Nunat Aqqinik Aalajangiisartut Oktobarip 30-anni 2008-mi Oqaasileriffimmi ataatsimiinnerat
Peqataasut.: Carl Christian Olsen, Tukummeq Qaavigaq aamma Abia Abelsen.
Peqataanngitsut: – Karl Elias Olsen, piffissaarussimanini pissutigalugu. Stephen Heilmann, piffissaqannginnini pissutigalugu.
Allatsi: Lisathe Møller Kruse.
Oqaluuserineqartut makkuupput:
- Tikilluaqqusineq
- Imaqarniliap akuerinera (septembarip qulinganni ataatsimiinnermit imaqarniliaq)
- Aasiaat eqqaani nunat aqqi Abiap nalunaarsugai nalunaarsoqqammisat eqqartoriarlugit akuerineqarnissaat
- Taasariaqartut allat
1. pillugu
Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.
2. pillugu
Septembarip qulinganni 2008-mi Nunat Aqqinik Aalajangiisartut ataatsimiinnerannit imaqarniliaq akuerineqarpoq.
3. pillugu
Qaammammi juulimi 2008-mi Nunat Aqqinik Aalajangiisartunut ilaasortaq Abia Abelsen Aasiaat eqqaanni sumiiffinni ukunaniittuni nunat aqqinik nalunaarsuivoq: Aasiaat saqqarliat, Innallup eqqaa, Manermiut eqqaat, Nivaap eqqaa, Ikamiut eqqaat kangiatungaaniittullu qeqertaaluit. Aasiaallu kommuniani maannamut suli nalunaarsuiffiginngisat ukuupput: Aasiaat, Kitsissuarsuit, Killiit, Imerissut, kiisalu Akunnaaq.
Abia Abelsenip nunat aqqinik ilisimasallit nunat aqqinik nalunaarsueqatigisimasai ukuupput: Anthon Jeremiassen (Innallup eqqaa tamaat, Aasiaat saqqalliat ilanngutilaarlugu), Jørgen Reimer (Manermiut, Manermiut avannaa´tungaa, kitaa´tungaa aamma kujataa´tungaa, kiisalu Aasiaat saqqarliata ilaa tassani pingaarnerumik Nivaaq), Tele Petersen (Ikamiut, Ikamiut eqqaa tamaat, kiisalu Ikamiut kangia´tunganiittut qeqertaaluit, nagataagullu Ikamiut kitikannia), David Nielsen (Nivaaq, taassumalu eqqaa tamaat, aamma Saqqarleq ilanngutilaarlugu).
Qulaani taaneqartut suleqatigalugit nunat aqqi nalunaarsoqqammisat Nunat Aqqinik Aalajangiisartunit misissorneqarput, akuerineqarlutillu. Nunat aqqi nalunaarsoqqammisat akuerineqartut katillutik 75-iupput.
Sumiiffimmi suliaqarfigisami nunat aqqinik nalunaarsugaatigeriikkatsinnik naqqiisoqareernerata kinguneranik allannguisoqarpoq. Nunat aqqi aaqqinneqartut 13-iupput. Ataanilu nunat aqqi aaqqinneqartut takuneqarsinnaapput:
- Kangilerngata Nuua “Kangilernata Nuua”-nngortinneqarpoq,
- Innaata alanngua “Innaata Alanngua”-nngortinneqarluni,
- Iliversuaq “Iliversuit”-nngortinneqarluni,
- Saattunnguit Timaani Nuukasik “Saattunnguit Timaanni Nuukasik”-nngortinneqarluni,
- Itinnera Kujalleq “Itunnera”-nngortinneqarluni,
- Usuttaa “Ussuttaa”-nngortinneqarluni,
- Usuttalik “Ussuttalik”-nngortinneqarluni,
- Isungartusoq “Isunngartusoq”-nngortinneqarluni,
- Qerorsuit “Qerrorsuit”-nngortinneqarluni,
- Akulikitsut “Siattut Saqqarlii”-nngortinneqarlutik.
- Appat Kangilerngata Nuuat “Appat Kangilernata Nuua”-nngortinneqarluni,
- Tinuteqisaaq Saqqarlii “Tinuteqisaap Saqqarlii”-nngortinneqarluni,
- Ikermioq “Ikermioq Avannarleq”-nngortinneqarluni.
Taakku saniatigut qarasaasiap GIS-itaani nunat aqqi inissaminiinngitsut inissilluakkat Abiap inissaannut inississimasai 153–iupputtaaq.
Nunat aqqi pineqartut bilagimi word-filimi imatut atilimmiipput: Abia Abelsenip Aasiaat eqqaani nunat aqqinik ilisimasallit suleqatigalugit nalunaarsugai.doc.
4. pillugu
—
—————————–
Carl Chr. Olsen Lisathe M. Kruse
Siulittaasoq Allatsi