Nunat Aqqinik Aalajangiisartut
ataasinngornermi marsip 7-anni 2016-imi Oqaasileriffimmi ataatsimiinnerat
Peqataasut: Karl Elias Olsen, Marianne Petersen, Kirstine Kreutzmann, Bolatta Vahl.
Oqarasuaatikkut malinnaasoq: Jens Danielsen
Allatsi: Lisathe Møller Kruse
Paasissutisseeqataasoq: Katti Frederiksen
Oqaluuserisat makkuupput:
- Tikilluaqqusineq, aqutsisussamik toqqaaneq oqaluuserisassallu akuerineqarnerat
- Imaqarniliap akuerisassatut saqqummiunnera (januaarip 24-anni 2016-imi ataatsimiinnermit imaqarniliaq)
- Nunat Aqqinik Aalajangiisartut siulittaasussaannik, siulittaasullu tullersortissaannik qinersineq
- Nunarput Inuit Nunaannik ateqalissanersoq pillugu Naalakkersuisoqarfimmit Kalaallit Nunaat, Inuit Nunaat il. il. nunatta aterissaneraa.
- NAA-mi suleriutsinik malittarisassanik najoqqutassiorneq (missingersuusiamik Katti suliaqarpoq)
- Geological Survey of Denmark and Greenlandimit saaffiginnissut
- Taasariaqartut allat
- pillugu –
Ataatsimiinnerup aallartinnerani Oqaasileriffimmi atorfilik LMK tikilluaqqusivoq. Ataatsimiinnerup nalaani aqutsisussatut allatsertik Lisathe Møller Kruse toqqarpaat.
Nunat Aqqinik Aalajangiisartunut ilaasortat ataatsimiilernerminni oqaluuserisassanut eqqartugassatik oqaaseqarfigaat, eqqartugassanullu ilanngullugit Nunat Aqqinik Aalajangisartut siulittaasussaannik qinersineq, aamma siulittaasup tullissaannik qinersineq.
- pillugu –
NAA-t kingullermik ataatsimiinnerannit imaqarniliaq naqqiissuteqarfigineqarpoq, naqqiissutillu aaqqinneqarlutik.
- pillugu –
Nunat Aqqinik Aalajangiisartunut ilaasortat siulittaasussaminnik toqqaagamik Karl Elias Olsen siulittaasussatut qinerpaat, siulittaasup tulliattullu Kirstine Kreutzmann qinerlugu.
- pillugu –
Nunarput Inuit Nunaannik ateqalissanersoq pillugu Naalakkersuisoqarfimmit saffiginnissut Nunat Aqqinik Aalajangiisartut sivisungaatsiartumik isummersorfigivaat. Suliassarli annertummat sukumiisumik misissuineq ingerlaqqissasoq NAA-t aalajangerput. Misissuinerup ingerlanerani suliamut tassunga attuumassuteqarsinnaasut suleqatiserineqassasut isumaqatigiipput. Suleqatiserineqarsinnaasuni assersuutitut taavaat uku; Islandermiut, katersugaasivik, Robert Petersen.
- pillugu –
Nunat Aqqinik Aalajangiisartut suleriusissaannik Oqaasileriffiup ningiua Katti Frederiksen missingersuusiorpoq. Najoqqutassatut missingersuusiaa NAA-mi ilaasortat naliliiffigivaat. NAA-mi ilaasortap Bolatta Vahlip siunnersuutigivaa §4-mi ataatsimiinnerup ingerlaasissaa aalajangersaariaaserlu pillugit uku ilannguttariaqartut. Aappaluttumik naqinnillit Bolatta Vahlip siunnersuutai akuerineqartut ukuupput;
Oqaluuserisassat ima tulleriinnilersorneqassapput:
-
- Oqaluuserisassat akuerineqarnerat
- Kingullermik ataatsimiinnermit imaqarniliap akuerineqarnera
- Suliat assigiinngitsut tulleriiaarlugit oqallisigineqarnerat akuerineqarnerallu
- Oqaasileriffimmit nutaarsiassat nunap aqqinut tunngasut
- Allat
Bolatta Vahlip aappaattut allannguutissatut siunnersuutigisaa §5-imiippoq, siunnersuutigigamiuk imaqarniliaq akuerisaq ataatsimiinnermi tullermi tamanit atsiorneqarani, siulittaasumit allatsimillu atsiorneqartassasoq. NAA-mi ilaasortat Bolatta Vahlip siunnersuutaa isumaqatigivaat, taamalu allannguutissatut aalajangiullugu.
- pillugu –
Geological Survey of Denmark and Greenlandimit saaffiginnissut Nunat Aqqinik Aalajangiisartunit eqqartorneqareerluni aalajangerneqarpoq, saaffiginnissutit nunap aqqinut aalajangiivigisassanut attuumassuteqanngitsut, soorlu nunap ilaani suliffigisap misissuiffigisalluunniit atissaanik siunnersoqqullutik saaffiginnittut Oqaasileriffimmi nunat aqqinik isumaginnittumit isumagineqarlutik akineqartassasut, Nunat Aqqinik Aalajangiisartut ataatsimiinneranni ilanngunneqaratik. Saaffiginnissutit taama ittut sinneri allaffissornikkut isumagineqartalissasut NAA-t aalajangiipputtaaq.
- pillugu –
Nunat Aqqinik Aalajangiisartunut ilaasortaq Kirstine Kreutzmann påskip nalaani Kangaamiunukaleriarami aperivoq, nunat aqqinik Kangaamiuniinnermini suliaqarsinnaanerluni. Aningaasaateqarfimmit Nordplus Sprogimit nunat aqqinik nalunaarsuinissamut aningaasaliissutit sinneqarmata sinnerilu nunat aqqinik suli nalunaarsuiffigisariaqartunut atortussaammata akuerineqarpoq.
Nunat Aqqinik Aalajangiisartut aalajangerpaat ataasinngornermi apriilip 11-anni nal. 12 ataatsimiissallutik.
Karl Elias Olsen Lisathe M. Kruse
NAA-mi siulittaasoq NAA-t allattaat