Nunat Aqqinik Aalajangiisartut 2013 – 6

NAA.15.10.13

Nunat Aqqinik Aalajangiisartut

Marlunnngorneq oktobarip 15-anni 2013-mi  Oqaasileriffimmi ataatsimiinnerat

 

Peqataasut.: Carl Christian Olsen, Tukummeq Qaavigaq, Abia Abelsen, Karl Møller aamma Stephen Heilmann.

Allatsi: Lisathe Møller Kruse

 

1. Tikilluaqqusineq
2. Imaqarniliap akuerisassatut saqqummiunnera (juunip 28-anni 2013-imi ataatsimiinnermit imaqarniliaq)
3. Aatsitassanut Ikummatissanullu Pisortaqarfimmiit saaffiginnissutit
   1. Høring: Anmodning om stednavn, 2014/01.pdf (Narsarsuup timaaniittoq tatsip Motzfeldip Tasiata kangiatungaaniittoq)
   2. Stednavnenævn – høring.pdf (Ukkusissat eqqaanniittoq)
   3. Stednavnenævn – høring(1).pdf (Uummannap Ilulissallu akornanniittup Nuussuup ilaani Marraap timaanniittoq)

4. Savaateqarfiit aqqi suli Nunat Aqqinik Aalajangiisartunit akuerineqanngitsut
   1. Kiattuut (savaateqarfik)
   2. Qaqortukulooq (savaateqarfik)
   3. Qorlortukasik (savaateqarfik)
   4. Eqaluit Qinnguat à Eqaluit Akia (Aqqalooraq Frederiksen)

5. Nunat aqqi naqqiissutit akuerititassat
   1. Erngata Qaqqaa à Ermata Qaqqaa (Narsarsuup kangerluata qinnguata timaaniittoq)
   2. Erngata Tasia à Ermata Tasia (Narsarsuup kangerluata qinnguata timaaniittoq)
   3. Erngata Tasia Qulleq à (Narsarsuup kangerluata qinnguata timaaniittoq)
   4. Erngata Kuua à Ermata Kuua (Narsarsuup kangerluata qinnguata timaaniittoq)
   5. Arnannguit Qaavat à Annannguit Qaavat (Savaateqarfiup Annannguit timaaniittoq qaqqaq)
   6. Isortoq tunumiittoq nunaqarfik, Sisimiut Isortuat, Isortoq maniitsup kujataaniittoq kangerluk.

6. Nunat aqqi Nunat Aqqinik Aalajangiisartunit suli akuerineqanngitsut
   1. Kap Biot à Innaaqqinneq (suli kalaallisut atia akuerisaniinngimmat)
   2. Tunup kujataani inoqarfikoq Kuutseq nalunaarsugaatiginngisap akuerinissaa. Kuutsit Kangerluata paavani qeqertamiippoq.
   3. Tunu à Nunatta Kangia (Justus Hans à Arnakkuluk Jo Kleistimut suliakkiissutaa)
   4. Ellesmere Island à Akilineq, Umimmaat Nunaat tunorsuaniipporooq. Taamanngooq taasarpaat sumiiffik pineqartoq umimmaqartarmat. (Taama e-mailerluni nassuiaavoq Hivshu)

7. Taasariaqartut allat

Paasissutissiineq: Narsaq Kujalliup akianiittoq nunaqarfiusimasoq Ikigaat qallunaatsiaqarfikuusimavoq, ateqartinneqarsimalluni Herjolfsnæs.

 

1. pillugu –

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq. Karl Møllerilu Lotte Maré Holmip tunuarnerata kingunerisaanik ilaasortanngortoq tikilluaqquaa.

 

2. pillugu –

Juunip 28-anni 2013-mi ataatsimiinnermit imaqarniliaq akuerineqarpoq.

 

3. pillugu –

Aatsitassanut Ikummatissanullu Pisortaqarfimmiit saaffiginnissutit Nunat Aqqinik Aalajangiisartunit eqqartorneqareerlutik ima akuerisaasumik taaguuteqartussatut aalajangerneqarput:

 

• • Høring: Anmodning om stednavn, 2014/01.pdf Qooqqup Timaa
    (Narsarsuup timaaniittoq tatsip Motzfeldip Tasiata kangiatungaaniittoq)

• • Stednavnenævn – høring.pdf Innerit
    (Ukkusissat eqqaanniittoq)

• • Stednavnenævn – høring(1).pdf  Ujarattuut
    (Uummannap Ilulissallu akornanniittup Nuussuup ilaani Marraap timaanniittoq)

 

4. pillugu –

Savaateqarfiit aqqi suli Nunat Aqqinik Aalajangiisartunit akuerineqanngitsut pingasut Nunallu Aqqinik Aalajangiisartut nalunaarsugaatigileqqamisaat akuerineqartut ukuupput:

1. 1. 1. Kiattuut
      2. Qaqortukulooq
      3. Qorlortukasik

Savaateqarfik Eqaluit Qinnguat Nunat Aqqinik Aalajangiisartut nalunaarsugaataaniittoq akuerisaasorlu Savaatillit Siunnersuisoqatigiivinit naqqiissuteqarfigineqarpoq ”Eqaluit Akia”-nik ateqartoq nassuiaallutik. Nunat Aqqinik Aalajangiisartut savaateqarfik pineqartoq ima ateqartussatut aalajangerpaat Eqaluit Akiat.

