Oqaasiliortut tallimanngornermi februaarip ulluisa 16-ianni 2001-imi, nal. 14.00 ataatsimiinnerannit imaqarniliaq.
Peqataasut: Carl Chr. Olsen, Alibak Steenholdt, Nuka Møller aamma Sofia Geisler, allatsigalugu Kristine Olsvig. Kelly Berthelsen angalanini peqqutigalugu peqataanngilaq. Lene Kielsen Holm tusarnaartutut peqataavoq.
Oqaluuserisat:
-
Oqaluuserisassanut qulequttanik akuersineq.
-
Februaarip ulluisa aappaanni ataatsimiinnermit imaqarniliamut akuersineq.
-
Ilisimatitsissutit.
-
Oqaasiliortut suleriaasissaannut siunnersuutit.
-
Ordbogit, Erik Fleischerillu nalunaarsugai.
-
Taasariaqartut allat.
– 1 pillugu –
Siulittaasumit ilisimatitsissutit oqaluuserisassanut ilanngunneqarnerata kingorna oqaluuserisassat akuerineqarput.
– 2 pillugu –
Februaarip ulluisa aappaanni ataatsimiinnermit imaqarniliamut makku naqqiissutigineqarput: Quppernerit aappaanni, titarnertaap arfernata ilaani allassimasoq “pillugit” iluarsissaaq imaalillugu: pillugu.
Quppernerit sisamaanni AS-ip Naalagaaffiup Sinniisoqarfianut erseqqissaasiornissaa paatsooqatigiinnermik tunngaveqarunarpoq. AS misissueriarluni paasisaminik Oqaasiliortunut saqqummiissasoq taamaallaat eqqartorneqarpoq.
Quppernerit arfernanni, titarnertaap sisamaata ilaani allassimasoq “ataasiinnarnik oqaasillit” iluarsissaaq imaalillugu: kalaallisuinnaq oqaasillit.
– 3 pillugu –
AS.: Adoption pillugu misissuisimanerminit nalunnarusiani saqqummiuppaa, siunnersuutigalugulu qitornaq atorneqassasoq, meeraq pinnagu. Meeraq tassaavoq kinaluunniit
inuusuttuunanilu inersimasuunngitsoq. Inatsimmi 1976-imeersumi allassimavoq “qitornarsiartaarneq”. 1980-ikkulli ingerlaneranni inatsimmi allassimanera allangortinneqarsimavoq imaalillugu “qitornavissiartaarneq”.
SG.: Inatsit kisiat eqqarsaatigalugu allassimasutigut qitornavissiaq taamaallaat atorneqarsinnaavoq, oqalunnikkulli atorneqarsinnaanngilaq. Inuit ilaasa qitornarsiatik namminneq “qitornaq”-minnik taasarpaat, “-siaq” ilanngunnagu.
CCO.: Oqaaseq adopt latinerisuumit tigusaavoq, isumaqarlunilu: akueralugu.
Allakkami aamma uparuarneqartariaqarpoq oqaaseq: aappariit. Ukiuni kingullerni inuk aappaqanngikkaluartoq qitornarsiartaarsinnaalermat oqaaseq aappariit naleqqukkunnaarpoq. Taamaattumik allanngortillugu imaalisariaqarpoq: angajoqqaatut pisinnaatitaaffeqartut/-toq.
Oqaasiliortut aalajangerpaat AS CCO-ilu Isumaginninnermut Suliffeqarnermullu Pisortaqarfimmut, naqqiissutissat ilanngullugit qitornarsiartaartarneq pillugu allagaqassasut.
CCO.: Avannaamioqatigiit Oqaatsinut Siunnersuisoqatigiiffiannut ilaasortamut sinniisussaq AS-iussanersoq imaluunniit NM-iussanersoq tusannginnamiuk, sapaatip akunnerata uuma ingerlanerani Nordisk Sprogrådimi ataatsimiinnerminni sinniisussamik allanngortoqarneranik nalunaaruteqanngilaq.
Nordisk Ministerråd Kalaallit, Islandimiut, Savalimmiormiut Saamillu oqaasiinut suliaqartunut ukiumut 800.000,00 koruunit ordbogiliornermut atugassatut qinnuteqarnikkut agguarneqarsinnaasunik aningaasaliissuteqarpoq. Ukioq mannamiit ukiut tulliuttut pingasut ukiumut 800.000,00 koruunit agguaassassatut immikkoortinneqarput.
