Ujarlerit

Nunat Aqqinik Aalajangiisartut 2018 – 1 (gl)

NAA.21.08.18 (gl)

Nunat Aqqinik Aalajangiisartut

marlunngorneq aggustip 21-anni 2018-imi Ilimmarfimmi ataatsimiinnerat

 

Ataatsimiinneq nr.1, nal.10.00-15.00

 

Peqataasut:

NAA-mi ilaasortat: Aviâja Rosing Jakobsen, Johannes Rosing, Eva Mätzler aamma Niels Lorentzen (oqarasuaatikkut peqataavoq).

Kultureqarnermut Ilageeqarnermullu Naalakkersuisoqarfimmi atorfillit: Mikael Bønlykke, inatsisileritooq aamma Pia Lynge, Namm. Oqartussanit Oqaasileriffimmut attaveqaataasoq.

Oqaasileriffimmit: Katti Frederiksen Oqaasileriffiup ningiua, Lisathe Møller Nunat Aqqinik Aalajangiisartunut allatsi.

Peqataanngitsoq: Mariane Petersen ilaasortanngoraluarnini pisinnaanini naapertorlugit sapiukkami tunuarluni oqarasuaatikkut nalunaarpoq.

 

Oqaluuserisat makkuupput:

  1. Ullormut oqaluuserisassat akuerineqarnerat
  2. Nunat Aqqinik Aalajangiisartut imminnut ilisaritinnerat
  3. Nunat Aqqinik Aalajangiisartut inatsisaannik saqqummiineq
  4. Nunat Aqqinik Aalajangiisartut suleriaasiannik saqqummiineq
  5. Nunat aqqinik atuuttussanngortitsinermi tunngavissat saqqummiunneri
  6. Nunat aqqinut tunngasunik sulianik saqqummiineq
  7. Nunat Aqqinik Aalajangiisartut siulittaasussaannik tullersortissaannillu qinersineq
  8. Aalajangiiffigisassat oqaluuserineri
    1. Grønlænder Fjeldet
  9. Suliat allat pillugit ilisimatitsissutit

 

  1. pillugu –

Oqaluuserisassat Nunat Aqqinik Aalajangiisartunit akuerineqarput.

 

  1. pillugu –

Nunat Aqqinik Aalajangiisartunngortut imminnut ilisaritipput.

Johannes Rosing, aalisartoq utoqqalinersiutilik Maniitsumeersoq imminut ilisaritippoq suliassaq ilaasortatut nutaatut soqutigilluinnarlugu.

Aviaaja Rosing Jakobsen, Nunatta Katersugaasiviani katersugaasivilerisuulluni imminut ilisaritippoq.

Eva Mätzler, Schweizimiuulluni ilisaritippoq, ukiullu qulissaat Asiami atorfeqarluni.

Niels Lorentzen, Paamiuneersoq, aalisartuullunilu piniartuunini ilisimatitsissutigivaa.

Lisathe Møller, Nunat Aqqinik Aalajangiisartuni allatsi ukiut 15-it Oqaasileriffimmi sulereersimanini ilisimatitsissutigivaa, taakku iluini ukiuni qulini Nunat Aqqinik Aalajangiisartunut allattaasimanini aamma ilisimatitsissutigalugu.

 

  1. pillugu –

Nunat Aqqinik Aalajangiisartut inatsisaannik Ilinniartitaanermut, Kultureqarnermut Ilageeqarnermullu Naalakkersuisoqarfimmi inatsisileritooq Mikael Bønlykke Nunat Aqqinik Aalajangiisartut inatsisaannik saqqummiussivoq.

Siullermilli Nunat Aqqinik Aalajangiisartut inatsisaat pillugu apeqqutit Oqaasileriffimmeersut Mikale Bønlykkemit Pia Lyngemillu akineqaqqaarallarput. Tassani pineqarlutik inatsimmi ‘illoqannginnersat’ (danskisut pladsnavne) qanoq paasineqarnissaannik nassuiaasoqarnissaanik noqqaassut, kiisalu nunatsinni nunap immikkoortuisa aqqi kikkunnit oqartussaaffigineqarnerannut tunngasoq.
Tassani oqaatigineqarpoq nunatta aqqa aammalu nunatsinni immikkoortut aqqi Inatsisartut oqartussaaffigaat, taamaammat Nunat Aqqinik Aalajangiisartut oqartussaaffiisa iluaniinngitsut.

