Oqaasiliortut 2020 – 5

OQAA – 240920

Oqaasiliortut septembarip 24-anni 2020-mi ataatsimiinnerannit imaqarniliaq

Peqataasut:

Oqaasiliortut: Mariia Simonsen, Karen Ramsøe & Hans Kristian Olsen
Oqaasileriffimmit: Lisathe Møller & Katti Frederiksen

Pisinnaanatik nalunaarsimasut: Knud Møller & Juaaka Lyberth

Oqaluuserisassat:

1. Oqaluuserisassat akuerineqarnerat
2. Oqaasiliortut nævnitut pisinnaatitaaffiinut tunngasumik nassuiaateqartitsineq/Puju, Carl Christian Olsen
3. Kingullermik ataatsimiinnermit imaqarniliap akuerineqarnera
4. Siulittaasumit Oqaasileriffimmillu ilisimatitsissutit
5. Suliat allat pillugit ilisimatitsineq
   Inuit aqqi pillugit saaffiginnissutit.

6. Aalajangiivigisassat allat: Oqaasiliortut suleriaasissaat
7. Kalaallisut taaguusigassat:
   1. Taaguutip visitor centerip kalaallisut taaguusernissaa
   2. Taaguutip grundlovip kalaallisut taaguutaata eqqartorneqaqqinnissaa
   3. isikkamik arsarnermi taaguusersuutit akuerineqarnissaat
8. Ataatsimiinnissap tulliata ullulerneqarnera.
9. Tamalaat

 

Imaqarniliaq

1. Oqaluuserisassat akuerineqarnerat
   Oqaluuserisassat tulleriinneri allannguuteqartinneqarlutik akuerineqarput.

2. Oqaasiliortut nævnitut pisinnaatitaaffiinut tunngasumik nassuiaateqartitsineq/Puju, Carl Christian Olsen
   Oqaasiliortut siulittaasorisimasaat Oqaasiliortut ataatsimiinneranni Oqaasiliortut aalajangiisartutut  (nævn) atuuffeqarneranni pisinnaatitaaffiinik nassuiaateqartinneqarluni saqqummiisinneqarpoq.

3. Kingullermik ataatsimiinnermit imaqarniliap akuerineqarnera
   Kingullermik ataatsimiinnermit imaqarniliaq allannguuteqartinneqalaarluni akuerineqarpoq. Isikkamik arsarnermi taaguutit marluk ima allannguuteqartinneqarput:

• • angrebsåbning ima taaguuteqalerpoq: saassussinermi periarfissaq, imaqarniliamit uku peerneqarlutik; saassussinermi periarfissaqalerneq/saassussinermi periarfissaalersoq.
  • boldholder ima taaguuteqalerpoq: arsamik tigumiartoq, imaqarniliamit una peerneqarluni: arsamik tigumiaqartoq.

4. Siulittaasumit Oqaasileriffimmillu ilisimatitsissutit
   Oqaasileriffimmit ilisimatitsissutit allassimasut saqqummiunneqartullu tusaatissatut tiguneqarput.
5. Suliat allat pillugit ilisimatitsineq
   1. Inuit aqqi pillugit saaffiginnissutit tusaatissatut tiguneqarput.
6. Aalajangiivigisassat allat: Oqaasiliortut suleriaasissaat
   Ilinniartitaanermut, Kultureqarnermut Ilageeqarnermullu Naalakkersuisoqarfimmit Oqaasiliortut suleriaasissaat akuerisassatut nassiunneqartoq Oqaasiliortut siulittaasuannit Mariia Simonsenimit naqqissorneqassasoq aalajangiunneqarpoq. Oqaasiliortut suleriaasissaat (forretningsorden) naqqissorneqareerpat nassiussisunut uterteqqinneqassaaq kingornalu atsiorneqarluni.

7. Kalaallisut taaguusigassat:
   • Taaguutip visitor centerip kalaallisut taaguusernissaa
     Oqaasiliortut visitor center ima taaguuteqartussatut akuerivaat paasisassarsiorfik.
   • Taaguut grundlov Oqaasiliortunit ima kalaallisut taaguuserneqarluni akuerineqarnikuuvoq: inatsit tunngaviusoq. Taaguut taanna Inatsit tunngaviusoq pillugu Isumalioqatigiissitat allattoqarfiannit ippigineqarpoq, imalu taaguuserneqarnissaa siunnersuutigineqarluni: tunngaviusumik inatsit.
     Taaguut marlunnik oqaasertaqaraangat oqaaseq siulleq pingaarnertut inissisimasarpoq oqaatsillu tullia nassuiaatitut inissisimasarluni, tamanna tunngavigalugu taaguummik allanngortitsinissamut tunngavissaqartoqannginnera Oqaasiliortut erseqqissarpaat, taamaattumillu Oqaasiliortut grundlovimut taaguutitut akuereriigaat inatsit tunngaviusoq allanngortinneqassanngitsoq aalajangiusimaannarneqarluni.
   • isikkamik arsarnermi taaguusersuutit akuerineqarnerat

Isikkamik arsarnermi taaguutit makku akuerineqarput:

boldholder	arsamik tigumiaqartoq , arsamik tigumiartoq
angrebsåbning	saassussinermi periarfissaalersoq, saassussinermi periarfissaq
clearing	arsamik peersineq
defensiv	kinguarsimaneq
defensiv midtbanespiller	qeqqani kinguarsimanerusoq
delegerende	nammineersinnaatitsisoq
direkte frispark	toqqaannartumik isertitseriarsinnaaneq
direkte rødt kort	ingerlaannartumik anisitsineq
direkte udvisning	ingerlaannartumik anisitaaneq
diskvalificere	ilaajunnaarsippaa
dobbeltpres	arlariiulluni arsaarsiniaaneq
dommer	dommeri
dommerfløjt	siggarneq
dommerkast	dommerip aallartitsinera
doping	doping
dribling	arsamik ingerlatsineq
dybdeløb	arpalluni siuarneq
dække op	assersorpaa
en mod en defensivt	akeqqamik assersuineq
en mod en offensivt	akeqqamik qaangeeriarneq
erobringsspil	arsamik tiguaaniarneq
fairplay	unamminermi ileqqorissaarneq

 

8. Ataatsimiinnissap tulliata ullulerneqarnera.
   Oktobarip arfineq-pingajuat 2020 nal. 10-14 tulliani ataatsimiiffiussaaq.

9. Tamalaat.
   Oqaasiliortut tulliani ataatsimiinnissaanni taaguusersuutinik suliaqarnermi suleriaatsinik ilisimasalik Oqaasiliortunullu allattaasoq Lisathe Møller saqqummiissasoq ilisimatitsissutigineqarpoq.

 

 

Ataatsimiinnermi peqataasut:

Mariia Simonsen, siulittaasoq

Karen Ramsøe, siulittaasup tullia

Hans Kristian Olsen, ilaasortaq

 

Ataatsimeeqataanngitsut imaqarniliap atuarsimaneranik uppernarsaallutik atsiortut:

Knud Møller, ilaasortaq

Juaaka Lyberth, ilaasortaq