Oqaasiliortut 2019 – 6

OQAA – 171219

Oqaasiliortut ataatsimiinnerat 17.12.2019 nal. 9.30-12.00

Peqataasut:
Oqaasiliortunit: Mariia Simonsen, Karen Ramsøe aamma Hans Kristian Olsen.
Oqaasileriffimmit: Lisathe Møller, Katti Frederiksen kiisalu aternut tunngasuni Tikaajaat Kristensen aamma Ane-Mette B. Damgaard

Peqquteqarlutik peqataanngitsut: Knud Møller aamma Juaaka Lyberth.

Oqaluuserisassat:

1. Oqaluuserisassat akuerineqarnerat.
Oqaluuserisassani nr. 4, 5a, 5b aamma 9 kinguartinneqarput.

2. Kingullermik ataatsimiinnermit imaqarniliap akuerineqarnera.
Oqaasiliortut novembarip 7-anni 2019-imi ataatsimiinnerannit imaqarniliaq akuerineqarpoq.

3. Siulittaasumit Oqaasileriffimmillu ilisimatitsissutit. Oqaasileriffimmit ilisimatitsissutit allassimasut tusaatissatut tiguneqarput.

4. Siulittaasup tullissaanik qinersineq, suleriaaseq § 2.
Qinersinissaq kinguartinneqarpoq ilaasortat tamakkersimasariaqarmata.

5. Aalajangiivigisassat

a. Juaaka Lyberthip siunnersuutigisaa naqinneq /d/ Kitaamiut aqqini aamma atorneqarsinnaalernissaanik Oqaasiliortunut eqqartugassanngortitaa kinguartinneqarpoq.
b. Knud Møllerip siunnersuutigisaa nunap suatungaaniinneq apeqqutaatinnagu, Tunumiut Avanersuarmiullu naqinnernik d-mik aamma h-millu atuisinnaalernissaat pillugu Oqaasiliortunut eqqartugassanngortitaa kinguartinneqarpoq.

6. Duuda niviarsiaqqat aqqattut qinnutigineqartoq.
Duuda niviarsiaqqat aqqattut taama allallugu aterineqartussatut itigartitsissutigineqarpoq. Aqqit allattaaseq naapertorlugu allanneqartussaammata Tuuta akuerineqarpoq.
Duuda allamiut aqqannit pilerfeqarpat Kirkeministeriamut qinnutigineqarsinnaavoq.

7. Aalajangiivigisassat allat:

a. Atsiiniarnermi najoqqutassat allannguutissaattut siunnersuut akuerineqarpoq. Ilanngussaq 1-imi oqaaseq “Avanersuarmiut” atorneqassanersoq misissorneqassaaq, taamatullu Tunumiut aqqini d-p atorneqarsinnaanera pillugu nassuiaammik paasinarnerusumik ilanngussisoqarluni tullissaanimut piareersaasoqarnissaa isumaqatigiissutigineqarpoq.
b. Inuit aqqinik qinnuteqartoqartillugu atsiiniarnermi najoqqutassat malillugit itigartitsisoqassagaangat Oqaasileriffik pisinnaatinneqarusuppoq qinnuteqaatit taamaattut Oqaasiliortunut ingerlateqqinngikkaluarlugit itigartitsisinnaanissamut.
Oqaasiliortunut tamakkerpata tamanna eqqartorneqaqqissaaq aalajangiivigineqarlunilu. Aalajangernissamut tunngavissamik erseqqinnerusumik Oqaasileriffik piareersaateqassaaq.
c. Ataatsimiinnerup siulianit maannamut (08/11-2019-9/12-2019) inuit aqqi e-mailikkut suliarineqartut:

o Pipa 19/11 niviarsiaqqat aqqattut akuersissutigineqarpoq. Oqaasiliortunut ilaasortat tallimat tamarmik akuersipput.
o Minikka 15/11 niviarsiaqqat aqqattut akuersissutigineqarpoq. Oqaasiliortunut ilaasortat tallimat tamarmik akuersipput.
o Makki 26/11 niviarsiaqqat aqqattut akuersissutigineqarpoq. Oqaasiliortunut ilaasortat tallimat tamarmik akuersipput.
o Malouk 5/12, Kirkeministeriamut ingerlatinneqarpoq.

8. Kalaallisut taaguusigassat:
a. kalaallisut taaguutissat makku Oqaasiliortut akueraat:

delmål anguniakkat immikkoortut ilaat
verdensmål nunarsuarmi anguniagaq (qass. nunarsuarmi anguniakkat)
verdensmål for bæredygtig udvikling piujuartitsilluni ineriartortitsinermi nunarsuarmi anguniagaq (qass. piujuartitsilluni ineriartortitsinermi nunarsuarmi anguniakkat)
FN´s verdensmål for bæredygtig udvikling piujuartitsilluni ineriartortitsinermi FN-ip nunarsuarmi anguniagaa
(qass. piujuartitsilluni ineriartornermut FN-ip nunarsuarmi anguniagai)
FN´s verdensmål FN-ip nunarsuarmi anguniagaa
(qass. FN-ip nunarsuarmi anguniagai)

(FN = Naalagaaffiit Peqatigiit. FN-imik allassimasut Naalagaaffiit Peqatigiinnik taarserneqarsinnaapput, ass. Naalagaaffiit Peqatigiit nunarsuarmi anguniagaat,
piujuartitsilluni ineriartortitsinermi Naalagaaffiit Peqatigiit nunarsuarmi anguniagaat.
Maluginiarneqartariaqarpoq peqatigiit qasseersiutaammata FN-ilu ataasersiutaalluni.)

b. Oqaasiliortut ataatsimeeqataasut pingasuullutik infrastruktur pisortatigoortumik ima taaguuteqartussatut akuerivaat attaveqaasersuutit.
c. Oqaasiliortut sanitet pisortatigoortumik ima taaguuteqartussatut akuerivaat sukuluisaarneq.
d. Fake news & falsk brev.

i. Oqaasiliortut ataatsimeeqataasut fake news pisortatigoortumik ima taaguuteqartussatut akuerivaat nutaarsiassaq salluliuut (nutaarsiassat salluliuutit).
ii. Falsk brev qanoq isumaqarpiarnersoq paasiniarlugu Dansk Sprognævn saaffigineqareerpat eqqartorneqaqqissaaq.

9. Suliat allat pillugit ilisimatitsineq
Oqaasileriffiup tusagassiorfinnut kiffartuussinera pillugu Oqaasileriffimmi atorfillip Tikaajaat Kristensenip saqqummiinissaralua kinguartinneqarpoq,         isumaqatigiissutigineqarporlu saqqummiussassaa allaganngorlugu Oqaasiliortunut apuunneqassasoq.

10. Ataatsimiinnissap tulliata ullulerneqarnera.
Oqaasiliortut tulliani ataatsimiissapput pingasunngornermi februaarip 19-ianni 2020 nal. 9.30-12.00.

11. Tamalaat.
Hans Kristian Olsenip siunnersuutigaa ataatsimiinnermi pappiaqqat atugassat pdf-filinngorlugit ataatsimoortillugit Oqaasiliortunut nassiunneqartassasut. Tamanna naammassiniarneqassaaq.

 

Ataatsimiinnermi peqataasut:

Mariia Simonsen, siulittaasoq

Karen Ramsøe, ilaasortaq

Hans Kristian Olsen, ilaasortaq

Ataatsimeeqataanngitsut imaqarniliaq atuarsimallugu uppernarsarpaat:

Juaaka Lyberth, ilaasortaq

Knud Møller, ilaasortaq