Nunat Aqqinik Aalajangiisartut inatsisaanni nutaami regnskabit tamanut saqqummiuttarnissaannut tunngatillugu Oqaasileriffik apeqquteqarsimavoq, tamannali Mikael Bønlykkep allakkatigut akiumaarlugu neriorsuivoq.

Naggasiullugu oqaatigineqarpoq Nunat Aqqinik Aalajangiisartut suleriaasiat inatsisip allanngornerata kingunerisaanik nutarsartariaqartoq.

 

  1. pillugu –

Nunat Aqqinik Aalajangiisartut inatsisaat nutarsarneqarluni allanngortinneqarnikuummat Nunat Aqqinik Aalajangiisartut suleriaasiat aamma nutarterneqartussaavoq, tamannalu pillugu Nunat Aqqinik Aalajangiisartut suleriaasiannik inatsimmut 2017-imi atorunnaartumut attuumassutilimmut allatsi Lisathe Møller nassuiaateqarluni saqqummiivoq. Nunat Aqqinik Aalajangiisartut tulliani ataatsimiilerunik suleriaasissaq nutarsassavaat.

 

  1. pillugu –

Nunat aqqinik atuuttussanngortitsinermi tunngaviusartunik allatsi Lisathe Møller  saqqummiivoq.

 

  1. pillugu –

Nunat Aqqinut tunngasuni sulianik Nunat Aqqinik Aalajangiisartut allattaat Lisathe Møller saqqummiivoq, nunat aqqi nalunaarsugaataasut, atortut atortorissaarutillu suut pigineqarnersut ilanngullugit saqqummiilluni. Nunat aqqinik suliaqarnermi suliarisariaqartut suut suliassaajumaarnersut ilanngullugit allatsi saqqummiivoq.

 

  1. pillugu –

Nunat Aqqinik Aalajangiisartut siulittaasussaannik tullersortissaanillu qinersisoqarpoq.

Siulittaasunngorpoq Aviaaja Rosing Jakobsen

Siulittaasup tullinngorpoq Niels Lorentzen

 

  1. pillugu –

Aalajangiiffigisassani oqaluuserisassaq ataaseq Nunat Aqqinik Aalajangiisartut eqqartorpaat, Tasiilap avannaani Sermillip timaani Schweizerlandimiittoq qaqqaq  De Quervainsimit nalunaarsorneqarluni atserneqarsimasoq Grønlænder Fjeldet. Nunat Aqqinik Aalajangiisartunut ilaasortaq Eva Mätzler oqaluttuarpoq nammineq De Quervainip soraluaa ilisarisimallugu, De Quervainillu pappiaraaterpassui paaralugit. Taamaariarmat Nunat Aqqinik Aalajangiisartut aalajangiuppaat De Quervainip soraluaa paasiniaaffigineqaqqaassasoq Grønlænder Fjeldetimut tunngasunik allanik peqarnersoq paasiniarlugu. Eva Mätzler De Quervainip soraluaanut paasiniaasussanngorpoq.

 

  1. pillugu –

Nunat Aqqinik Aalajangiisartut allattaata ilisimatitsissutigivaa Mariane Petersen Nunat Aqqinik Aalajangiisartuni ilaasortanngortitaagaluartoq tunuarniuteqartoq.

Nunat Aqqinik Aalajangiisartut aalajangiuppaat tulliani septembarip 21-anni nal. 10 ataatsimiissallutik.

 

Aviaaja Rosing Jakobsen Niels Lorentzen

Siulittaasoq            Siulittaasup tullia

Johannes Rosing             Eva Mätzler

NAA-mi ilaasortaq            NAA-mi ilaasortaq