Oqaasiliortut 2024-2

OQAA – 31012024

OQAASILIORTUT ATAATSIMIINNERAT (2024-2)

– pingasunngorneq 31/01-2024, nal. 13-16, Oqaasileriffimmi

PEQATAASUT

Oqaasiliortunit:

• Mariia Simonsen (siulittaasoq), Karen Ramsøe (siulittaasup tullia), Ono Fleischer, Abia Abelsen & Dorthe Kielsen (ilaasortat).

Oqaasileriffimmit:

• Helle Hammeken-Holm (allatsi) & Beatrine Heilmann (pisortaq).

OQALUUSERISASSAT

1. Oqaluuserisassat akuerineqarnerat
2. Kingullermik ataatsimiinnermit (10/01-2024) imaqarniliap akuerineqarnera
3. Siulittaasumit Oqaasileriffimmillu ilisimatitsissutit
   1. Oqaasileriffimmit ilisimatitsissutit
   2. Siulittaasumit ilisimatitsissutit
4. Kalaallit aqqinik siulequtaasunik akuereqquneqartunik suliaqarneq
5. Suliat aalajangiiffigisassat
   1. Taaguusersuuserineq
      1. Qallunaatut taaguutit passiv redskab aamma aktiv redskab kalaallisut taaguutissaanik aalajangersaaneq.
      2. Tusagassiutilerinermi taaguusersuutinik aalajangersaaneq.
6. Ilaasortanit siunnersuutinik suliaqarneq
7. Suliat allat pillugit ilisimatitsineq
   1. Inuit aqqi pillugit saaffiginnissutit
8. Avammut nalunaarutit
9. Ataatsimiinnissap tulliata ullulerneqarnera
10. Tamalaat

IMAQARNILIAQ

1. Oqaluuserisassat akuerineqarnerat
   • Oqaaluuserisassat allanngornagit akuerineqarput.
2. Kingullermik ataatsimiinnermit (10/01-2024) imaqarniliap akuerineqarnera
   • Kingullermik ataatsimiinnermit imaqarniliaq akuerineqarpoq.
3. Siulittaasumit Oqaasileriffimmillu ilisimatitsissutit
   
   1. Oqaasileriffimmit ilisimatitsissutit
      • Oqaasileriffimmit ilisimatitsissutit tusaatissatut tiguneqarput.
      • Oqaasileriffimmi atorfillit Oqaasiliortullu naapeqatigiisinneqassapput ulloq 08/02-2024. 16/01-2024-imi Naalakkersuisumit pulaartoqarnermi isumaqatigiissutaavoq Oqaasiliortut Oqaasileriffillu peqatigiillutik Naalakkersuisoqarfimmut anguniagassat pillugit saaffiginnissuteqassasut.  Naalakkersuisoqarfimmut saaffiginnissutissat naapeqatigiinnermi isumaqatigiissutigineqassapput.
   2. Siulittaasumit ilisimatitsissutit
      • Soqanngilaq.
4. Kalaallit aqqinik siulequtaasunik akuereqquneqartunik suliaqarneq
5. Suliat aalajangiiffigisassat suliarineqarnerat
   
   1. Taaguusersuuserineq
      
      1. Qallunaatut taaguutit passiv redskab aamma aktiv redskab kalaallisut taaguutissaannik aalajangersaaneq:
      2. Qallunaatut taaguutit aalajangiiffigineqarput ima kalaallisut taaguuteqalersillugit:
         • piniut nivingatittagaq (passiv redskab) (qass. piniutit nivingatittakkat = passive redskaber), [aalisarnermi atortut, soorlu ningittakkat, pullatit qassutilluunniit immap iluanut ningeriarlugit qaqinneqarnissamik tungaanut uninngaartittakkat].
         • piniut kalittagaq (aktiv redskab) (qass. piniutit kalittakkat = aktive redskaber), [aalisarnermi atortut, soorlu qalorsuit, immap iluanut ningeriarlugit ingerlaartillugit kalittakkat].
      3. Tusagassiutilerinermi taaguusersuutit aalajangersaaffigineqarnerat
         • Tusagassiutilerinermi taaguutit aalajangersarneqartut tulliuttuni takusassiarineqarput.

6. Ilaasortanit siunnersuutinik suliaqarneq
   • Soqanngilaq.
7. Suliat allat pillugit ilisimatitsineq
   
   1. Inuit aqqi pillugit saaffiginnissutit
      • Tusaatissatut tiguneqarput.
8. Avammut nalunaarutit
9. Ataatsimiinnissap tulliata ullulerneqarnera
   • Ataatsimiinnerup tullia pissaaq pingasunngorneq 15/02-2024, nal. 13-16, Oqaasileriffimmi.
10. Tamalaat
    • Killiffilersuutinik suliaqarnermi killiffik eqqartorneqarpoq. Suliassat allat pillugit suliaq uninngagallarpoq, avammulli suliakkiutigineqarsinnaanera periarfissatut Oqaasileriffimmit eqqaaneqarpoq suliap ingerlaqqinnissaa pingaarmat Oqaasileriffillu periarfissarsiussaaq.

Ataatsimiinnermi peqataasut:

• Mariia Simonsen (siulittaasoq) 
• Karen Ramsøe (siulittaasup tullia)
• Dorthe Kielsen (ilaasortaq)
• Abia Abelsen (ilaasortaq)
• Ono Fleischer (ilaasortaq)