Oqaasiliortut 2009 – 8

OQAA – 041209(gl)

Oqaasiliortut ataasinngornermi decembarip sisamaanni 2009 Ilimmarfimmi Oqaasileriffiup ataatsimiittarfiani ataatsimiinnerannit imaqarniliaq

 

Peqataasut: Abia Abelsen, Ellen J. Karlsen, Eva Møller Thomassen, Stephen Heilmann aamma Carl Chr. Olsen

Imaqarniliortoq: Nuka Møller

 

Oqaluuserisat:

  1. Tikilluaqqusineq.

    Siulittaasup ilisimatitsissutigaa kalaallisut qallunaatullu atuartitsinermi taaguutit naqiterlugit saqqummeqqammersut tamanullu agguaanneqarsimasut tigulluarneqarsimasut.

    Aammattaaq ilisimatitsissutigaa Oqaatsit – kalaallisuumiit qallunaatuumut Ilinniusiorfik suleqatigalugu aaqqissuuteqqillugit saqqummersinneqalersartut. Tassunga atatillugu Ilex naaggaarsinnaanngisamik akisuallaanngitsumik neqeroorsimavoq. “Oqaatsit” aaqqissoqqinneqarneranut tunngatillugu Karo Heilmann Stotts siunnersortit assigiinngitsut suleqatigalugit suliaqartuuvoq. Birgitte Jakobsen suleqatigineqarsinnaasutut eqqaaneqarpoq. Suliareqqitassatut ilaatigut eqqaaneqarput rng -> rn, aammattaaq oqaasersiat qanoq allanneqartarneri immikkut nalilersugassaapput.

  2. Kingullermik imaqarniliap akuerineqarnera – akuerineqarpoq. Taamaattoq ordbog pillugu oqaaserineqarsimasut ilanngutissasut noqqaassutigineqarpoq.
  3. Najaaraq Egede: Oqaasileriffimmiit naliliisitserusunneq (03/11-09)
    CCO-p ilisimatitsissutigaa apeqqutai taakku tunngavigalugit radiokkut NE-p apersorsimagaani. Ilisimatitsissutigaattaaq Kultureqarnermut Naalakkersuisup apeqqutit taakku pillugit qanoq isumaqarnerluni apersorsimagaani, akornaminnilu nikingassuteqartumik isumaqartoqannginnerarlugu.

    Apeqqummi tassani Oqaasiliortut ilaatigut nutserisut tunaartariinnarnagit tusagassiutitigut oqaatsit ineriartortineqarnissaat pillugu oqallinneq pisariaqartoq pillugu oqallipput. Erseqqissaatigineqarsoraat oqaatsit ulorianartorsiornerannit tamanna pissuteqanngimmat, kisianni oqaatsit assigiinngitsutigut artorneqartarnerisa pitsaassusiat pitsanngorsaavigineqartariaqartoq. Oqaasiliortut apeqqummi tassani ujartorneqartarmata erseqqissaatigineqarsoraat Oqaasiliortut oqaatsitigut politiunngimmata.

  4. Kopi/version Anne Mette Olsvig: (najoqqutaralugu) suliareqqitaq’ pitsaanerunnginnersoq (06.11.09)

    Oqaasiliortut aalajangerput una atorneqassasoq: Assilillugu sanaqqitaq.

  5. Pablo Poulsen: Hudson-ip Kangerliumanersuata inuktitut taaguutaa: Itivik/Tasiujarjuaq. (10.11.09)

    Apeqqut taanna pillugu Oqaasileriffimmiit Nunavumi nutserisut oqallittarfiannut saaffiginnikkaluarput marlussoriarlutik. Suli akisoqanngilaq. Kisianni ilisimatitsissutigineqarpoq Nunavumi Oqaasiliortussat taamatullu Nunat Aqqinik Akuersisartussat pilersinneqarseeriarlugit qanoq aalajangerumaarnersut utaqqisinneqassasoq.

