Nunat Aqqinik Aalajangiisartut 2016 – 5

NAA.25.10.16

Nunat Aqqinik Aalajangiisartut

marlunngorneq oktobarip 25-anni 2016-imi Ilimmarfimmi ataatsimiinnerat

 

Peqataasut.: Karl Elias Olsen, Kirstine Kreutzmann, Marianne Petersen, Bolatta Vahl, Jens Danielsen (oqarasuaatikkut malinnaavoq).

Allatsi: Lisathe Møller Kruse

 

Oqaluuserisat makkuupput:

  1. Nuup qaqqaasa ilaat Ukkusissat
  2. Nunatta aqqa Kalaallit Nunaat Inuit Nunaanngussava? (Inatsisartunut ilaasortap inatsisartuni eqqartugassanngortitaa)
  3. Nunat Aqqinik Aalajangiisartut siulittaasuata Karl Elias Olsenip Qallunaat Nunaannut nuuttussanngornerata kingunerisaanik siulittaasussamik qinersineq
  4. Taasiariaqartut

 

  1. pillugu –

Nuup qaqqaasa ilaat Nuup qinnguata kujatinnguaniittoq qaqqarujussuaq Ukkusissat inuinit assigiinngitsumik taagorneqarpoq, ilaatigut assortuussutaalluni. 1952-imi taamani Qallunaat Nunaanni inissisimasumi Stednavneudvalg for Grønlandimit qasseersiutitut akuerineqarsimavoq, taamanimiilli pisortatigoortumik allannguuteqarani akuerisatut ateqarluni Ukkusissat. Oqaasileriffimmut akerliulluni saaffiginnittoqarpoq ateqarnerarlugu Ukkusissaq, allatullu taagorneqarneranut akerliulluni Nuummiunullu suusupaginninnertut taallugu oqaatigalugu. Taamaariarmat tamanna pillugu sorlerlu eqqornersoq paaserusullugu misissuinerput aallartipparput. Aviisitoqqanit misissuinerit nuummiutoqqanillu apersuinerit ersersippaat pineqartut tamarmik Ukkusissat aamma Ukkusissat atorneqartut. Qulakkeerumallugu sorleq eqqortuunersoq paasissutissallu nalorninaallisinngimmasuk sorleq eqqortuunersoq misissuineq ingerlaannassaaq, ilaatigut oqaluttuatoqaatitsinni taaneqarsimanersoq misissorneqassalluni.

 

  1. pillugu –

Nunatta aqqa Kalaallit Nunaat Inuit Nunaanngussanersoq inatsisartunut ilaasortap Nikolaj Jeremiassenip inatsisartut ataatsimiinnissaanni eqqartugassanngortitaa Oqaasileriffimmut Nunat Aqqinik Aalajangiisartunullu saaffiginnissutaavoq.

Nunat Aqqinik Aalajangiisartunut ilaasortat isumaqatigiissutigivaat maannakkut aqqa Kalaallit Nunaat ateriinnassagaa, kalaaliugatta immikkuullarissutigalugulu naggueqatitsinnut allanut sanilliulluta. Inuit Nunaannik oqaraangatta naggueqatigiit tamarmik Siberiamit Kalaallit Nunaannut pineqartarmata taamatut Nunat Aqqinik Aalajangiisartunit ateqartikkusunneqanngilaq. Nunanut allanut aallaraangatta kalaaliunerartarpugut. Nunat Aqqinik Aalajangiisartunut ilaasortap  avanersuarmeersup Jens Danielsenip nassuiaatigivaa namminneq imminnut avanersuarmiut inunnik taasaraluarlutik nunanut allanut aallaraangamik kalaaliunerartarlutik. Nunat Aqqinik Aalajangiisartut ilaasortat isumatigiillutik oqaatigivaat kalaaliuneq tulluusimaarutaasarmat Kalaallit Nunaat nunatta ateriinnartariaqaraa.

 

  1. pillugu –

Nunat Aqqinik Aalajangiisartut siulittaasuat Karl Elias Olsen tunuarniuteqarnermini oqaaseqarpoq, Qallunaat Nunaannut nuuttussaagamik siulittaasutut tunuarniuteqarluni.

Nunat Aqqinik Aalajangiisartut siulittaasuata Karl Elias Olsenillu siulittaasutut tuniarniuteqarnera peqqutaalluni  siulittaasussamik Nunat Aqqinik Aalajangiisartut qinersipput. Nunat Aqqinik Aalajangiisartut siulittaasussaattut Kirstine Olsen qinerneqarpoq, siulittaasut tullinngorlunilu Karl Elias Olsen. Karl Elias Olsenip Qallunaat Nunaanniikkaluarluni Nunat Aqqinik Aalajangiisartunut ilaasortaaginnarnissani kissaatigivaa, tamannalu ilaasortaaqataanit tapersersorneqarluarluni. Karl Elias Olsen siulittaasup tullissaattut piukkunneqarpoq, nunat aqqinik ilisimasaqarluarnera peqqutaasunut ilaalluni. Ilaasortat tamarmik isumaqatigiillutik Karl Elias Olsen Nunat Aqqinik Aalajangiisartut siulittaasup tullissaattut qinerpaat.

 

  1. pillugu –

Taasariaqartuni NAA-mi ilaasortat ilaata apeqqutigivaa nunat aqqi GPS-niittut suminngaanneertarnersut, kukkunik kiisalu allattaasitoqqamik allatanik ilaqarmata. Nunat Aqqinik Aalajangiisartut allataata tamanna paasiniarniarpaa.

 

NAA-mi ilaasortat tulliani qaqugu ataatsimiissanerlutik aalajanginngikkallarpaat.

 

Karl Elias Olsen                        Kirstine Olsen

Siulittaasoq                                Siulittaasup tullia

Marianne Petersen                     Jens Danielsen

NAA-mi ilaasortaq                    NAA-mi ilaasortaq

Bolatta Vahl

NAA-mi ilaasortaq