Oqaasiliortut 2018 – 1

OQAA – 080218

Oqaasiliortut ataatsimiinnerat 08.02.2018, nal. 13-16. Ilimmarfik

Peqataasut:

Oqaasiliortut: Juaaka Lyberth, Mariia Simonsen, Mette Larsen Lyberth, Juana Petrussen, Knud Møller

Oqaasileriffimmit: Lisathe Møller, Tikaajaat Kristensen, Beatrine Heilmann, Camilla Kleemann-Andersen (allatsi).

Naalakkersuisoqarfimmit: Inatsisileritooq Lene Møller

 

  1. Tikilluaqqusineq peqataasullu ilisaritinnerat.
  2. Oqaasiliortunut inatsisip Naalakkersuisoqarfimmit nassuiaatigineqarnera
    Naalakkersuisoqarfimmi inatsisileritooq Lene Møller Oqaasiliortunut inatsit pillugu nassuiaavoq, makkulu nassuiaatigineqarput:
    • Oqaatsit eqqussat Oqaasiliortunit taaguuserneqartassapput imaluunniit inuit aalajangersimasumik taaguusiisimappata oqaatsimut tassunga pineqartumut atorneqarnera allanngornagu Oqaasiliortunit pisortatigoortumik atortussanngortillugu akuerineqarsinnaavoq.
    • Oqaasiliortut suleqatigiissitaliornissaminnut periarfissaqarput taaguusersuinermut ilisimasalinnik imaluunniit sammisamut aalajangersimasumut tunngasumik ikiorteqassagunik pisinnaatitaapput.
    • Taaguusersuinermik akuersisarnissamut pisussaatitaapput, tamannali pitinnagu ilisimasalinnit taaguutinik siunnersuusiortoqareertassaaq, Oqaasiliortut namminneq aalajangissavaat siunnersuutit atussanerlugit.
    • Inuit aqqinik akuersisarneq Oqaasiliortut suliassaannut ilaalerpoq, tassani inatsisitigut malittarisassat marluupput: ateq aterineqalersussaq aterinnittussamut ittoorutaassanngilaq kiisalu ateq siulequtaassaaq.
    • Oqaasiliortut allattaatsimut tunngasunik allanngortitsisinnaapput, naleqqussaallutillu taamaattoq tunngaviusumik allanngortitsisoqassappat naalakkersuisumit oqaaseqaammik piniartoqassaaq.
    • Allattaaseq, taaguusersuutit kiisalu taarsiullugit oqaasiliat Oqaasiliortunit akuerineqartut pisortat suliffeqarfiutaannit pinngitsooratik malinneqassapput.
    • Oqaasiliortut Oqaasileriffimmi sulinermi pingaarnersiuinermi aningaasanillu missingersuinermi akisussaasuummata ilaatinneruneqarnissaat inassutigineqarpoq.Oqaasiliortut ataatsimiinnermusiarisartagaat suliaasa annertussusaannut naapertuutinngimmata inatsisilerituumut misissugassanngorlugu suliassiissutigineqarpoq.
      Oqaasiliortut periusissamik suliaqassapput. Aningaasartuutissanut missingersuusiornermi naatsorsuutinullu ilitsersuummik naalakkersuisoqarfik suliaqaqquneqarpoq.
      Inatsit pillugu nassuiaatit Oqaasileriffiup nittartagaanut ilanngullugit ilineqassapput.
  1. Oqaasileriffik pillugu Oqaasileriffimmit saqqummiineq.
    Oqaasileriffimmi pisortaagallartoq, Beatrine Heilmann, Oqaasileriffimmi suliaqarfiit suliallu assigiinngitsut pillugit nassuiaavoq.
  1. Siulittaasussamik siulittaasullu tullersortissaanik qinersineq
    Mariia Simonsen siulittaasutut qinerneqarpoq, Mette Larsen Lyberth siulittaasup tullersortissaatut qinerneqarluni.
  1. Atsiiniarnermi najoqqutassat nassuiarneqarnerat
    Oqaasiliortut siuliisa atsiiniarnermi najoqqutassat novembarimi 2017-imi atuuttussanngortitaat nassuiaatigineqarput.
  1. Inuit aqqi qinnutigineqartut isummerfigineqarput:
    1. Kâjangmat: Angutit ateralugulu kinguliaasoq arnamut atertut qinnutigineqartoq isummerfigineqanngikkallarpoq aalajangiinissamut tunngavissat amigarmata.
    2. Guluk: Arnat aqqattut akuereqqullugu qinnutigineqartoq akuerineqanngikkallarpoq naqinneq g aallaqqaatigissallugu allattaatsimut naapertuutinngimmat. Akuerineqassappat kingunerisisassai misissoqquneqarput.
    3. Kassoq: Nukappiaqqat aqqattut akuerineqarpoq.
    4. Tarralik: Nukappiaqqat aqqattut akuerineqarpoq.
    5. Ikilana: Nviarsiaqqat aqqattut akuerineqarpoq
    6. Kuunu: Nukappiaqqat aqqattut akuerineqarpoq.
  2. ICC-mit ataatsimiigiaqqusissut.
    ICC-p ataatsimeersuartitsinissamut qaaqqusissutaa apuunneqarpoq.
  1. Suleriaatsit pillugit eqqartuineq kiisalu ataatsimiinnissap tullissaata ullulerneqarnera.
    Suleriaatsit pillugit eqqartuinissaq ataatsimiinnissap tullianut kinguartinneqarpoq. Ataatsimiinneq tulleq pissaaq marsip 1-ani 2018 nal. 10-15.

 

Mariia Simonsen, Oqaasiliortut siulittaasuat

Camilla Kleemann-Andersen, allatsi