Oqaasiliortut ataatsimiinnerat pingasunngorneq, maajip 7-anni 2014, nal. 10.00
Oqaasileriffimmi.
Peqataasut: Carl Chr.Olsen, Eva M.Thomassen, Stephen Heilmann, Karl Møller aamma Katti Frederiksen.
Allatsi: Katti Frederiksen
Oqaluuserisassatut siunnersuutit:
- Tikilluaqqusineq aamma ilisimatitsissutit.
Siulittaasoq tikilluaqqusivoq, oqaatigalugulu Naalakkersuisut Eqqumiitsuliornermut Piorsarsimassutsimullu Periusissiaa 2014-imiit 2017-imut atuuttussaq pillugu isumasioqatigiissitsinerannut peqataasimalluni. Isumasioqatigiinneq ullaakkut 9.00-miit unnukkut 22.00 tungaanut ingerlanneqarsimavoq. Taamatuttaaq peqataasimavoq SH, taakkualu marluullutik oqaatigaat isumasioqatigiinnermi isummat allagartalersuinermut tunngasutigut, aammalu allagaatit pingaarutillit kalaallisut allaqqasarnissaannut tunngasutigut isumalluarnartoqarpasissoq. Partiit tamarmik peqataatitaqarsimaneri aammalu isummanut saqqummiunneqartunut akerliusimannginneri oqaatigaat.
Aappaattut ilisimatitsissutigineqarpoq Robobraillekkut qarasaasiaq atorlugu kalaallisut atuffassissummik suliaqarnermi ingerlatsisuutit uge 34 tikinnialikkersaartut, tassani workshopip ingerlanneqarnissaanut Oqaasileriffik suliamik nalilersuisutut aammalu suliamik malinnaasutut inissisimanermigut peqataatitaqarnissaa siunertaavoq.
- Kingullermik ataatsimiinnermit imaqarniliap akuerineqarnera.
Imaqarniliaq ataatsimiinnermit 2.apriilimeersoq akuerineqarpoq, taaguutissatulli akuerisimasaq ataasinnguaq allanngortinneqassasoq aalajangiunneqarluni. Saaffiginnissut g-mik nalunaaqutsigaq tassani pineqarpoq, tassalu danefæ, imaqarniliami eriagisassat itsarnissat (sanaat)-nik taaguuserneqartoq imaalillugu aalajangiiffigineqarpoq: inuiaat eriagisassaataat - Saaffiginnissutit.
a. Naalakkersuisoqarfimmi taaguutit
Kingullermik ataatsimiinnermit Naalakkersuisoqarfimmi taaguutit aalajangiussat pillugit saaffiginnittup qisuariarnera tunngavigalugu Oqaasiliortunut makkua suliassanngortinneqaqqipput: dømmende magt, udøvende magt, lovgivende magt aammalu generalsekretær. Ataatsimiinnermi matumani taakkua ima siunnersuusiorfigineqarput:dømmende magt – eqqartuussisussaatitaaneq
udøvende magt – inatsisinik atuutsitsisussaatitaaneq
lovgivende magt – inatsisiliortussaatitaaneq
generalsekretær kalaallisut atorfillit qullersaannik siunnersuusiorfigineqarpoq, atorfiilli taaguutaasa misissuataareerneranni paasinarsivoq funktionschef kalaallisut taamak taaguusereerneqarsimasoq, taamaattumillu generalsekretær asseqqissaanik taaguusissallugu naapertuutinngimmat ataatsimiinnerup tullissaani siunnersuusiorfigineqarnissaa siunniunneqaannarpoq.b. Serviceassistancep kalaallisut taaguutissaa pillugu Campus Kujalliup saaffiginnissutigisaa ima taaguuteqassasoq Oqaasiliortunit aalajangiiffigineqarpoq:
Kiffartuussinissamik Ilinniarneq.
Tassani ilinniakkap imarisaa tunngavigalugu taamatut siunnersuuteqarput, malugalugu immikkut assistent, ilaatigut ikiortimik nutserneqartartoq, atornagu tamakkiinerusumik ataatsimut taaguusiimmata.
Soorluttaaq aamma kontorassistent tassaaginnartoq allaffimmiu.c. Peqqinnissaqarfinni taaguutit aalajangersimasut pillugit saaffiginnittoqarpoq.
