Nunat Aqqanik Aalajangiisartut 2016 – 4

NAA.14.06.16

Nunat Aqqinik Aalajangiisartut

marlunngorneq juunip 14-anni 2016-imi Ilimmarfimmi ataatsimiinnerat

 

Peqataasut.: Karl Elias Olsen, Kirstine Kreutzmann, Marianne Petersen, Jens Danielsen (oqarasuaatikkut malinnaavoq).

Peqataanngitsut: Bolatta Vahl (suli peqqissisimannginnini pissutigalugu).

Allatsi: Lisathe Møller Kruse

 

Oqaluuserisat makkuupput:

1. Kangaamiut eqqaanni nunat aqqi akuerineqanngikkallartut akuerinissaat
2. Inoqarfiit agguataarneri taaguutaalu eqqartorlugit naliliiffigineri. Nuna Tamakkerlugu Pilersaarusiortarnermut Immikkoortortaqarfiup saaffiginnissutaa
3. Nunat Aqqinik Aalajangiisartut pillugit Inatsisartut inatsisissaattut siunnersuutip tusarniaassutigineqarnertup eqqartornera
4. Taasiariaqartut

 

1. pillugu –

Kangaamiut eqqaanni nunat aqqi kingullermik ataatsimiinnermit akuerineqanngikkallartut, nunallu aqqinik ilisimasalinnut apeqqutigisassat apeqqutigineqareermata Nunat Aqqinik Aalajangiisartut nunat aqqi akuerineqanngikkallarsimasut eqqartorpaat. Nunat Aqqinik Aalajangiisartut nunat aqqi ataasiakkaarlugit eqqartorpaat.

Ataatungaaniittut nunat aqqi ersarissumik naqinnillit Nunat Aqqinik Aalajangiisartut akuerisaat takuneqarsinnaapput:

 

1. 1. Inussullaat vs Inussullat à Inussullak
   2. Tinuteqisaap nunaa vs Nunarsuaq vs Tinitoqisaaq, Tinuteqisaaq  à Tinuteqisaaq
   3. Qallunnguit vs Qallunngit  à Qallunnguit
   4. Narsatsialik vs Narsatsaalik, Narsaatsialik à Narsaatsialik
   5. Naanngisat vs Naangissat, Naanngisat  à Naanngisat
   6. Kangingusaata nuua vs Kangingusaa, Kanginnguusaa à Kangingusaa

 

2. pillugu –

Namminersorlutik Oqartussat allaffeqarfiisa ilaata Nuna Tamakkerlugu Pilersaarusiornermut Immikkoortortaqarfiup saaffiginnissutigaa Kalaallit Nunaanni inoqarfiit agguataarnerisa taaguutissaannut tunngasoq.

Nunat Aqqinik Aalajangisartut ataatsimiinnginneranni Oqaasileriffik siunnersuutaasinnaasumik suliaqarpoq. Nunat Aqqinik Aalajangisartut eqqartuereerlutik aalajangerpaat suliassaq ukiamut aatsaat aalajangiivigineqassasoq. Suli aalajangernissamut tunngavissat amigaataaneri pissutaallutik ukiamut kinguartitsipput.

 

3. pillugu –

Nunat Aqqinik Aalajangiisartut pillugit Inatsisartut inatsisissaattut siunnersuutip Namminersorlutik Oqartussat tusarniaassutigisaa Nunat Aqqinik Aalajangiisartunit eqqartorneqarpoq. Inatsisissatut siunnersuut Nunat Aqqinik Aalajangiisartut akuerivaat, ataaserli naqqiissuteqarfigissallugu aalajangerlutik.

Inatsisissatut siunnersuummi § 5-imi ullui kukkusut tusarniaasunut allakkiornikkut apuunneqarumaartoq Nunat Aqqinik Aalajangiisartut aalajangiuppaat. Ima inatsisissatut siunnersuummi allaqqavoq; “Medlemmerne af stednavnenævnet udpeges for perioder på 4 år ad gangen, første gang for perioden 1. Januar 2017 til og med 31. December 2020”. Taamatut ullui taaqqissaarlugit ullulernagu ukiut sisamakkaarlugit ilaasortassat toqqarneqartarneri ersersiinnarneqartussaanera Nunat Aqqinik Aalajangiisartut tusarniaasunut apuutissallugu isummerput.

 

4. pillugu –

Nunat Aqqinik Aalajangiisartut Oqaasileriffimmit siunnersorneqarnermik kingunerisaanik aappaagumut suliassanut nunat aqqinut tunngasunik aningaasartuutissatut Naalakkersuisoqarfimmut siunnersuutissanik suliaqartoqassasoq aalajangiuppaat. Nunat Aqqinik Aalajangiisartut aningaalersorneqarnerisa saniatigut aningaasartuutissatut siunnersuutit uku Naalakkersuisoqarfimmut siunnersuutigineqassasut aalajangiuppaat:

 

• • Nunat aqqi akuerisat Oqaasileriffiup nittartagaaniitsilernissaannut aningaasartuutissatut missingersuut
  • Nunat assinginik nunat aqqinik akuerisanik imalinnik tuniniaasalersinnaanerup piviusunngortinnissaanut aningaasartuutissatut missingersuut

 

Nunat Aqqinik Aalajangiisartut allattaata LMK-p misissorniarpaa nunat assinginik tuniniaasalersinnaanermut najoqqutassanik eqqumaffigisariaqakkanik peqarnersoq.

 

Nunat Aqqinik Aalajangiisartunut ilaasortat ilaata Kirstine Kreutzmannip siunnersuutigivaa ilaasortat tigummiartakkamik qarasiaasiaqarsinnaanerat pisinnaagaluartoq. Oqaasileriffimmi ningiu Katti Frederiksen ataatsimiinnerup nalaani najuunnermini tamanna akissuteqarfigivaa Oqaasileriffik qarasaasianik angallattakkanik angalanermi atorneqarsinnaasunik peqartoq, taakkulu atorneqarsinnaasut.

NAA-mi ilaasortat aalajangiuppaat tulliani ataatsimiinnissartik septembarimiussasoq.

 

Karl Elias Olsen                        Kirstine Kreutzmann

Siulittaasoq                                Siulittaasup tullia

Marianne Petersen                     Jens Danielsen

NAA-mi ilaasortaq                    NAA-mi ilaasortaq

Bolatta Vahl

NAA-mi ilaasortaq