Nunat Aqqinik Aalajangiisartut 2025-2

NAA – 17.06.25

NUNAT AQQINIK AALAJANGIISARTUT ATAATSIMIINNERAT

Marlunngorneq 17.06.2025, nal. 13-16, Oqaasileriffimmi

PEQATAASUT

Nunat Aqqinik Aalajangiisartut: Aviâja Rosing Jakobsen,  Niels Lorentzen & Frederik Larsen

Peqquteqarlutik peqataanngitsut: Kelly Berthelsen & Josephine D. Munch

Oqaasileriffimmit: Beatrine Heilmann (pisortaq), Arnaq B. Johansen (allatsi), Malu Jessen Berthelsen (nunat aqqinik sulialik, allatsi)

OQALUUSERISASSAT

1. Oqaluuserisassat akuerineqarnerat
2. Kingullermik ataatsimiinnermit (24.04.2025) imaqarniliap akuerineqarnera
3. Siulittaasumit Oqaasileriffimmillu ilisimatitsissutit
   
   1. Siulittaasumit ilisimatitsissutit
   2. Oqaasileriffimmit ilisimatitsissutit
4. Ilaasortanit siunnersuutinik suliaqarneq
5. Aalajangiiffigisassanik allanik suliaqarneq
   
   1. Itersalissuit (qaqqaq, saqqaani pingasunik putoqarpoq)(Paamiuni nunap aqqata misissoqqitassanngortitap suliarinera)
   2. Tulugarsuit (qaqqaq aamma kangerluk Paamiut eqqannguaniittut imminnut qanittut qulakkiigassat)
   3. Anittoq (imartaq)(Qaanaap eqqaani imartap aqqa misissoqqitassanngortitap suliarinera)
   4. Qinnuteqaat: Amaqqup Kigutaa (qaqqaq)
   5. Nunat aqqinik akuersisarnermut toqqammaviup nutarternerata akuerisassanngortinneqarnera
   6. Narsartarsuaq (Paamiuni nunap aqqa)
   7. Sanningajaarsuit (Paamiuni nunap aqqa)
6. Suliat allat pillugit paasissutissiineq
   
   1. Aatsitassanut Aqutsisoqarfimmit tusarniaanerit
   2. Imaqarnilianik 2019-2025-meersunik ataqatigiissaarineq
7. Tulliani ataatsimiinnissamik ulluliineq
8. Tamalaat

Ilaliussat:

• Ilaliussaq 1
• Ilaliussaq 2
• Ilaliussaq 3
• Ilaliussaq 4
• Ilaliussaq 5
• Ilaliussaq 6
• Ilaliussaq 6a
• Ilaliussaq 7
• Ilaliussaq 8
• Ilaliussaq 9

IMAQARNILIAQ

1. Oqaluuserisassat akuerineqarnerat
   • Oqaluuserisassat 5f-imik aamma 5g-mik ilallugit akuerineqarput.
2. Kingullermik ataatsimiinnermit (24.04.2025) imaqarniliap akuerineqarnera
   • Imaqarniliaq akuerineqarpoq.
3. Siulittaasumit Oqaasileriffimmillu ilisimatitsissutit
   
   1. Siulittaasumit ilisimatitsissutit
      • Soqanngilaq.
   2. Oqaasileriffimmit ilisimatitsissutit
      • Ilisimatitsissutit tusaatissatut tiguneqarput.
4. Ilaasortanit siunnersuutinik suliaqarneq
   • Soqanngilaq.
5. Aalajangiiffigisassanik allanik suliaqarneq
   
   1. Itersalissuit (qaqqaq, saqqaani pingasunik putoqarpoq)(Paamiuni nunap aqqata misissoqqitassanngortitap suliarinera)

      • Kingullermik ataatsimiinnermi qaqqap sumiiffia qulakkiigassanngortinneqarmat misissuineq ingerlaqqinnikuuvoq.

        Uani suliami ilaasortaq Niels Lorentzen saqqummiivoq.

        Kommuneqarfik Sermersoop suleqatigiissitaq pilersitaa suleqatigalugu nunat aqqinik inississuinermi sumiiffiata nalunaarsorneqarnera eqqortuusoq qulakkeerneqarpoq (Ilaliussaq 1 takuuk). Paasissutissiisut, Nielsip apersugai angutit utoqqaat 80-it missaanni ukiullit, ikinnerpaamik pingasut tamarmik assigiimmik uppernarsaapput. Oqaasileriffimmit nunap assingi nassiunneqartut atorlugit allattuisimapput apersugaallu nunap assingani nassiunneqartuni ilaanngitsunik aamma taajuipput (Takuuk pkt. 5f & 5g aamma Ilaliussaq 3 & 4).

