Oqaasiliortut 2022-12

OQAA – 241022

 

OQAASILIORTUT ATAATSIMIINNERAT

– ataasinngorneq 24/10-2022, nal. 13-16, Oqaasileriffimmi

PEQATAASUT Oqaasiliortunit

• Mariia Simonsen (siulittaasoq), Karen Ramsøe (siulittaasup tullia), Dorthe Kielsen, Ono Fleischer aamma Abia Abelsen

Oqaasileriffimmit

• Beatrine Heilmann (allatsi)

OQALUUSERISASSAT

1. Oqaluuserisassat akuerineqarnerat
2. Kingullermik ataatsimiinnermit (19/09-2022) imaqarniliap akuerineqarnera
3. Siulittaasumit Oqaasileriffimmillu ilisimatitsissutit
   1. Oqaasileriffimmit ilisimatitsissutit
   2. Siulittaasumit ilisimatitsissutit
4. Kalaallit aqqinik siulequtaasunik akuereqquneqartunik suliaqarneq
5. Ilaasortanit siunnersuutinik suliaqarneq
   1. Oqaatsit pillugit isumasioqatigiinneq
6. Suliat allat pillugit ilisimatitsineq
   1. Inuit aqqi pillugit saaffiginnissutit
7. Suliat aalajangiiffigisassat suliarineqarnerat
   1. Taaguusersuuserineq

Tusagassiornermi taaguusersuutinik aalajangersaaneq

1. 2. Taarsiullugu oqaasilianik aalajangersaaneq

Oqaatsinik eqqussanik kalaallisut taarsiullugit oqaasilianik aalajangersaaneq

8. Ataatsimiinnissap tulliata ullulerneqarnera
9. Tamalaat

IMAQARNILIAQ

1. Oqaluuserisassat akuerineqarnerat

Oqaluuserisassat allanngornagit akuerineqarput.

2. Kingullermik ataatsimiinnermit (19/09-2022) imaqarniliap akuerineqarnera

Kingullermik ataatsimiinnermit imaqarniliaq akuerineqarpoq.

3. Siulittaasumit Oqaasileriffimmillu ilisimatitsissutit
   1. Oqaasileriffimmit ilisimatitsissutit

Oqaasileriffimmit ilisimatitsissutit tusaatissatut tiguneqarput.

1. 2. Siulittaasumit ilisimatitsissutit

Siulittaasumit ilisimatitsissutissanik soqanngilaq.

4. Kalaallit aqqinik siulequtaasunik akuereqquneqartunik suliaqarneq

Aqqit akuerineqartut:

• • Nukappiaqqanut atertut akuerineqartoq:
    • Uukkaaq (03.10.2022)

5. Ilaasortanit siunnersuutinik suliaqarneq
   1. Oqaatsit pillugit isumasioqatigiinnermik nalilersuineq

Ilinniartitaanermut, Kultureqarnermut, Timersornermut Ilageeqarnermullu Naalakkersuisup Peter P. Olsenip oqaatsit pillugit isumasioqatigiissitsineranut Oqaasiliortut peqataasut nalilersuipput. Oqaasiliortut isumasioqatigiinneq tamakkiisumik pissarsinartutut isigaat isumaqarlutillu oqaatsinik suliaqartut assigiinngitsut ataqatigiinnerullutik ingerlariaqqikkusuttut, qujanarnerpaasorli ullumikkut killiffitsinnut tunngasorpassuit eqqartorneqarmata.

Oqaasiliortut isumaqarput tulliani sulianik saqqummiussinissami Savalimmiormiut qallunaallu oqaasiliortoqarfiinit saqqummiunneqartut isumassarsiorfigilluarneqarsinnaasut. Oqaasiliortut uggoraat oqaatsit pillugit inatsisit isumasioqatigiissitsinermi annertunerusumik saqqummiunneqannginnerat.

Oqaasiliortut innersuussutigaat tulliani oqaatsit pillugit ataatsimeersuartoqalerpat radiukkut aamma nittartakkakkut avataanit malinnaasoqarsinnaanera periarfissarsiuunneqassasoq.

Oqaasiliortut Oqaasileriffik peqatigalugu periusissatut iliuusissatullu pilersaarutaanik nalilersueqqinnissaq Oqaasiliortut ataatsimiinnissaanni tullermi pissaaq nalilersueqqinnermilu oqaatsinik atuisunik kiffartuussinissaq pillugu suliniutissat pingaarnertut inissinneqassasut Oqaasiliortut isumaqarput. Periusissiamik nalilersueqqinnissamut piareersaatissat ilagissavaat iliuusissatut pilersaarutinut sanilliugu Oqaasileriffiup killiffiata nassuiaateqarfigineqarnissaa.

Nalilersueqqinnermi ilanngullugit eqqartorneqassapput oqaatsit pillugit isumasioqatigeereernerup kingorna isumassarsiat tunngavigalugit pingaarnersiuinerit allanngortinneqassanersut, kiisalu suut allat suliassat ilanngunneqassanersut. 

