Nunat Aqqinik Aalajangiisartut 2017 – 1

NAA.13.01.17

Nunat Aqqinik Aalajangiisartut

tallimanngorneq januaarip 13-anni 2017-imi Ilimmarfimmi ataatsimiinnerat

 

Peqataasut.: Kirstine Kreutzmann, Marianne Petersen, Jens Danielsen (oqarasuaatikkut malinnaavoq).

Peqataanngitsut: Bolatta Vahl, Karl Elias Olsen

Allatsi: Lisathe Møller Kruse

 

Oqaluuserisat makkuupput:

1. Oqaluuserisassat akuerineqarnerat
2. Kingullermik ataatsimiinnermi imaqarniliap akuerineqarnera
3. Siulittaasumit allattoqarfimmillu ilisimatitsissutit
4. Kalaallit Nunaanni Nunat Aqqinik Aalajangiisartut pillugit Inatsisartut inatsisissaattut siunnersuutip tusarniutigineqartup eqqartorlugu naliliiviginera
5. Nunat Aqqinik Aalajangiisartut nunat aqqinik aalajangiisarnissami tunngavissanik sinaakkuteqalernissaat pillugu eqqartuineq. Ilaatigut sammissallugu Nunat Aqqinik Aalajangiisartut tusagassiutinut nalunaaruteqarnissaannut tunngatillugu suleriutsit
6. Ukkusissat imaluunniit Ukkusissaq
7. GPS-imi nunat aqqisa eqqortuusannginneri pillugu eqqartuineq
8. Suliat allat pillugit ilisimatitsissutit

 

1. pillugu –

Oqaluuserisassat Nunat Aqqinik Aalajangiisartunit allannguuteqartinneqalaareerlutik akuerineqarput.

 

2. pillugu –

Oktobarip 25-anni 2016-mi ataatsimiinnermit imaqarniliaq aaqqitassamernit aaqqinneqareernerisigut akuerineqarpoq, ataatsimeeqataasullu imaqarniliamut atsiortinneqarlutik.

3. pillugu –

Oqaasileriffimmit ilisimatitsissutigineqarpoq Geodatastyrelsip nunap assiliorneranut Oqaasileriffik suleqataasoq, qarasaasiami nunat aqqisa killinginik (polygoner) suliaqarnissaq suliassagalugu.

4. pillugu –

Kalaallit Nunaanni Nunat Aqqinik Aalajangiisartut pillugit Inatsisartut inatsisissaattut siunnersuut tusarniutigineqartoq Nunat Aqqinik Aalajangiisartut eqqartorpaat. Inatsisissarli pillugu inatsisilerituumik ataatsimeeqatiserinninnissartik aalajangiuppaat, inatsisissaq pillugu erseqqinnerusumik nassuiaanneqarnissartik inatsisissarlu paaseqqissaarnissaa anguniarlugu taamaaliorniarlutik.

5. pillugu –

Nunat Aqqinik Aalajangiisartut nunat aqqinik aalajangiisarnissami tunngavissanik sinaakkuteqalernissaq pillugu eqqartuisussaapput. Nunat Aqqinik Aalajangiisartut oqartussaaffiisa ilaannik Oqaasiliortut oqartussaaffeqalernissaat pissutigalugu una eqqartugassaq kinguartinneqarpoq, Oqaasiliortut sorpiaat oqartussaaffiit tigussaneraat erseqqissumik misissoqqaagassaassammat.

Nunat Aqqinik Aalajangiisartut tusagassiutinut nalunaaruteqarnissaannut tunngatillugu suleriutsit eqqartugassaasa ilagigaluarpaat, taannali aamma kinguartinneqarpoq.

6. pillugu –

Nuup saavaniittoq qaqqarsuaq pisortatigoortumik Ukkusissanik ateqartinneqarpoq, taamaattoq Nuummiut ilaasa Ukkusissamik taasarmassuk Nunat Aqqinik Aalajangiisartut misissuinerit tunngavigalugit misissortussaagaluarpaat sorlerlu pisortatigoortumik aterissaneraa aalajangiivigisussaagaluarlugu. Eqqartugassarli aalajangiiviginissaalu kinguartinneqarallarpoq.

7. pillugu –

GPS-imi nunat aqqisa eqqortuusannginneri pillugit Nunat Aqqinik Aalajangiisartut eqqartuisussaagaluarlutik eqqartunngikkallarpaat.

8. pillugu –

Apeqqut nalornissutaasoq Nunat Aqqinik Aalajangiisartunit eqqartorneqartoq tassaavoq nunatta aqqa allannguuteqassappat kikkut aalajangiisuussanersut. Nunat Aqqinik Aalajangiisartut aalajangiuppaat tamanna pillugu Naalakkersuisoqarfimmi inatsisilerituumut saaffiginnissutigalugu erseqqissumik paasiniarneqassasoq ilumut kikkut nunatta aqqanut oqartussaaffeqarnersut.

 

Kirstine Olsen               Karl Elias Olsen

Siulittaasoq                                Siulittaasup tullia

Marianne Petersen                     Jens Danielsen

NAA-mi ilaasortaq                    NAA-mi ilaasortaq

Bolatta Vahl

NAA-mi ilaasortaq