Malunnarpoq Nordisk Ministerrådimit småsprogitut inissisimasut isiginiarneqarnerulersimasut. Taamaattumik CCO-ip naqitaq “Nordisk mødeterminologi” Oqaasiliortunit misissuataarnissaa innersuussutigaa, Nordisk Sprogmødemi kalaallisut allassimanera ilanngunneqartussaammat. CCO-ip danskisut allassimanera malillugu siunnersuusiorpoq, februaarip naalernerani naqitamut ilanngutassatut nassiunneqartussamik. Siunnersuusiaq AS-imut nalilersorteriarlugu Oqaasiliortut ilaasortaannut ilisimatitsissutigineqassaaq.
– 4 pillugu –
CCO.: Oqaasiliortunit avammut attaveqarniarneq nukinnillu atorluaanissaq eqqarsaatigalugu AS Oqaasiliortunut allatsinngussasoq siunnersuutigaa, KO-illi ataatsimiinnerni imaqarniliortarnini ingerlatiinnassagaa erseqqissaatigalugu.
SG.: AS-ip misissugassat pisortaqarfinnullu allagaqaatit assigiinngitsut isumagisassavai.
AS.: Siunnersuut akuersaarpaa aammalu misissugassaqartilluni Oqaasiliortut ilaasortaat, pisariaqartitsineq naapertorlugu, sukkulluunniit attavigineqarsinnaanissaat pingaartillugu eqqaavaa.
KO.: Oqaasiliortut ilaasortaasa oqaluuserisassanut siunnersuutinik ilanngussisalernissaannik ujartuivoq.
NM.: Oqaasiliortut suleqatiserai, Oqaasiliortut nittartagassaata imarisassaanik isikkussaanillu ilusiliinissamut pilersitsiniarnermut peqatiserinnilluni.
CCO.: Oqaasileriffimmit Toornaq Consulting A/S nittartakkamik pilersitsinissamut neqeroorusioqquneqarpoq. Nittartagassap allaffeqarfik Oqaasileriffik qulequtarissavaa makkuninngalu immikkoortortaqassaaq:
-
Oqaasiliortut,
-
Nunat Aqqinik Aalajangiisartut,
-
Inuit Aqqinik Akuersisartut,
-
Nordisk Sprogråd il.il.
– 5 pillugu –
CCO.: Atuakkiorfiup pisortartaava ataatsimeeqatigisimavaa.
Oqaatsit tuluttuumiit qallunaatuumut nutsikkat suliaareersut tunngavigalugit tuluttuumiit kalaallisuumut ordbogiliornissaq Atuakkiorfimmit siunnersuutigineqarpoq. Siunnersuummut tunngatillugu eqqumaffigisariaqartut pingaarnersaasa ilagaat, tuluttut kalaallisullu paasisimannilluartumik suleqateqarnissaq, aammalu piginnittussaatitaanermut tunngasut sianigisariaqakkat suunersut Atuakkiorfiup pisortartaavata misissuiffigeriarlugit CCO-imut ilisimatitsissutigissavai. Naalagaaffiup Sinniisuata Atuakkiorfiup pisortartaava nalunaarfigisimagaluarpaa, Robert Petersen tuluttuumiit kalaallisuumut ordbogissamik suliaqartoq. Kisianni ilisimasat naapertorlugit Robert Petersen qallunaatuumiit kalaallisuumut taamaallaat suliaqarpoq.
NM.: Tuluttuumiit kalaallisuumut ordbogissaq Atuakkiorfimmiit imminerminut suliassiissutigineqarsimagaluartoq, uukapaatitaasutut misigisimanini tunngavigalugu novembarip naalernerani taamaatiinnakkani, naatsunnguamik nassuiaateqarfigaa.
CCO.: Ataatsimiinnissamik nalunaarummut ilanngullugit nassiussat, ordbogit nalunaarsorneqarfii, ilaasortanit misissuataaqquneqarput ilassutissaqarpatalu CCO-imut tamanna nalunaarutigineqassaaq.
CCO.: Oqaasiliortut ordbogiliortunut qanoq isummissappat?
SG.: Erik Fleischerip suliaa saqqummersitassatut pilersaarutaanersoq paasiniartariaqarpoq, taamaassimassappallu nalunaarsugai Oqaasiliortunit misissuiffigineqaqqaartariaqarput.
Suliffeqarfiit assigiinngitsut namminneq nutsikkaminnik suliffeqarfiup iluani atugassaminnik pilersitsisarput. Tamakku Oqaasiliortunit missisorneqaratillu akuerineqanngillat.