Taaguutit makkua danskisut allassimasut qanoq kalaallisut pisortatigut taaguuteqarneri eqqartorneqarput:
Dronning Ingrids Hospital, sundhedscenter, regionssygehuse aammalu sundhedsstationer.
Matumani Oqaasiliortut Dr.Ingrids Hospitalip ulluinnarni Sana-mik taagorneqartup qanoq taaguuteqarnera/taaguuteqassanera isumaqatigiiffiuallaanngitsumik eqqartorpaat. Matumani taaguutit uku pineqarlutik:
Dronning Ingridip Napparsimmavissuanik taaguuteqavinnersoq imalt. Imaalissanersoq Napparsimmavissuaq Dronning Ingrid.Naggataani isumaqatigiissutaavoq taaguutit qanoq atugaaneri inatsisinilu qanoq allassimaneri misissorneqassasut, kingusinnerusukkullu taaguutinik assigiimmik atuinissaq eqqarsaatigalugu Oqaasiliortunit akuerineqassasut.
d. Scanne kalaallisut qanoq eqqortumik allanneqassava?
Saaffiginnittup apeqqutigaa oqaasersiaq scanne qanoq allanneqassanersoq, ordbogimi qallunaatuumiit kalaallisuumut skannerpaa-mik allaqqammat, oqaasersianilli allannissamik malittarisassami nassuiaat tassaalluni oqaasersiap tiguneqarnera naapertorlugu uiguusiinnagassaassasoq. Nassuiaat kingulleq naapertorlugu saaffiginnittoq akineqassaaq, tassalu scannerpaamik allannissaanik siunnersorlugu, taamatullu ordbogilerinermi sulinermi aaqqitassatut oqaaseq pineqartoq nalunaarlugu.e. Robobraillekkut workshopeqartitsiniarnerat uge 34-mi ingerlanniarneqartoq pillugu Oqaasiliortut ilisimatinneqarput. Tassani aaqqissuussinermi Oqaasileriffik pilersaarusioqataasutut ikiuussinnaassasoq isumaqatigiissutaareernikuummat ullussaa inissippat sumiikkumaarnissaa piffissaalu nalunaarutigineqarumaarput. Ilanngullugu oqaatigineqarpoq Robobraillekkut ilinniartitaanermik ilisimatusarnermillu naalakkersuisumik naapeqateqareerlutik siunertarigaat nunatsinnut tulluuttumik IT-rygsæk-iliornissaq, taanna sorpiarnik imaqarumaarnissaa piffissap ingerlanerani aammalu qanoq taperserneqarneq tunngavigalugu ilusileriartuaarneqarumaartoq Robobraillekkunnit oqaatigineqarpoq.
f. Danskisut taaguutissanik apeqquteqaat tassaavoq Oqaasiliortut taaguusersimasaannit tunngavilik. Inuiaat eriagisassaataat aammalu nunatsinni eriagisassat pinngortitameersut taaguutissatut akuerineqareernerisa kingorna Naalakkersuisoqarfimmiit apeqqutigineqarpoq taakkua danskisut qanoq taaguuteqartinniarneqarnersut. Naak Oqaasiliortut ataanni danskisut taaguusersuineq ilaanngikkaluartoq, taamaattoq siunnersuutigineqarpoq unikke kulturelle elementer-nik taaneqarsinnaalluartut.
- Taasariaqartut allat
Pablop allagaata akineqarnissaa kiisalu atuagassiami Kalaalermi allatarisimasaa pillugu qisuariartoqarnissaa siunniunneqarpoq, naak Hans Anthon Lyngep akikannereersimagaluaraa, taamaattoq pissusissamisoortutut isigineqarpoq pineqartorpiaat, tassalu Oqaasiliortut uparuarneqartuusut, namminneq akissuteqarunik. - Taasariaqartut allat
Siusinnerusukkut saaffiginnissutaasimasoq danskisut samrådip kalaallisut oqaasertassaa pillugu Oqaasiliortut saaffigineqaqqipput. Matumuuna taaguutigitinneqarlersup siunersiuinerup paasineqarani paatsoorneqarsimanera erserpoq, taamaattumillu itinerusumik nassuiaatitalimmik saaffiginnittut allaffigineqaqqipput.
Inussiarnersumik inuulluaqqusilluta
Carl Chr. Olsen Katti Frederiksen
Siulittaasoq Allatsi