Oqaasiliortut 2012 – 12

OQAA – 111212(gl)

Oqaasiliortut ataatsimiinnerat marlunngorneq, decembarip 11-anni 2012, nal. 13.00
Oqaasileriffimmi.

 

Peqataasut: Carl Chr. Olsen, Stephen Heilmann, Eva M.Thomassen, Lotte Holm aamma Katti Frederiksen.

Allatsi: Katti Frederiksen

Oqaluuserisassatut siunnersuutit:

  1. Tikilluaqqusineq aamma ilisimatitsissutit (OQAASERSIUUT)
    Siulittaasoq tikilluaqqusivoq ilisimatitsillunilu ukioq manna Oqaasiliortuni ataatsimiinnerit kingullerimmassuk.

    OQAASERSIUUT saqqummerpoq, naqqiissutinik ilassutinillu ilaqarluni, taamaattoq naqqiissutissat suli, ass.kalveknæ (qooriakitsoq) allallu aaqqinneqanngitsut elektroniskertaani aaqqinneqarumaartut nalunaarutigineqarpoq.

    CCO novembarip naanerani Danmarkimi Netværksmødemi Ekspert Gruppen Sprogrådimilu isumasioqatigiinnermut peqataasimanini eqqartullatsiarpaa, ilaatigut ukioq nutaamiit Avannaamioqatigiinni oqaatsit eqqarsaatigalugit suliniaqqinnissami oqaatsinik allanik paasinnissinnaaneq (sporgforståelse) qulequtaritinneqassasoq aalajangiunneqarsimasoq ilisimatitsissutigalugu.

    KVUG (Kommissionen for Videnskabelige Undersøgelser i Grønland) ukiut 135-it atareerluni ukioq nutaamiit atorunnaarsinneqarluni Forskningsråd i Grønlandimik pilersitsiniartoqarnissaa pillugu tallimanngornikkut ataatsimiinnermi CCO peqataassalluni nalunaarpoq. Oqaatigaa ilimagalugu nutserisunngorniarfik netværkiliornissamik piumasaqassasoq, tamanna pisariaqartoq ilisimagaluarlugu taamaattoq aamma Oqaasileriffimmiit taaguutinut tunngasut, kiisalu inatsisiliat pingaarutillit akuerineqannginnerini kalaallisut oqaatsinik taaguutinillu eqqortunik atuilluni allanneqarsimanersut Oqaasiliortut misissoqqissaaqqaartassagaat CCO-p eqqaaniarpaa.

  2. Kingullermik ataatsimiinnermit imaqarniliap akuerineqarnera.
    Imaqarniliarmi naqqiissutit aaqqinneqarput, taamaatsillugulu akuerineqarluni.
  3. Saaffiginnissutit
    a) Minaut/Minaat, ateq pillugu Oqaasiliortunut ingerlateqqitaq.
    Oqaasiliortut Inuit Aqqinik Akuersisartut aqqit akuerisaat ataqqisarpaat, itigartitsissutaasimasunilli Oqaasiliortunut suliassanngortitsissummik tigusaqaraangamik suliaq misissortarpaat, kiisalu aqqup isumaa paasiniartarlugu.
    Matumani minaat isumaqarpoq upaassissut; sumik arlaanik nerisassamik tigusiissussinermut/toqqorsiissussinermut tunngasoq, ass. nerisassamik sinnikuunngitsumik, kisiannili immikkut pissaqartitsinermik isumaqarluni. Erseqqissaassutaassaaq oqaaseq minaat amiakkuunanilu nikassaasuunngimmat, taamaattumik arlaanaatigulluunniit minnerulersitsinani upaassissutaaginnarluni.
    Tamanna nassuiaat tunngavigalugu Oqaasiliortuni ilaasortat amerlanerussuteqarlutik oqaaseq minaat atertut akuerineqassasoq aalajangiuppaat: Minaut/Minaat.

    b) konfliktmægling aamma mediation kalaallisut:
    saqitsaannermi nalerisaaneq – aaqqiagiinnginnermi nalerisaaneq

    c) qerinnarfik tassaavoq frysepunkt aamma 0 grader

    d) Oqaaseq kukissaq pillugu saaffiginnittoq akineqassaaq skifer tassaammat allattarfissiaq imaluunniit qalequtissiaq, matumani sumut atorneqarnera apeqqutaalluni. OQAASERSIUUMmi skiferip allaqqanerani kukissaq immikkut qanga sakkuliaasartumut atorneqartoq erseqqissaassutigineqassaaq.

    e) eqikkaaneq/naalisaaneq
    Naalisaanerit tassaapput oqaatsit naalisakkat, danskisut forkorterlser.
    eqikkagaq/eqikkaaneq – resume
    imaqarniliaq/imaqarniliorneq – referat

    f) køkkenrulle kalaallisut taaguuteqalerpoq allarutissaq.
    matumani allarterut allarutissiarlu tvistinut atorneqartareertarmata.

    g) storskalalov kalaallisut suliniutit annertuut pillugit inatsit

    h) passiv/aktiv sætninger kalaallisut
    kalaallisut oqaaseqatigiit iliorfigisallit iliortortallillu pillugit nassuiaateqareernermi taaguutit ilaatigut atorneqareersut akuersissutigineqarput:
    patience iliorfigisaq
    agens iliortoq

    i) imod/versus kalaallisoortaanut tunngasoq taaguutillu allat
    Suli eqqartuussiveqarfimmi nutserisuunermit vanhjemmel bistandsbisidderillu taaguutissaanik siunnersuutaat tiguneqanngillat, taamaattoq versus/imod pillugu qisuariaat Oqaasiliortunit tiguneqartoq naapertorlugu Oqaasiliortut isumaqarput oqaaseq akerleralugu pineqartillugu pisuutitsereertoqartartoq, aamma isumaatigut nutseriinnarnermit pisimassasoq isumaqarlutik. Eqqartuussinerup pilinnginnerani unnerluussisoqarsimatillugu illuatungeriit sassartinneqartarmata akerleralugu pinngikkaluarlugu illuatungeralugu naleqqunnerusoq Oqaasiliortut isumaqarput.

    j) seniorforsker kalaallisut misissuisuuneq

    k) postdoc kalaallisut oqaasersiatut atuinnassasoq aalajangiunneqarpoq.

    l) kannak pillugu EBF-ip allataa tapersiinnarneqassaaq isumaqatiginarluni, tassalu S.L.-ip ordbogiliamini kannak nalikkaanut tunngatillugu allassimasaa sukumiisuunanilu immaqa paqumisunnermit taaguutiviinut taarsiullugu atorneqartarmat. Kannak tassaanerugaluarpoq umiarsuup tingerlaataannallip(ataani) siuata nuuanut atasoq.

    m) Frelsens Hær
    Uppernikkut Ikiuiniaqatigiit siunnersuutigineqassaaq. Matumani kalaallisut isumaani sakkutuut tassaasarmata saassussisartut imaluunniit illersuillutik nakkutilliisartut. Annannissap akerlianik isumaqarnera pillugu siunnersuut taamaatillugu aalajangiunneqarpoq. Siunnersuut Frelsens Hærimik isumaginnittunut ingerlateqqinneqassaaq, taakkualu aalajangissavaat taaguut akuererusunnerlugu, imaluunniit Frelsens Hær atuinnarniarnerlugu allarluinnarmilluunniit siunnersuutissaqarnerlutik.

  4. Allat

 

Inussiarnersumik inuulluaqqusilluta
Carl Chr. Olsen                                      Katti Frederiksen
Siulittaasoq                                          Allatsi