  6. Konrad Seblon: Takornariaq/takornarissat (10.11.09)

    KS-ip saaffiginnissutaani ilisimatitsissutigineqassaaq takornariat eqqortuusoq takornarissaanngitsoq. Taamatut kukkuneqartarnera nalinginnaavoq aallartissimagunarlunilu taalliortut ilaasa oqaaseq teriannissat atorsimammagu uffa terianniat nalinginnaasuugaluartoq, taamatullu nuniagiaq -> nuniagiat. Kisianni taggisini pattagissap patiffii.

  7. E-mail fra Berlin: Invitation: qaaqqussut? (11.11.09)

    Ilisimatinneqassaaq qaaqqusissut eqqortuusoq.

  8. Unnuk kulturisiorfimmut pilersaarutissat (12.11.09)

    Ilimmarfiup unnuk kulturisiornermut pilersaarutai ilisimatitsissutitut tiguneqarput.

  9. Helga B. Lund: Suliffeqarfiit atiinut tunngatillugu, soorlu Puiaq, imatut allanniaruta, assersuut, Kommuneqarfik Sermersooq Meeqqerinermut immikkoortortaqarfimmi, perorsaasumik Puiami pissarsiorpoq. imaluunniit una atussava? Puiaq-mi. (12.11.09)

    Ateq iluitsuutillugu allareerpat uiguuserneqassaaq, ateq innarlernagu.
    Disko + mi = Diskomi iml. Disko-mi
    Aqqa immikkut ersersikkumagaanni kittoraaserneqarsinnaavoq.
    Puiaq-p, atiunera aappersarissamillu naggateqarnera pissutaalluni kittoraaserneqassaaq, soorlu: Inerisaavik-up. Kittoraasiisarnissaq apeqqutaavoq aappersarissamik ersiummilluunniit naaneqarnersut. Qinngorput-mi. Siivaleeraq-p.

    Taamaattoq Oqaasiliortut isumaqarput sammeqqittariaqartoq, kittoraasiisarnermut tunngasut suli akuleriiaarmata, aamma ordbogimi Oqaatsit-ni.
    Paasinartumik ersarissumillu malittarisassiornissaq pisariaqarpoq.

  10. Ole Sandgreenip g-p ng-illu atorneqartarneri pillugit apeqqutai (14.11.09)

    OS-ip saaffiginnissutaa misissorneqarpoq apeqqutaalu akineqassasut aalajangerneqarluni. Kisianni kina akissusiussanersoq aalajangiisoqarani.

  11. Bo Nørreslet: Trainerguiden: Tasiortoq? Tasiuut? (17.11.09:)

    Oqaasiliortut aalajangerput una atorneqassasoq: Ilakannaaq.

  12. Rosa Fogedret: Eqqartuussiviup Akiisorsiniaavia imal.: Akiisorsiniaanermik Eqqartuussivik? Foged: Akiisorsitsiniaasartoq? Aamma: Taaguusersuinermi inaarutaasumik suleqatigeeqqinnissaq. (18.11.09:)

    Oqaasiliortut aalajangerput una atorneqassasoq:
    Akiliisitsisarnermut Eqqartuussivik.

  13. Institut for Læring: allallu (18.11.09:)

    Sammisami aalajangiisoqanngilaq Ilimmarfimmi qanoq aalajangiisoqarumaarnersoq utaqqineqarmat.

  14. Agathe Larsen: Namminersorlutik Oqartussani Sulisoqarnermut Pisortaqarfiup ataani Nutserisoqarfimmiik oqaatsit allattorsimaffiannik pilersitsiniarlutik aallartisarnerminni suleqatiserinnittut (19.11.09:)

    Oqaasileriffimmiit suli peqataasussamik toqqaasoqanngilaq, ilisimatinneqassappullu Oqaasileriffimmi sulisut akornanni toqqasoqarumaartoq.

