Ujarlerit

Inuit Aqqinik Akuersisartut 2012 – 2 (gl)

IAA – 190612 (gl)

Inuit Aqqinik Akuersisartut 19/06-2012, nal. 10.00 Oqaasileriffimmi ataatsimiinnerannit imaqarniliat

 

Peqataasut:      Sofie Petersen, Eva Møller Thomassen, Lotte Holm.

Allatsi:            Nuka Møller

 

  1. Tikilluaqqusineq ilisimatitsissutillu

Siulittaasoq tikilluaqqusivoq. Takuuk immikkoortoq 4.

  1. Kingullermik ataatsimiinnermit imaqarniliat akuerineqarneri

Imaqarniliat akuerineqarput. Immikkoortoq 4-miittoq quppersagaliornissamut tunngasoq suliaq ingerlaqqiinnassasoq aalajangerneqarpoq.

  1. Atit akuereqqullugit qinnutigisat:
    1. Sanak/Sarnaq? (3/2)
      Suli misissoqqinneqassasoq aalajangerneqarpoq.
    2. Iija (Ea) – (29/3)
      Aalajangeriigaq attatiinnarneqassaaq: Iia.
    3. Alunnguaq (11/4) ♀♂
      Akuerineqarpoq Alu akuerisaneereermat.
    4. Baabi (23/4)
      Paapi akuerineqarpoq.
    5. Kaannguaq (12/06) ♀♂
      Ippigineqarmat misissoqqinneqassasoq aalajangerneqarpoq qinnuteqartup tunngavilersuutaa paasiniarlugu. Siunnersuutigineqarpoq atsiussinermi kuissutaa Kristian atsiuteriarlugu taaguutaa taaguutaannartut atoqqullugu.
    6. Meera (12/06) ♀♂
      Akuerineqarpoq.
    7. Missiia/Messia (12/06)
      Akuerineqanngilaq.
    8. Bibeane (14/06)
      DK-mi akuerisaniipput taamaallaat Bebiane aamma Bibiane. Ataatsimiinnerup kinguninngua qinnuteqartoq ilisimatitsivoq Bebiane toqqarsimallugu.  
  1. Ilisimatitsissutit – Aqqit pillugit suliat ataatsimiinnerup avataatigut ingerlasut.

Isumaa: Inequnaaluk (26/2), Qaavigarsuaq (6/3), Miilu (9/3), Natuk (12/3), Qaavigarsuaq (22/3), Aischa (11/4), Regine (17/4), Avaaraq (17/4), Ukkana (1/5), Amaalik (3/5), Esta, Seba, Maqe (25/4), Alliaq (10/5), Inuik (16/5), Jaden (21/5),

Allattaaseq: Knud/Kunuuti/Kunuk? 20/2, Amaulik/Amaalik (22/3), Qimugsserâq/Qimusseraaq (3/4), Aaqqatissaq (20/4),

Akuerisat: Mandix (DK 11/4), Tarqik (12/4), Denzel (DK 27/4), Anthoria (DK 9/5), Niviaaja (12/6), Panu (15/6), Sialuk (15/6),

Akuerisaanersoq: Rio (9/3), Nuunooraq (11/4), Juupi/Job (30/4), Aliana/Aliaana (21/5), Axline (30/5), Nanoq (6/6),

Inatsisinut tunngasut: Vicebiskopip kaajallaasitaa 1986-imeersoq suli atuunnersoq (22/3)

Tusaatissatut tiguneqarput.

  1. Taasariaqartut allat
    1. Allattaasoq ilisimatitsivoq maajip 18-ianni arnat atuagassiaannut ARNANUT-mut atsiisarneq pillugu paasissutissanik noqqaavigineqarsimalluni taakkuninngalu quppernerullu affaanik takissusilimmik nassiussisimalluni.
    2. IAA-mit aqqit akuerisat kingulliit ilanngullugit sineriammi ilagiinnik sullissisut maajip 11-anni e-mailikkut 2007-ip kingorna nalunaarsukkanik nassiussorneqarsimapput.
    3. Allattaasoq juunip 6-ianiit 9-ianut Askov Højskolemi Nunani Avannarlerni nunat inuillu aqqit pillugit ataatsimeersuarnermi Nunatsinni nunat inuillu aqqit pillugit Oqaasileriffimmi suliat saqqummiuttussaallugit nalunaarpoq.
    4. Siulittaasup atitut akuereqqullugu qinnuteqaat Panilla apriilip 18-anni sumut killinnersoq paasiniaqquaa. Palaseqarfik Nuummut paasiniaareernerup kingorna Familiestyrelsemiit ilisimatitsissutigineqarpoq juunip 27-anni ilisimatitsissutigineqarpoq qinnuteqaat akuerineqanngitsoq.
    5. Ataatsimiittarnerit aalajangiisarnerillu qanoq iluseqassanersut eqqartorneqarpoq, e-mailikkut imalt. ataatsimiigiartarnikkut pisassanersut, taamaattoqassappallu ataatsimiinnermusiaqartarneq agguaqatigiisillugu aqqit sisamat aalajangiiffigneqareeraangata nassiunneqartassanersut eqqartorneqarluni.
    6. Ukiuni kingullerni aqqit isumaat pillugit saaffiginnittartut amerlassusii pissutigalugit akissusiat aaqqissuuteqqillugit naalisarlugillu kalaallisuumut, qallunaatuumut tuluttuumullu nutseriarlugit, akuerisallu nalunaarsukkat sinneruttut isumaat tamakkerniarsaralugit saqqummiunneqassasut siunniusimaneqarpoq. Oktobari qaammat killiffik naapertorlugu nalilersuisoqareerpat, qaqugorpiaq naqitanngorlugit saqqummersineqassanersut nalilersueqqittoqassasoq allattaasoq nalunaaruteqarpoq.

 

Inussiarnersumik inuulluaritsi

Nuka Møller
allatsi