6. Suliat allat pillugit ilisimatitsineq
   1. Inuit aqqi pillugit saaffiginnissutit

Inuit aqqi pillugit saaffiginnissutinik ilisimatitsissutit tusaatissatut tiguneqarput.

7. Suliat aalajangiiffigisassat suliarineqarnerat
   1. Taaguusersuuserineq

Tusagassiornermi taaguusersuutinik aalajangersaaneq

Tusagassiornermi taaguusersuuserineq Oqaasiliortunit aallartinneqarpoq taaguusersuutinilli eqqartuinerup ingerlanerani ersarissimmat immikkut ilisimasallit pisariaqartinneqartut taaguusersuuserinissat kinguartinneqarput. Oqaasiliortut kissaatigaat immikkut ilisimasallit pingasut suleqatigiissasut kingornalu aatsaat Oqaasiliortut akuersinissat ingerlateqqissagaat.

Ataatsimiinnermi tusagassiornermi taaguutit aalajangersarneqartut (naqinnerit silittunik allassimasut) tassaapput:

Qallunaatuut	Kalaallisut
afsender	nassitsisoq (Oqaasiliortunit 09.10.12-imi akuerisaq attatiinneqarneqarpoq)
agurketid	imassaaleqineq; imassaasuaneq (imassaasuaneq Oqaasiliortunit 09.10.12-imi akuerisaq attatiinneqarneqarpoq, aapperneqarlunili)
aktindsigt	allagaatinik takunnissinnaatitaaneq
aktualitet	oqallisaaneq (maanna sammisat Oqaasiliortunit 09.10.12-imi akuerisaq atorunnaarsinneqarpoq)
aktuel; relevant	naleqquttoq
aktuel; foreliggende	massakkorpiaq oqallisaasoq
almindelig stil	oqaatsit nalinginnaasut (Oqaasiliortunit 09.10.12-imi akuerisaq attatiinneqarneqarpoq)

1. 2. Taarsiullugu oqaasilianik aalajangersaaneq

Oqaatsinik eqqussanik kalaallisut taarsiullugit oqaasilianik aalajangersaanernik soqanngilaq.

8. Ataatsimiinnissap tulliata ullulerneqarnera

Ataatsimiinnerup tullia pissaaq pingasunngornermi 16/11-2022-mi nal. 13.00-imit 16.00-imut.

9. Tamalaat

Oqaasileriffik Tunumiusut sumiorpaluutit pillugit suleqatissarsiortumik pulaartoqarsimasoq allatsip ilisimatitsissutigaa. Tunumiusut sumiorpaluutinik allanniarnermi allattaatsip ataatsimoorussap malittarisassai malillugit allanniarnerit ulluinnarni ajornartorsiutigineqartarput Tunumiusut nipit atuisunit assigiinngissitaartumik allanneqartarlutik, tamatumalu saniatigut allassimasut Kitaamiunit kukkusumik taallugit atuarneqartarlutik, maannalu inuusunnerusut Tunumiusut oqaasillit ilanngullutik allassimasut allattaatsimut ataatsimoorussamut naleqqussakkat malillugit taasisartut akulikinnerulersimallutik, ilaatigut Kitaamiusut sumiorpaluutinit sunnerneqarnertik pissutigalugu.

Oqaasileriffik Oqaasiliortut sinnerlugit tamanut ilisimatitsissuteqassaaq Tunumiusut Avanersuarmiusullu sumiorpaluutit pillugit suliassanik anguniagassanillu peqarnera Oqaasiliortunit arajutsisimaneqanngitsoq ersarissarlugu, tamakkulu Oqaasiliortut ataatsimiinneranni akulikitsumik eqqartorneqartartut.

Oqaasiliortut kissaatigaat siunissami qulaajaanernik misissuinissat pissasut, tassa sumiorpaluutit assigiinngitsut qanoq sukkullu assigiissuteqarlutillu assigiinngissuteqarnersut misissorneqarluni aamma allattaatsimut ataatsimoorussamut tunngatillugu sumiorpaluutit qanoq periarfissaqarnersut periarfissaqannginnersulluunniit qulaajarneqarluni. Oqaasiliortut siunissami misissuisoqarnissaa kissaatigaat pingaartikkamikku allattaatsip malittarisai oqallisigineqassatillugit, isummerfigineqassatillugit aalajangersaaffigineqassatillugilluunniit misissukkanik tunngavilinnik oqallinnerit, isummersornerit aalajangersaanerillu pisarnissaaat.

Ataatsimiinnermi peqataasut

• • Mariia Simonsen (siulittaasoq)
  • Karen Ramsøe (siulittaasup tullia)
  • Ono Fleischer (ilaasortaq)
  • Dorthe Kielsen (ilaasortaq)
  • Abia Abelsen (ilaasortaq)