Nunat Aqqinik Aalajangiisartut 2003 – 4

NAA – 111203

Nunat Aqqinik Aalajangiisartut ataatsimiinnerannit
Sisamanngornermi decemberip 11-anni, 2003, nal. 11.00

Ataatsimiinnermi peqataasut: Carl Chr. Olsen, Stephen Heilmann, Karl Elias Olsen aamma Mariane Petersen.
Nalunaareerluni takkutinngitsoq: Nuka Møller

Oqaluuserisassat:

  1. Oqaluuserisassat akuerisassanngorlugit saqqummiunnerat.
  2. Nuup Kommunianit saaffiginnissut naalisakkamik akuerinninnissaq pillugu
  3. Nuup Kommuniata nunap assinganut nalunaarsornissaa
  4. Taasariaqartut allat.

– 1 pillugu –

CCO-mit erseqqissaatigineqarpoq allatsip Piap aallaqqanera pissutigalugu kingullermik ataatsimiinnermit imaqarniliaq ilanngunneqanngikkallartoq ataatsimiinnissalli tullissaanut ilanngunneqarumaartoq. NAA ilaasortaanit akuerineqarpoq.

– 2 pillugu –

Nuup Kommunianit Frederik Holm, illussanik titartaasartoq apeqquteqaateqarpoq Qinngorput pisortatigoortumik qanoq naalisarlugu allanneqartassanersoq. Pissutsit malillugit pingasunik annerpaamik naalisaasoqarsinnaasoq CCO erseqqissaateqarpoq kiisalu naalisaatit pioreersut assigissanngikkai. NAA-nit aalajangiiffigineqarpoq Qinngorput naalisarneqartassasoq QNG-mik.

– 3 pillugu –

Nuup Kommuniata iluani nunap assingata nalunaarsoqqissaar-neqarnissaa CCO-mit saqqummiunneqarpoq. Nunap assinga ASIAQ-mit piareersarneqarpoq, nunap assinga allattugaanngitsoq nivinngarneqarluni saqqummiunneqassammat aalisartut piniartullu neqitsersuisarfianni. Taanna nunap assinga nivinngarneqartussaq aalisartunit piniartunillu allattuiffigineqarsinnaassaaq nunat aqqinik. Nunat aqqi allanneqartussat tassaassapput nunat aqqi piniartut aalisartullu ilisimasaat tunngavigalugit isumaqatigiissutigineqarsimasut. Taamatut nunap assinganik iluarsartuussiniarnermi anguniagaq tassaassaaq nunap assingata kukkuneqanngitsup saqqummersinneqarnera. KEO siunnersuuteqarpoq aalisartut piniartullu tikillugit periaaserineqartartunik saqqummiussivigineqassasut nivinngaaneq ilutigalugu. MP-mit apeqqutigineqarpoq kia aningaasartuutigissaneraa tamanna CCO-mit akineqarpoq tamanna NAA akisussaaffigimmassuk aningaasartuutit aamma inissisimanerat NAA ataaniittoq. SH-mit siunnersuutigineqarpoq nivingatitsineq ukiup affaanit sivisunerussanngitsoq soqutiginninneq annikilliartoqqunagu aalisartut piniartullu akornanni. CCO-mit eqqaaneqarpoq sapinngisamik ukiut marluk qaangiuppata naammassillugu suliarineqareersimasinnnaannginnersoq ukioq 2008 utaqqinagu. CCO KEO-lu allagaqaasiorniarput aalisartut piniartullu peqatigiiffiannut NAPP-mut imaqartumik Nuup Kommuniata iluani nunap assingata iluarsartuunneqarnissaanut tunngatillugu pilersaarummik.

– 4 pillugu –

Immikkut taasariaqartoq siulleq KEO-mit oqaatigineqarpoq H.C. Petersen tamaaniinnermini imminut saaffiginnissimasoq eqqaasimagaalu Kalaallit Nunaata sineriaata annersaa (avannaa kitaa tunullu ilaa) nunap aqqinik allattuilluni suliarigini. HCP-p ilaatigut inunnik aalajangersimasunik suleqateqarluni suliarisimagini eqqaasimavaa. KEO-p eqqaavaa HCP-p suliani tunniukkusukkai tamannali pissasoq aatsaat suliami allaqqissaareernerisa kingornagut. KEO-mit neriorsuutigineqarsimavoq isuma NAA-nut anngukkumaarini. NAA-nit HCP-ip suliai assut iluatinnaateqarnerarneqarput, tamannalu suliniutit ingerlannerini ilaatigut GEUS-ip suleqatigineratigut nunami kalaaleqarfiunngitsumi nalunaarsuinerit ingerlateqqinnerini kalaaleqarfiusumi HCP-ip suliai iluaqutaasinnaalluarmata atorneqarsinnaalluarsinnaassammatalu. KEO-mit ilanngullugu oqaatigineqarpoq HCP-ip nunap aqqinik nalunaarsuilluni suliaqarnera ataqqineqartariaqartoq ilaatigut aningaasat aamma eqqarsaatigalugit. CCO-mit erseqqissaatigineqarpoq aningaasat pillugit eqqarsaatersuutit erseqqinnerusumik eqqartorneqarsinnaasut. CCO-mit siunnersuutigineqarpoq sulinermut atatillugu angalanermi HCP alakkarneqarsinnaassasoq isumaqatigiissuteqarfigineratigut NAA-niit soqutiginninneq ersersissinniarlugu.

Immikkut taasariaqartup aappaa MP-imit eqqaaneqartoq tassaavoq ilaasortap Nuka Møller-ip takkunneq ajornera pissutigalugu eqqarsaatissiissugineqarsinnaannginnersoq Nuka Møller-ip taarserneqarsinnaanera ilaasortamik takkutikulanerusinnaasumik. Eqqarsaatissiissut naammassineqanngilaq.

Nunat Aqqinik Aalajangiisartunut siulittaasoq Allatsimut taarti

Carl Chr. Olsen Johanne B. Tobiassen