Oqaasiliortut 2013 – 7

OQAA – 091013(gl)

Oqaasiliortut ataatsimiinnerat pingasunngorneq, oktobarip 9-anni 2013, nal. 14.00
Oqaasileriffiup ataatsimiittarfiani.

Peqataasut: Carl Chr.Olsen, Eva M.Thomassen, Karl Møller aamma Katti Frederiksen.
Stephen Heilmann sumik peqquteqarnersumik takkutinngilaq.

Allatsi: Katti Frederiksen

Oqaluuserisassatut siunnersuutit:

1. Tikilluaqqusineq aamma ilisimatitsissutit.
   Siulittaasoq tikilluaqqusivoq tamatumalu kingorna oqaluuserisassat akuerineqarput.
   Ilisimatitsissutigineqarpoq Chicagomit suleqativut tikittussaasut, aamma qarasaasialerinermik ilisimasalik Tino Didriksen Danmarkimiit tikittuussaavoq Oqaasileriffiullu nittartagaa aaqqissuullugu.
   Atuagaaraq Oqaasileriffik pillugu paasissutissat saqqummersinneqarnissaanut piariilivimmat ilioqqarnissaanut grafikerimik pissarsisimaneq oqaatigineqarpoq.
   Novembarip aallartilaarnerani KF Islandiliartussaasoq aamma ilisimatitsissutigineqarpoq, tassani kalaallit, Savalimmiormiut Islandimiullu danskisut ilinniarniat ikiuutissaanik tunngasumik suliaqarnissami aallartitseqataajartorluni.
2. Kingullermik ataatsimiinnermit imaqarniliap akuerineqarnera.
   Imaqarniliami naqinnerliukkat aaqqinneqarput akuerineqarlunilu.
3. Saaffiginnissutit.
   a) Ilinniusiorfimmit naasut iviillu taaguutaat
   Taaguutit pillugit taakkununnga ilisimasaqarsinnaasut assigiinngitsut saaffigineqassasut isumaqatigiissutigineqarpoq. Taamaattoq taaguutit ilaat Nunatta Naasuini ordboginilu nanissaasut saaffiginnittumut nalunaarutigineqassapput. Inuit taakkua tassaapput Niels Henrik Lynge, Ado & Mona Rasmussen, Lenore Grenoble, Qunerseeq Rosing aammalu Hansigne Lyberth. Taakkua tulleriiaarlugit paasiniaavigalugit saaffigineqarumaarput.

   Akineqareersinnaasulli makkuupput:

Uumasunut tunngasortaa:

b) Saaffiginnissut Air Greenlandip nittartagaani angalasussanut allagartalersuutaanut tunngasoq isumaqatigineqaannarsinnaavoq. Tassani oqaatsit makku pineqarput:
status – killiffik
started – aallarpoq
landed – mippoq
delayed – kinguartoorpoq
cancelled – taamaatiinnarpoq

c) Qeqqussat taaguutaannut tunngatillugu saaffiginnittup apeqqutigisai naasut uumasullu taaguutaannik paasiniaalernermi ilanngunneqassapput, taamaattorli atuakkami Atuakkiorfiup saqqummersitaani Naasut-ni ordboginilu makkua allassimapput:

qeqqussat – langstilket bladtang (Naasut)
vingetang – sulluitsut (Naasut)
søl – aappilattut (Naasut)
blæretang – equutit (Naasut)
hultang – putoorut (Ordbogen)

Nunatsinni qeqqussat assigiinngitsut taaguutaat paasiniarneqassapput, saaffiginnittup aamma danskisut taaguutit rødalge, sukkertang vibetangelu eqqaavai.

d) Siunnersuuteqarusuttoq
Tusagassiutini kalaallisut oqaatsit naammaginanngitsumik atorneqartarneri pillugit Oqaasileriffik saaffiginnissummik tigusaqarpoq. Taanna tusaatissatut tiguneqarpoq. Eqqartuinermi Oqaasiliortunit siunnersuutigineqarpoq immaqa ukioq suli naatinnagu isumasioqatigiisitsinermik aaqqissuussisoqarsinnaasoq. Tassani susassaqartut assigiinngitsut, soorlu Tusagassiortunngorniat Ilinniarfiat, Tusagassiortut Peqatigiiffiat, Nutserisunngorniat Oqalutsinngorniallu Ilinniarfiat, KNR-imi nutserisut, Ilinniarfissuarmi kalaallisut atuartitsisut, Ilinniusiorfimmiut, Oqaasiliortut kiisalu Ilimmarfimmit aamma peqataatitsinikkut oqaatsitta tusagassiutitigut qanoq pitsanngorsarneqarsinnaaneri pillugit aaqqiissutissanik siunnersuutinik iliuusissanillu tikkuussisunik naapeqatigiisitsisoqarneratigut tikinneqarsinnaapput. Tamanna pillugu siunnersuummik Oqaasileriffik suliaqassaaq, naalakkersuisoqarfimmilu Pia Lyngemut aamma apuullugu.

e) Attavissarsiortoq Ilimmarfimmut innersuunneqassaaq oqaasilerinermik, atuakkialerinermik tusagassiutilerinermillu immikkoortortamut innersuullugit.

f) Aktivist kalaallisut assigiinngitsunik taaneqarsinnaavoq, soorluttaaq aamma danskisut isumai marluusut:
1. ilungersuussisoq, allannguiniarluni ilungersuussisoq
2. suliaqaqataasoq, iliuuseqaqataasoq

g) Eqqartuussivilerinermi taaguutit pillugit saaffiginnittoq taaguusersuutinut pisiassanut innersuutissaaq, kommunal ordlistelu Oqaasileriffiup allaqqissaagaa nassiullugu.

h) Aatsitassalerinermik uuliamillu gassimillu ujarlernerni taaguusersuutit ingerlateqqinnissaat pillugu Oqaasiliortut suleqatigiissitaliornissamik siunniussaat taaguusersuisarnermi periutsit tunngavigalugit ingerlanneqassasoq isumaqatigiissutigineqarpoq. Tassani Oqaasileriffimmi atorfilik Lisathe M.Kruse tamatuminnga apuussiffigineqassaaq. Taaguutit maannamut pigileriikkat 7-800 missaaniipput.

i) Saaffiginnissutinik tigusisarnerit siammarterisarnerillu pillugit CCO erseqqissaasuteqarpoq suliat ingerlasut imalt. Oqaasiliortut akunnerminni oqallinnerat tamanut (alleoqaasileriffik) aqqutigeqqaanngikkaluarlugu pisassasut, aatsaallu aalajangiivinneq pereeraangat tamanut tusarliunneqartassasut. Tassani suliat suli naammassineqanngitsut avammut allatigulluunniit paatsoorutaaleratarsinnaanissaat pinngitsoortinniarneqarpoq.

4. Allat
   Allanik oqaluuserisassanik soqanngimmat ataatsimiinneq suli ulloqeqqanngitsoq naavoq.

Inussiarnersumik inuulluaqqusilluta
Carl Chr. Olsen                                      Katti Frederiksen
Siulittaasoq                                          Allatsi