Ujarlerit

Inuit Aqqinik Akuersisartut 2009 – 3

IAA – 011209

INUIT AQQINIK AKUERSISARTUT Decembarip aallaqqaataani 2009, nal. 09.30 ataatsimiinnerannit imaqarniliaq

 

Peqataapput: Carl Chr. Olsen, Sofie Petersen aamma Ellen J. Karlsen

Imaqarniliortoq: Nuka Møller

 

Oqaluuserisassat:

  1. Tikilluaqqusineq – Siulittaasoq tikilluaqqusivoq.
  2. Kingullermik ataatsimiinnerni imaqarniliat akuerineqarneri
    Imaqarniliat akuerineqarput.
  1. Atit akuerisassat (Ilanngussat takukkit):

 

    1. Aajuna – marloqiusanik isumaqarsinnaanera pillugu uparuartorniutaaneralu erseqqippallaaqimmat akuerineqanngilaq.
    2. Maleraq – akuerineqarpoq
    3. Najanuka – ateq ataatsimoortutut akuerineqanngilaq atit immikkoortutut isigineqartussaammata. Taamaattoq erseqqissaatigineqarpoq IAA-p atsiisarnermut malittarisassiaanni piumasaqaatigineqarmat atit amerlanerpaamik tallimaassasut (2007, imm. 6.). Qinnuteqaammi Marie imalt. Marianngussappat ajornanngilaq DK-mi akuerisaneereermat tamannalu kirkeboginik allattuisartup isumagisinnaavaa.
    4. Aadi – kalaallit atiattut akuerineqanngilaq, d aterni atorneqarnissaa innersuutigineqanngimmat. Nunat tamalaat akornanni atorneqartutut nalunaarsorsimavoq, taamaattoq Qallunaat Nunaanni akuerisaniippoq Adi taannalu qinnuteqartunut innersuutigineqarsinnaavoq, immikkut Qallunaat Nunaanni Aadi akuereqqullugu qinnutigissanngikkunikku.
    5. Mukki – akuerineqarpoq.

 

  1. Aqqit isumaat pillugit akissuteqarfigisat (31.10.09 – 30.11.09):

Aqqit isumaat pillugit saaffiginnissutaasimasut tusaatissatut tiguneqarput. Ukiumoortumik nalunaarusiassamut IAA-p akuerisaannut ilanngullugit amerlassusii nalunaarsorlugit ilanngunneqassasut aalajangerneqarpoq.

 

  1. Taasariaqartut allat
    1. Kingullermik ataatsimiinnerup kingorna ilaasortat marluk PhD-nngorniaq naapissimavaat. Taassumap uparuartuutigisimavaa aalajangersagaq Kaajallaasitaq nr. 1 /86-iminngaanneersoq imm. 8-mi, ima oqaasertalik: “…(*mik nalunaaqutserneqarsimasut) niviarsiaqqanit nukappiaqqanillu aterineqarsinnaapput. Aqqit taakku taamaallaat atorneqarsinnaapput nukappiaqqamut / nukappiaqqap niviarsiaqqamullu / niviarsiaqqap aqqanik paatsuugassanngitsumik ilaneqarunik.”
      Saaffiginnittup oqaatigisimavaa tupigalugu qallunaat aqqannik atserneqartup suiaassusianik ersersitsisumik piumasaqaateqartoqarsimammat, tamannalu kalaallisut atsiisarnermut naapertuutinnginnerarlugu.
      IAA-mi ilaasortat aalajangerput saaffiginnittoq ilisimatinneqassasoq kaajallaasitaq tamanna ukioq 2007-imi allamik taarserneqartoq imm. 7-inngorlugu ima: “Nalunaarsuummi aterpaaluit niviarsiaqqanit nukappiaqqanillu aterineqarsinnaasut *-mik nalunaaqutserneqarsimapput.”
      Erseqqissaatigineqassaaq Kaajallaasitaq nr. 1 /86 atorunnaarluni 2007-imi Atsiisarnermut ilitsersuutit Inuit Aqqinik Akuersisartunit aalajangerneqartut immikkoortoq 7-imit taarserneqareersut, taamanikkulli aalajangersagaasimasoq naapertuuttutut isigineqanngimmat. Aammattaaq erseqqissaatigineqassaaq qallunaat aqqinik atsiisarnissaq piumasaqatigineqarsimanngitsoq.
    2. Inuuneq atitut akuereqqusaq. Palasi suliami tassani ingerlatsisimasoq allaffigineqarsimavoq. akissutaanilu erserpoq tusatsiakkat naapertorlugit nammineq atsiinissaq aalajangersimagaa. IAA-mi ilaasortat naapillutik suli aalajangivinngitsut tamanna pisimammat, atissatullu qinnutigineqartoq IAA-p kingullermik ataatsimiikkami akuerineqanngimmat, palasi/palaseqarfik pineqartoq ilisimatinneqassaaq akuerineqanngitsoq utertittariaqartorlu.

 

Tulliani ataatsimiinnissaq pissaaq ataasinngornermi decembarip 21-ani nal.10.00 Oqaasileriffimmi.

Inussiarnersumik inuulluaqqusilluta

Carl Chr. Olsen                       Nuka Møller

Siulittaasoq                    Suliassanik isumaginnittoq