  15. Andrea Davidsen: Oqariartorpoq – oqariartuut pisortani atorneqartillugu qanorpiaq isumaqarpa? (24.11.09)

    Oqaasiliortunit tamanna pillugu suli aalajangiisoqanngilaq. Malunnartumik isummap tungaatigut nikikkiartortoqartoq malugineqarsimavoq aalajangiiffigineqartariaqarsorinartumik. Oqaasiliortut oqaatsip tamatuma atorneqarnera malinnaaffigaat.

  16. Stina Sørensen: oprindelige folk: Nunap inoqqaavi imalt. nunaqaqqaartut. (24.11.09:)

    Siulittaasoq nalunaarpoq nammineq taaguut tamanna pillugu siusinnerusukkut akissusioreersimalluni, taaguullu isumaqatigiinniussutaareernikuusoq. Akissusiaq taanna nassaareriarlugu nassiukkumaarlugu unnerpoq.

  17. Ujarak Heinrich: Oqaaseq kuisinneq pillugu isumaliutersuut (24.11.09)

    Oqaasiliortut isumaqarput oqaaseq taanna biibilip nutaamik nutserneqarnerani akuerisaareersoq isumaqaratillu namminneq akuleruffigisariaqarnagu.

  18. Oqaaseq aliortut qanoq isumaqarpa? (27.11.09)

    Kaali Rosingip 1970-imi atuakkiaanit qallunaatut allassimasumit ima qulequtalimmit: “Aliortut – sælsomme historier fra Grønland” oqaaseq naggueqarnerarneqarpoq. Sumiorpaluutaanngitsoq naqissuserneqarpoq. Oqaaseq eqqortoq atussasoq unaasoq ilisimatitsissutigineqarpoq: aliortukkat.

  19. Ane Petersen: Oqaatsit oqaaseqatigiillu oqaluttuatoqqaneersut qanoq isumaqarnersut paasiniarai (27.11.09)

    Saaffiginnittoq innersuunneqarpoq nammineq ordbogilersorluni oqaatsit qaqutigoornerulersut tamakku misissoqqullugit. Ilisimatinneqassaartaaq Kristoffer Lyngep atuakkiaani ”kalâtdlit oKalugtuait oKalualâvilo I-III” 1978-imi saqqummersumi oqaatsit qaqutigoornerulersut nassuiaataat qimerlooqqullugit.

  20. Ole Birch: Oqaaseq hvidvask (01.12.09)

    Oqaasiliortut aalajangerput oqaaseq taanna kalaallisut ima taaguuteqassasoq: (aningaasatigut) peqquserluutinik malunnarunnaarsaaneq.

  21. Oqaasiliortunit apeqqutit akisimasat (ilisimatitsissutitut):

    Ilisimatitsissutitut tiguneqarput. Qassiarsuk pillugu akissusiamut atatillugu eqqaaneqarpoq radiokkut nassuiaasoqarsimasoq oqaatsip nagguigisinnaagaa “kangerliumaneq iloqqasoq”. Taamaattoq isumaqartoqarpoq oqaluffitoqaq illorsuarmut qassimik taaneqartartumut assingutillugu taama taaguusiisoqarsimanissaa. Igaliku aamma ilimagineqarpoq tassaasoq “iigalikoq”, qammarsuit napparneqarsimasut sinnikui tassaniittut pillugit.

    Taamatuttaaq ilisimatitsissutigineqarpoq Aasiaat ilaannikkut isuma manna attassimassagunaraluaraat, tassa kippasissumiit kangimut aasiat (avunngaasartut) uninngavinnaarisimammassuk aasianik ilaatigut ateqaqqaarsimasorineqartartoq.

  22. Jens Mikkelsenip Atuagagdliutit 3. decembari 2009-mi saqqummersumi allaatigisaa “Oqaatsigut suliffeqarnermut isumaqatigiissutini”-mik qulequtalik siulittaasup akissusiussavaa.

    Tulliani ataatsimiinnissaq: Sisamanngorneq decembarip 17-at 2009 ualikkut nal. 14.00.

Inussiarnersumik inuulluaqqusilluta

 

Carl Chr. Olsen                                          Nuka Møller

Siulittaasoq                                               Imaqarniliortoq