        Paasissutissiisut kissaataat malillugu Oqaasileriffimmit nunap assinginik Niels Lorentzen nassinneqassaaq nalunaarsugaatigineqanngitsut nalunaarsorneqarniassammata.

        Nunat aqqi taajorneqartut nunat aqqinik allattorsimaffimmi nalunaarsugaatigineqanngimmata matumani oqaluuserisani immikkoortuni 5f-imi aamma 5g-mi akuerineqarneri atuarneqarsinnaapput.

      • NAA-nit akuerineqartoq tassaavoq:
        • Itersalissuit (qaqqaq pingasunik putulik)(Ilaliussaq 2 takuuk).
   2. Tulugasuit (qaqqaq aamma kangerluk Paamiut eqqannguaniittut imminnut qanittut qulakkiigassat)

      • Kingullermik ataatsimiinnermi Tulugarsuit (kangerluk) akuerineqarpoq (Ilaliussaq 5 takuuk).

        Oqaasileriffimmit nalunaarsuiffimmut ikkunneqarmat maluginiarneqarpoq kangerluk qaqqajunnarlu imminnut qanittut ateeriittut (Ilaliussaq 6 takuuk). Tamanna pillugu Niels Lorentzen attavigineqarpoq matumanilu ataatsimiinnermi misissuinini pillugu saqqummiilluni nassuiarlugulu inuit marluk apersorsimallugit.

        Suleqatigiissitami Paamiuni illoqarfimmi allagartalersuinissaq pillugu suleqatigiinnermi nunap assingani atorneqartumi inissinnerlunneqarsimavoq aammalu qaqqajunnap nalaa ersinnani.

        Qaqqajunnaq upalungaarsimaniarneq pillugu pilersinneqarnikumik illuaraqarpoq. Qaqqajunnaq illuaralik tassaavoq Tulugarsuit. Kangerluk taama ateqanngilaq utoqqaalli apersorneqartup sorsunnersuup aappaata ingerlanerani susoqarfiusimanerarpaa aqqali eqqaamanagu.

      • NAA saqqummiinermi nassuiaatigineqartut pillugit ima aalajangiipput:

        • Kangerluup aqqa Tulugarsuit titartarneralu peerneqassapput. (Ilaliussaq 6a takuuk).

        • Qaqqajunnap aqqa Tulugarsuit pillugu paasissutissiisussamik ataatsimik Oqaasileriffimmit ujaasisoqassaaq.

   3. Anittoq (imartaq)(Qaanaap eqqaani imartap aqqa misissoqqitassanngortitap suliarinera)

      • Kingullermik ataatsimiinnermi immap aqqa Anittoq (imartaq) akuerineqarpoq kissaatigineqarlunili nalunaarsukkani avammut saqqummiutinnginnerani annertussusaa misissuiffigineqassasoq.

        Kingullermik ataatsimiinnermi paasissutissiisut ilaat attavigineqaqqinnikuuvoq imalu oqarasuaatikkut nassuiaalluni: “Sikuutillugu anilloq imarortuaannartoq – sumiiffeqaqqissaanngilaq sikumit sequtserneqartarmat. Anillorsuarmik ilaasa taajulertarpaat. Avataani sikup aniaffigisartagaa. Immap siku nusuttaramiuk – sikup avalakaaffia anillormik taasarpaat” (Ilaliussaq 7 takuuk).

      • NAA saqqummiinermi nassuiaatigineqartut pillugit ima aalajangiipput:

        • Misissoriarlugu missingiussamik titartarneqassaaq.

          Misissuinermi Pikialasorsuaq pillugu ilisimaneqartut isumassarsiorfittut atorneqarsinnaasut ilaasortat kissaatigaat Anittup Pikialasorsuullu imminnut assinguneri pillugit. Qaanaami aalisartut piniartullu peqatigiiffiat missingiiniarnermi attavigineqassapput.

          Sumiiffiisa nikissinnaaneri NAA-nit eqqumaffigineqarput allannguuteqarsimappatalu titartarneri nalimmassarneqarsinnaasut erseqqissaatigaat.

   4. Qinnuteqaat: Amaqqup Kigutaa (qaqqaq)

      • Qaqqat ilaat Nanortallip avannaaniittumi qeqertami Sermersuumiittoq ateqanngimmat nunatta avataaneersumit qinnutigineqarpoq ima atserneqassasoq “Amaqqup Kigutaa” (Ilaliussaq 8 takuuk).

        Oqaasileriffimmi nunat aqqisa nalunaarsorsimaffianni qaqqaq taanna aamma ateqanngimmat Kommune Kujalleq ikiorsiullugu misissuineq ingerlanneqarpoq. Paasisat aallaavigalugit qaqqaq atserneqartussatut qinnutigineqartoq ateqartinneqanngilaq.