Oqaasiliortut pisussaaffigereerpaat suulluunniit oqaatsit Oqaasiliortunit akuerineqaqqaarlutik atortussanngortinneqassasut. Taamaattumik politikkerit saaffigineqartariaqarput inatsimmik taassuminnga ilisimatillugit.
CCO-ip siusinnerusukkut taasaa, Nordisk Ministerrådip aningaasaliissutaannut qinnuteqartut akuerineqarsimasullu, piumaffigineqartariaqarput oqaatsit nalunaarsukkatik Oqaasiliortunut ilisimatitsissutigisassagaat.
NM.: Erik Fleischerip suliaa soqutiginaqimmat suleqatissaanik ikiortariaqarpoq, kisiannili aamma ilisimatillugu Oqaasiliortut ordbogi allaqqissaarnermut najoqqutassiaq kisiat pisussaaffigigaat. NM-ip Erik Fleischer attavigissavaa suliaa nassiuteqqullugu taamatullu immikkut ilisimasalimmik suleqatissaanik ujaasissunneqarnissaanik ilisimatillugu.
CCO.: Kikkulluunniit ordbogimik saqqummersitsiniartut pinngitsooratik Oqaasiliortunut misissugassanngortitseqqaartarnissaat piumasaqaataasariaqarpoq, oqaatsit taaguutillu nutaat piumasaarsuutaasinnaanerat ingalassimaniarlugu.
AS.: Oqaasiliortut pisussaaffiat erseqqissarneqarlunilu sukatertariaqarpoq. Inatsisip allanngortinnissaa ujartortariaqarpoq, inatsit immini sanngiippallaarmat.
Dansk Sprognævnermiut tikillugit suleriaasiat paasisassarsiorfigineqarsinnaavoq.
Ordboginut tunngatillugu ordbogiliortut qassiunersut kikkuunersullu piaartumik paasiniartariaqarpoq.
CCO.: Kultureqarnermut Naalakkersuisup Oqaasiliortullu ataatsimeeqatigiinnissaat pisariaqartinneqalersoq paasinarmat, piviusunngortinniarlugu Oqaasileriffimmiit pilersaarusiorlugu isumagineqarsinnaavoq.
Nordisk Sprogmøde Sverigip kujataani aggustip qaammataani pisussaq eqqarsaatigalugu, aningaasatigut inissisimaneq nalilersoriarlugu Oqaasiliortut peqataanissaat periarfissarsiorneqarsinnaavoq.
NM.: Oqaatsit tulluutinngitsunut atorneqartarnerat assersuusiorfigaa, soorlu imminortarneq pillugu atuakkiamut qulequtsiunneqarsimasoq “Qanilaassuseq”. Atuakkiortunit piumasarineqarsimagaluarpoq taama qulequtserneqassanngitsoq, kisianni Nuummi SSPK-mi aqutsisut aalajangersimavaat oqaaseq taanna atuakkap qulequtarissagaa.
– 6 pillugu –
SG.: TV-mi aallakaatitassiaq nalorsitsaarut “Nalunngiliuk?” SG-ip suleqataatalu Svend Møllerip peqataaffigisimavaat. Oqaatsilli ilaat: kussagaa kukkusumik nassuiaaserneqarsimasoq pillugu, aallakaatitassiamik aaqqissuisut peqataatinneqartullu assortuussutigilermassuk aallakaatitassiaq unitsikkallarneqarsimavoq. SG-ip aallakaatitassiaq avammut takutitassiarineqassanersoq paasisaqaruni Oqaasiliortunut ilisimatitsissutigiumavaa.
CCO.: Oqaaseq qerinnarpoq pillugu ilisimatitsissutigaa, ordbogeeqqami qerinnarpoq qerunnarpoq-llu assigiisinneqartut. Peter Frederik Rosing isumaqarpoq qerinnarpoq 0 gradimut tunngatillugu atorneqassasoq, kisianni Stine Skiftep ippigigamiuk Oqaasiliortut misissuereerlutik inerniliinerat allakkatigut KNR-imut nalunaarutigineqarnissaa kissaatigaa. Nutserisoqarfimmi sulisut qerinnarpoq sila nillertilluni qerrunnarsigaangat atortarsimavaat, qerunnarpoq-llu inuup timaanut tunngatinnerullugu atortarsimallugu. CCO-ip qerinnarpoq pillugu misissuinini suli ingerlappaa.
Oqaasiliortuni ataatsimiinneq tulleq pissaaq tallimanngornermi marsip ulluisa aappaanni 2001, nal. 14.00.
Carl Chr. Olsen Kristine Olsvig
Siulittaasoq Allatsi