatungaaniittorlu ikkarluinnaq ivigaqanngitsoq, taamaattuminngooq “Ivissuartunnguaq”-mik ateqartoq. Meeraallutilligooq taamatut taaneqartarpoq.
Nunat Aqqinik Aalajangiisartut nunat aqqinik ilisimasallit nassuiaanerat naapertorlugu qeqertaq pineqartoq pisortatigoortumik “Ivissuartunnguaq”-mik ateqartussatut aalajangerpaat. Taamatut aalajangernerminni Geertheeraq Dahlip Itillermiup qeqertamut qaninnermi peroriartorsimanera, nassuiaataatalu erseqqinnerunera pillugu taamatut aalajangiipput.
5. pillugu
Aalisarnermut Naalakkersuisoqarfimmi atorfilik Jan Ole Pedersen Oqaasileriffimmut saaffiginnissuteqarpoq ileqqoreqqusat nutarterneqalerneri pillugit Ivittuut eqqaani eqalunniartarneq pillugu ileqqoreqqusamiittut nunat aqqi eqqortuunersut misissoqqullugit.
LMK misissuereernermini nunap aqqa ataaseq “Eqaluit Qeqertaa” ileqqoreqqusamiittoq nunalli aqqinik nalunaarsugaatitsinniinngitsoq siumorpaa. Tamanna pillugu Arsummi nunat aqqinik ilisimasallit paasiniaaffigai, paasillugulu qeqertaq pineqartoq Ivittuut avannannguaniittoq “Eqaluit Qeqertaat”-nik taaneqartartoq. Tunngavilersuutit aalaavigalugit Nunat Aqqinik Aalajangiisartunit qeqertaq pineqartoq pisortatigoortumik “Eqaluit Qeqertaat”-nik ateqartussatut aalajangerneqarpoq.
6. pillugu
Lotte Holmip tunumi nunat aqqi nalunaarsugai qaqugu ataatsimiissutigineqarumaarnersut pillugit LMK-p Nunat Aqqinik Aalajangiisartut eqqarsarfissippai, oqarfigalugillu qaqugu pisinnaanerlutik paaseriarunikku nalunaaginnarumaartut.
Nunat Aqqinik Aalajangiisartut tunumi nunat aqqi pillugit oqallillualaavipput, annermik eqqartorlunikku allattaaseq qanoq ittoq tunngavigineqassanersoq. NAA-mi ilaasortat siunniuppaat tunumi nunat aqqi eqqartorlugillu akuerineqannginnerini aalajangersaanissaminnut tunngavissanik peqqissaartumik aalajangersueqqaarumaarlutik.
—————————–
Carl Chr. Olsen Lisathe M. Kruse
Siulittaasoq Allatsi