        Misissuinerup takutippaa qaqqap qinnutigineqartup qanittuaniittoq qaqqaq Nanortalimmi utoqqarnit ima ateqartinneqartoq: “Qalersarsuit”. Aqqa qasseersiummik naaneqaraluartoq qaqqaq inngilik ataaseq pineqarpoq (IIaliussaq 9 takuuk).

      • NAA saqqummiinermi nassuiaatigineqartut pillugit ima aalajangiipput:

        • Qinnuteqaat itigartinneqassaaq uku tunngavigalugit:

          • Uppernarsaatit amigarmata
          • Akuersisarnermut toqqammavik tamakkiisumik malinneqanngimmat

          Qaqqat sumiiffiup nalaaniittut qanoq ateqartinneqarnersut qulakkeerniarlugit misissoqqitassanngussapput.

          ‘Qalersarsuit’ qasseersiutaammat qaqqarlu ataaseq pineqarluni misissoqqitassanngussaaq.

   5. Nunat aqqinik akuersisarnermut toqqammaviup nutarternerata akuerisassanngortinneqarnera
      • NAA saqqummiinermi nassuiaatigineqartut pillugit ima aalajangiipput:

        • Akuersisarnermut toqqammavimmut ilanngunneqartussatut aalajangersakkat -nut matuma ataani allassimasoq ilanngunneqassaaq:

           “Nunat aqqinik atsersuisarnermi siunnersuutinut akuerineqarsinnaanngitsunut tunngaviit aalajangersakkat”:

          • Nunap atissaatut siunnersuut nakkarsaatitut racenilluunniit nikassaatitut imaqarpat.

          Taakku saniatigut NAA-kkut eqqartuereerlutik aalajangerput nunat aqqi  kalaallisuujunngitsut nikassaarpalaartut piiarneqassasut kiisalu piiakkat taarserneqassasut nalerarineqartarmata.

          Kalaallit Nunatsinni suliffeqarfiit Kalaallit Nunaata avannaarsuanut angalatitsisartut nunap atissaanik siunnersuusiortitsisinnaapput, piumasarineqassaarli uku malinneqassasut:

          • kalaallit atsersueriaasiat
          • kalaallit kulturiminni atsersueriaasiat
          • siulitta atsersueriaasiat
          • kalaallit oqaluttuarisaanerat
          • kalaallit oqaluttuatoqaataanneersut
          • paasisat nutaat oqaluttuarisaanermut tunngasut
   6. Narsartarsuaq (Paamiuni nunap aqqa)

      • Niels Lorentzenip saqqummiinermini nunat aqqi Oqaasileriffimmi nalunaarsugaatigineqanngitsut nalunaarsugassat taavai. Ilisimannittut minnerpaamik pingasut assigiimmik Narsartarsuaq sumiiffialu taasimavaat.

        Nalunaarsukkani narsaq Peters Slette-tut nalunaarsorsimasoq kalaallisut Narsartarsuarmik ateqarnerarpaat.

      • NAA-nit akuerineqartoq tassaavoq:

        • Narsartarsuaq (narsaq) (Ilaliussaq 3 takuuk). Qallunaatut aqqata nalunaarsorsimaffianut kalaallisut aqqa ikkunneqassaaq sumiiffianullu eqqortumut nuullugu.

   7. Sanningajaarsuit (Paamiuni nunap aqqa)

      • Niels Lorentzenip saqqummiinermini nunat aqqi Oqaasileriffimmi nalunaarsugaatigineqanngitsut nalunaarsugassat taavai. Ilisimannittut minnerpaamik pingasut assigiimmik qaqqaq Sanningajaarsuaq sumiiffialu taasimavaat.

      • NAA-nit akuerineqartoq tassaavoq:

        • Sanningajaarsuit (qaqqaq) (Ilaliussaq 4 takuuk).

6. Suliat allat pillugit paasissutissiineq
   
   1. Aatsitassanut Aqutsisoqarfimmit tusarniaanerit

      • Paasissutissiinerit tusaatissatut tiguneqarput.

   2. Imaqarnilianik 2019-2025-meersunik ataqatigiissaarineq
      • Paasissutissiinerit tusaatissatut tiguneqarput.
7. Tulliani ataatsimiinnissamik ulluliineq

   • Ataatsimiinnerup tullia pissaaq sisamanngorneq 16. oktober 2025, nal. 13-16, Oqaasileriffimmi.

8. Tamalaat

   • Ilisimatitsissutigineqarpoq 2026-mi ilaasortassanik nutaanik toqqaasoqaqqittussaasoq.

Nunat Aqqinik Aalajangiisartut

• Aviâja Rosing Jakobsen (siulittaasoq)
• Kelly Berthelsen (siulittaasup tullia)
• Niels Lorentzen (ilaasortaq)
• Josephine D. Munch (ilaasortaq)
• Frederik Larsen (ilaasortaq)