 

5. pillugu

Nunat aqqi naqqiissutaasut Nunat Aqqinik Aalajangiisartunit allanngortinneqarlutik akuerineqartut ukuupput:

 

Siornatigut akuerisaq nalunaarsukkamiittorlu	Allannguut akuerisaq
Erngata Qaqqaa	Ermata Qaqqaa
Erngata Tasia	Ermata Tasia
Erngata Tasia Qulleq	Ermata Tasia Qulleq
Erngata Kuua	Ermata Kuua
Arnannguit Qaavat	Annannguit Qaavat
Arnannguit Saqqaa	Annannguit Saqqaat
Sisimiut Isortuat	Isortoq

 

6. pillugu

Nunat aqqi Nunat Aqqinik Aalajangiisartunit suli akuerineqanngitsut naqqiissutillu saaffiginninnikkut naqqiissutaasimasut Nunat Aqqinik Aalajangiisartunit eqqartorneqarput.

 

1. 1. Jens Napaattooq Oqaasileriffimmut sianerpoq raatiukkut aallakaatitami Kap Biot tunumiusut taaguuteqarnersoq nalornerpalullugu. Jens Napaattooq nassuiaavoq kangeq pineqartoq “Innaaqqinneq”-mik ateqartoq. Nunat Aqqinik Aalajangiisartut aalajangerpaat uppernarsarluariarlugu Nunat Aqqinik Aalajangiisartunut akuerisassanngortikkumaartoq.
   2. Tunup kujataani inoqarfiusimasoq nunat aqqinik nalunaarsugaatiniinngitsoq Kuutseq Nunat Aqqinik Aalajangiisartunut akuerisassanngortinneqarpoq. Nunat Aqqinik Aalajangiisartut inoqarfiusimasoq Kuutseq akuerivaat pisortatigoortumik atiussasoq akuerivaat.
   3. Kommuneqarfik Sermersuumi kommunalbestyrelsimut ilaasortap nunap aqqa Tunu ilaasortaaqatiminut saqqummiussimavaa ima ateqartussatut allanngortinneqarnissaa siunnersuutigalugu Nunatta Kangia. Tamatuma kingorna Arnakkuluk Jo Kleist Oqaasileriffiup oqarasuaataanut sianerluni saaffiginnissimavoq apersorluni taamatut kikkut allanngortitsisuusinnaanersut, qanoq isiortoqartarnersoq qanorlu isumaqarnersugut. Suliassaq taanna Oqaasileriffimmi sulisup Katti Frederiksenip Nunat Aqqinik Aalangiisartunut ingerlateqqippaa. Nunat Aqqinik Aalajangiisartut aalajangerpaat suleqatigiissitalianut suleqatiserinninnermik imalimmik Oqaasileriffik allagaqassasoq.
   4. Qaanaarmiu Sverigimi najugalik Hivshu Oqaasileriffimmut saaffiginnippoq nassuiaalluni Ellesmere Island “Akilineq”-mik ateqartoq,” Umimmaat Nunaat”-nillu ateqanngitsoq. Nunanngooq taassuma tunorsuaniippoq “Umimmaat Nunaat”-nik ateqartinneqartoq. Umimmaanngooq nunap taassuma tunorsuani nunaqarmata.

Nunat Aqqinik Aalajangiisartut aalajangerpaat Hivshu allaffigineqassasoq Kalaallit Nunaata avataaniittut nunat Nunat Aqqinik Aalajangiisartunit akisussaaffigineqanngitsut. Nuna naqqiissuteqarfigisaa Canadamiimmat paasissutissaq Canadamiunut ingerlateqqinneqassasoq ilanngullugu kalerriutigineqassaaq.

 

6. pillugu

Taasariaqartuni Nunat Aqqinik Aalajangiisartunut allatsi Lisathe Møller Kruse paasissutissiivoq Narsaq Kujalliup akianiitoq nunaqarfiusimasoq Ikigaat, “Herjolfsnæs”-imik ateqartinneqarnikuusimasoq, taannalu nalunaarsugaatini paasissutissatut toqqortaalersoq.

 

Carl Chr. Olsen             Lisathe M. Kruse

Siulittaasoq                               Allatsi