Ujarlerit

Inuit Aqqinik Akuersisartut 2014 – 3 (gl)

IAA – 161014 (gl)

Inuit Aqqinik Akuersisartut 16/10-2014, nal. 10.00 Oqaasileriffimmi ataatsimiinnerannit imaqarniliaq

 

Peqataasussat:             Sofie Petersen, Eva Møller Thomassen, Karl Møller.

Atorfillit:                       Nuka Møller – Oqaasileriffik.

 

  1. Tikilluaqqusineq ilisimatitsissutillu

 

  1. Kingullermik ataatsimiinnermit imaqarniliat akuerineqarneri

 

  1. Atitut akuereqqullugit qinnutigisat:
    1. Angitaaluk (10/07) ♂ Akuerineqanngilaq Angutaaluk innersuunneqarpoq.
    2. Aanuka (28/08) ♀ Akuerineqanngilaq. Kalaallit atiattut pissuseqanngimmat.
    3. Arnanki (10/09) ♀ Akuerineqanngilaq. Kuissutaa atsiullugu taagutaa atatiinnaqqullugu innersuunneqarpoq
    4. Kuddunka (29/09) ♀ Akuerineqanngilaq. Kuissutaa atsiullugu taagutaa atatiinnaqqullugu innersuunneqarpoq

 

  1. Aqqit pillugit suliat ataatsimiinnerup avataatigut ingerlasut.
    1. Viisu itigartitsissutigineqartoq Oqaasiliortunut suliareqqitassanngortinneqarsimasoq ilisimatitsissutigineqarpoq.
    2. Mukkiaraq akuereqqullugu qinnutigineqarmat Mukki 09.12.09 nukappiaqqat aqqattut akuerineqarsimasoq Oqaasiliortut allattaata kukkullugu niviarsiaqqat aqqattut allassimagaa ippassaq Palaseqarfik Nanortalimmut ilisimatitsissutigineqarpoq uiguut –araq ajornanngimmat akuerisaniittoq.
    3. Siusinnerusukkut apeqqutigineqarsimasoq Orpa Orba-mik allassimassanersoq apeqqutigineqarsimasoq qangaaniit atioreermat allattaatsimut malittarisassat naapertorlugit ima allassimassaaq: Orpa.

 

  1. Aqqit pillugit atuakkiaq

Inuit Aqqinik Aalajangiisartut atuakkiap sumut killinneranik ilisimatinneqarput. Atuakkiap saqqummiunneqarnissaa Oqaasileriffiup pisortaanit decembari qaammat naqitereersimaqqullugu tuavisaarutigineqarsimammat, allatsip maannamut killiffik pilertortumillu naqitertinneqassappat periarfissat qanoq ittuunersut saqqummiuppai.

Suliaq Inuuneq atitut akuereqqullugu 2013-imi novembarimiit upernassaq 2014 tikillugu aaqqiagiinngittoqarnera pissutigalugu naammassileraluarluni ingerlariaqqissinnaajunnaarallarsimavoq inatsisip nutarterneqarnissaa Kultureqarnermut Naalakkersuisumit kissaatigineqarmat, kisitsisillu nutaanerpaat pissarsiariniarlugit aqqillu ittoorutaasinnaasutut nalilerneqarsinnaasut atorunnaarnikullu akuerisat akornanniit peerlugit nalunaarsuivimmut nuunneqarsinnaanissaat akuerineqarsinnaanersoq pillugu qinnuteqaat 18. oktober 2013 Oqaasiliortunit aatsaat 2014-imi aasareersoq ersarinngikkaluamik qisuariarfigineqarmat.

Atuakkiaq kalaallisut, qallunaatut tuluttullu allassimasoq marlussunnik immikkoortortaqarpoq. Siulleq 52-inik quppernilik aqqit akuerisat Inuit Aqqinik Aalajangiisartuneersut 2007-ip kingorna aternik akuerisanik nutaanik ilaartukkat atorunnaarsimasutullu nalilerneqarlutik aternik 230-nik aqqit nalunaarsorsimaffiannut nuullugit ilanngartorsimasanik imaqarpoq. Tassungattaaq ilaapput IAA-p atsiisarnermut malittarisassiai nutartikkat Oqaasiliortut pillugit inatsisissap 1. januar 2015 atuutilersussap ataaniittussat. Ajoraluartumik ullumikkut naalakkersuinikkut pissutsit pissutigalugit nalorninarallarpoq inatsit taamatut isikkoqartillugu atuutilerneqarsinaanersoq. Immikkoortup aappaa 250 miss. qupperneqartussaq (siulequtit assigisaallu ilannguppata) tassaavoq navneleksikon Oqaasileriffimmut ukiuni kingullerni aqqit isumaat pillugit saaffiginnittartunut akissusiarineqarsimasut aaqqissuuteqqillugit nutserlugillu suliaq. Suliaq pilertornerusumik ingerlassappat immikkoortoq siulleq Inuit Aqqinik Akuersisartunut tunngasoq peerneqarsinnaasoq allatsip nalunaarutigaa, taamaattoq ilioqqaasup qanoq periarfissaqartiginera apeqqutaassalluni. Ilioqqaasoq oqaloqatigineqarami novembarip qulingata kingorna suliap killiffia nalilersoriarlugu piffissaq qanoq isikkoqarnersoq takoriarlugu nutaamik neqeroorusiorsinnaalluni nalunaarpoq. Inuit Aqqinik Akuersisartuni ilaasortat nalunaarput isummerfigeriarlugu tamanna pillugu allagaqarumaarlutik.

17.10 allakkatigut nalunaaruteqarput alisinnerusoq isigalugu atuagaq saqqummissappat ataatsimoorullugu piukkunnarnerpaatillugu malittarisassat pisoqqat atornagit nutaassat ilaatinneqassammata.

 

  1. Taasariaqartut allat

 

Inussiarnersumik inuulluaritsi

Nuka Møller
allatsi