Oqaasiliortut 2015 – 8

OQAA – 161115 (gl)

Oqaasiliortut ataatsimiinnerat ataasinngorneq, novembarip 16-ianni 2015, nal. 13.00
Ilimmarfimmi

Peqataasut: Carl Chr. Olsen, Stephen Heilmann, Eva Møller Thomassen, Karl Møller aammalu Oqaasileriffimmi pisortaq Katti Frederiksen

Allatsi: Minik Jeremiassen

Oqaluuserisat:

1. Siullermik Carl Chr. Olsen tikilluaqqusivoq Oqaasileriffiullu pisortartaava Katti Frederiksen pilluaqqullugu, pisortartaarsimanerullu kingunerisaanik suleriutsinik allanngortoqassappat Oqaasiliortut ilisimatinneqarnissaat kissaatigaa. Oqaasiliortut allatsitaavattaaq Minik Jeremiassen tikilluaqquneqarpoq.
   Tullinnguulluni Katti Frederiksen oqaaseqartuuvoq, Kattillu Oqaasiliortut kalaallit oqaasiinik siunissami illersuisussatut suliaqalernissaat anguniarneqassasoq kissaatiginerarpaa. Oqaatsinillu illersuisussaanermut tunngatillugu Stephen Heilmannip Katti taperserpaa ilaatigut oqarluni tusagassiuutitigut oqaatsit allanneqartartut/oqaatigineqartartut kukkuneqarpallaartarnerat isornartoqartillugu.
   Kattip Oqaasileriffimmiit ilisimatitsissutit assigiinngitsut saqqummiuppai, ilaatigullu eqqaavaa TELE-POST suleqatigalugu januaarimiit marsi ilanngullugu oqaatsinik inuinnarniit siunnersuutigineqartunik allakkatigut katersisoqassasoq, taamaaliornissami inuiaqatigiit Oqaasileriffimmut oqaatsinik siunnersuuteqarsinnaanerat periarfissinneqassasoq Kattip oqaatigaa. Oqaasileriffimmuttaaq decembarip qaammataani GOIA-miit (Greenland Oil Industry Association) taaguutit aatsitassarsiornermut tunngasut katersorneqarsimasut tunniunneqarnissaat Kattip eqqaavaa taaguutillu taakku Oqaasiliortukkoorumaartut ilisimatitsissutigalugu.

2. Kingullermik ataatsimiinnermit imaqarniliaq aggustip 14-ianni 2015-imeersoq taamaatsillugu Oqaasiliortunit akuerineqarpoq.

3. Oqaasiliortunut saaffiginnissutit tullinnguullugit eqqartorneqarput:a) refleks
   Refleks ima kalaallisuumut nutserneqassasoq akueraat qinngortartoq, imalu nassuiaaserneqassaaq seqerneqarluni qaammartartoq

   b) værtsland
   nuna aaqqissuisuusoq Oqaasiliortunit akuerineqarpoq

   c) almen dannelse
   almen retning = tamanut sammisoq
   Ima nassuiarneqarpoq: GUX Nuuk assigiinngitsunik arfinilinnut sammisunik qinigassalimmik ilinniarnertuunngorniarfigineqarsinnaavoq:

   1. pinngortitalerinermik ilinniarneq
   2. tamanut sammisoq
   3. peqqissaanermik ilinniarneq
   4. inuiaqatigiilerinermik ilinniarneq
   5. oqaasilerinermik piorsarsimassusilerinermillu ilinniarneq
   6. nutaanik pilersitsisinnaaneq
   
   tamanut sammisoq tassa sammiviit taakku arlaannaannulluunniit sammiveqanngilaq sammiviilli tamarmik tigulaariffigineqartarlutik.
   
   almen dannelse = perorsarsimassuseq

   d) misiarpoq
   Ordbogimi nutserneqarsimasoq allanngortinneqassanngilaq isumaa ajunngitsumik nutserneqarsimammat, taamaattorli eqqartuussivinni atorneqarnissaa innersuussutigineqanngilaq eqqartuussivimmiullu siunnersorneqassapput oqaaseq una misiarpumut taarsiullugu atortassagaat: pisuunnginnerarpoq

   e) Ilaqutariinnermut, Naligiissitaanermut Isumaginninnermullu Naalakkersuisoqarfimmiit apeqquteqaatigineqartut ima kalaallisut taaguuserneqassasut akuerineqarpoq:
   – Familierådslagning = ilaqutariinnik siunersioqatigiinneq
   – Initiativtager = siunersioqatigiinnik siunnersuisoq
   – Samordner = ataqatigiissaarisoq

   f) dement
   Ordbogimi allaqqasut atorunnaarsinneqassapput unalu atuutilersinneqassalluni: puigortunngortoq

   g) finanssektor
   aningaasaleeqataasartut akuerineqarpoq

   h) specialforbund
   aalajangersimasunik timersuutillit kattuffiat akuerineqarpoq

   i) hjemsted
   angerlarsimaffik akuerineqarpoq

4. Oqaasiliortut naggataarlutik ataatsimiikkamik suleriuserisimasaminnik naliliipput, iluarisimaarneqarporlu oqaluuserisassatut siunnersuutit nassuiaaserlugit ataatsikkut nassiunneqartarnerat

5. Taasariaqartullu allat eqqartorneqarnerini pingaarnertut eqqartorneqartoq tassaavoq Oqaasileriffik saqqumilaarnerusariaqartoq taamaalilluni Ilisimatusarfimmut saaffiginnittartut Oqaasileriffimmut saaffiginnittalerniassammata

Inussiarnersumik inuulluaqqusilluta

Carl Chr. Olsen                                                                                     Minik Jeremiassen

Siulittaasoq                                                                                         Allatsi