Ujarlerit

Nunat Aqqinik Aalajangiisartut 2014 – 3

NAA.28.01.14

Nunat Aqqinik Aalajangiisartut

marlunnngorneq januaarip 28-anni 2014-mi Oqaasileriffimmi ataatsimiinnerat

 

Peqataasut.: Carl Christian Olsen, Abia Abelsen, Stephen Heilmann aamma Karl Møller

Peqataaanngitsut: Tukummeq Qaavigaq, napparsimanini pissutigalugu

Allatsit: Lisathe Møller Kruse, Arnaq B. Johansen.

 

Oqaluuserisat makkuupput:

  1. Tikilluaqqusineq
  2. Imaqarniliap akuerinera (januaarip 14-anni ataatsimiinnermit imaqarniliaq)
  3. Upernaviup nunarfiisalu eqqaanni nunat aqqi nalunaarsukkat akuerineqanngikkallartut akuerinissaat
  4. Taasariaqartut allat

 

  1. pillugu –

Ataatsimiinnerup aallartinnerani Nunat Aqqinik Aalajangiisartunut siulittaasoq CCO tikilluaqqusivoq.

 

  1. pillugu –

Januaarip 14-anni 2014-imi ataatsimiinnermit imaqarniliaq naqqiissuteqarfigineqalaareerluni  akuerineqarpoq.

 

  1. pillugu –

Upernaviup nunaqarfiisalu eqqaanni nunat aqqi nalunaarsukkat Nunat Aqqinik Aalajangiisartunit misissorneqarneri nanginneqarput. Nunat Aqqinik Aalajangiisartut Upernaviup nunaqarfiisalu eqqaanni nunat aqqi nalunaarsukkat suliaralugit akuerisassallu akueriortorlugit naammassereerpaat.

Nunalli aqqi nunat aqqinik ilisimasalinnut apeqqutigisassat sulilu akuerineqanngikkallartut akuerivaat, taamaalillutik Nunat Aqqinik Akuersisartut Upernaviup nunaqarfiisalu eqqaanni nunat aqqi akuerisassat tamakkerlugit akueralugit.

Nunat aqqi nalunaarsoqqammisat Nunallu Aqqinik Aalajangisartut akuerineqaqqammertut katillutik 544–pput. Taakku 2013-ip aasaagaa Arnaq B. Johansenimit katersorneqarlutik nalunaarsorneqarput. Taakku saniatigut Nunat Aqqinik Aalajangiisartunit nunat aqqi nalunaarsugaataareersut misissorneqarlutik naliliiffigineqarput, taamatut misissorneqarlutik naliliiffigineqaqqittut 1850-ullutik.

Nunat aqqi akuereqqammisat naliliiffigeqqitallu ullut arlallit ingerlanerini suliarineqarsimasut kingusinnerusukkut imaqarniliarineqarumaartussamut ilanngunneqarumaarput. Taamaaliortariaqarnermut pissutaavoq Upernaviup nunaqarfiisalu eqqaanni nunat aqqi nalunaarsukkat suli piariivinneqannginnerat, piareerpatalu ataatsimut takusassiarineqarnissaat pitsaanerpaassammat.

 

Inussiarnersumik inuulluaqqusilluta

 

Carl Chr. Olsen             Lisathe M. Kruse

Siulittaasoq                               Allatsi