Oqaasiliortut 2016 – 9

OQAA – 251116 (gl)

Oqaasiliortut ataatsimiinnerannit imaqarniliaq

• Oqaluuserisat

1. Oqaluuserisassat akuerineqarnerat
2. Kingullermik ataatsimiinnermi imaqarniliap akuerineqarnera
3. Oqaasileriffimmiit ilisimatitsissutit

4. Oqaasiliortut suleriaasissaat (forretningsorden) pillugu
5. Atsersuinermi innersuussutit
6. Oqaasiliortunut saaffiginnissutit
   6.1. MIO-mi taaguutit
   6.2. Ph.d.-gradimik angusiffiusinnaasut
   6.3. Ilisimatusarfimmi immikkoortortaq nutaaq ‘Afdeling for Økonomiske & Samfundsvidenskabelige Studier’
   6.4. Mikroplast
   6.5. Namminersulivinneq, namminiilivinneq
7. Taasariaqartut allat
   7.1. Ataatsimeeqqinnissamut ulluliineq
   7.2. 2017-imut pilersaarusioqatigiinnissamut ulluliineq
   7.3. Royal Arctic Line-imiit taaguutit (ilisimatitsissutitut)
   7.4. Oqaasiliortut suliassaasa killiffiannik ilisimatitsineq

Imaqarniliaq

1. Oqaluuserisassat akuerineqarnerat:
   Immikkoortoq ‘Oqaasileriffimmiit ilisimatitsissutit’ oqaluuserisassani immikkoortut pingajuannut inissinneqareermat oqaluuserisassat akuerineqarput.
2. Kingullermik ataatsimiinnermi imaqarniliap akuerineqarnera:
   Oktobarip 14-anni ataatsimiinnermi peqataanngitsoorsimasut imaqarniliami allanneqareerpata imaqarniliaq akuerineqassaaq.
   Juaakap ataatsimiinnermi tassani peqataanngikkaluarluni MIO-mi taaguutini seksualitetimut taaguusiunneqartunut isumaqataanini oqaatigaa, kisianni erseqqissaatigaa siunissami taaguutinut pineqartunut immaqa pitsaanerusumik taaguusiisoqarsinnaajumaarmat.
3. Oqaasileriffimmiit ilisimatitsissutit:
   Oqaasileriffiup pisortaata Katti Frederiksenip Oqaasileriffimmiit ilisimatitsissutit ataatsimiinnissaq sioqqullugu emailikkut Oqaasiliortunut nassiussimasai ataatsimiinnermi eqqartorneqarput. Ilisimatitsissutillu makkuupput:3.1. Oqaasiliortut Oqaasiliortut suleriaasissaanni (forretningsordenimi) §7 pillugu apeqquteqaataannut Naalakkersuisoqarfimmiit akissut:§7-imi allakkatigut qinersisoqarsinnaannginnera (taasisoqaqqusaannginnera) qanoq paasineqassanersoq Oqaasiliortut paaserusummassuk Naalakkersuisoqarfiup ilisimatitsissutigaa aatsaat ataatsimiinnermi peqataanikkut taasinerit atuuttassasut, tassa ataatsimiinnermut ornigulluni imaluunniit oqarasuaatikkut videukkulluunniit peqataanikkut aatsaat taasisoqarsinnaassaaq.

   3.2. Kalaallisuumiit qallunaatuumut qallunaatuumiillu kalaallisuumut nutserusiornissaq Naalakkersuisoqarfimmiit aningaasalerneqarnialersoq Oqaasileriffik ilisimatinneqarpoq. Nutserusiornissaq ukiunik tallimanik sivisussuseqartussaq ukiumut 2 mio. koruuninik aningaasalerneqartassaaq, tassa ukiuni qulini katillugu 10 mio. koruuninik aningaasalerneqassalluni.

   3.3. Ordbogilerinermik suliaqartarnerup Oqaasileriffimmiitinneqalersinnaaneranik periarfissat pillugit Oqaasileriffiup Naalakkersuisoqarfimmut saqqummiiartornerata kingorna Naalakkersuisoqarfiup tamanna isuma taperserlugu ordbogilerinerup Oqaasiliortut inatsisissaannut ilanngunneqarsinnaaneranik misissuiniarlutik aalajangersimapput.

   3.4. Kalaallisuumiit tuluttuumut ordbogiliap app-inngortinneqarsinnaaneranik nittartakkakkullu iserfigineqarsinnaasunngornissaanik Oqaasileriffik periarfissarsioqqilerpoq.

   3.5. Killiffilersuutit nutarterneqarnerat kigaatsumik ingerlavoq naatsorsuutigineqarlunilu aappaagu 2017-imi aatsaat saqqummerumaartoq. Suleqatigiit ukioq manna decembarip aallaqqaataani naapereerunik sukumiinerusumik paasissutissiisinnaalissapput.

   3.6. Korpusimik (allagaatinik katersivissuarmik) ineriartortitsineq ingerlalluarpoq saqqummersitsiviillu saaffigineqartut tamavimmik naqitaminnik tunniussisinnaallutik nalunaarsimapput.

   3.7. 2017-imi Oqaatsit Ulloqarnissaanut tunngatillugu kalaallit oqaasiinik atuilluarsimasunik, atsiilluarsimasunik, nutaaliortunik siuarsaaqataasunilluunniit kajumissaasiisarnissamut aningaasanik qinnuteqartoqassaaq.

   Tassunga tunngatillugu Oqaasiliortut ataatsimeeqqinnissaminnut kajumissaasiisarnissap siunertaanik sukumiinerusumik Oqaasileriffimmiit paasissutissanik pissarserusupput.

   3.8. Oqaasiliortut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisunngortumik naapeqateqarnissaannik Oqaasileriffik suli erseqqinnerusumik paasisaqanngilaq Oqaasileriffimmiulli paasisaqariarunik piaartumik Oqaasiliortunut nalunaarumaarput.

   Oqaasiliortut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisumik ataatsimeeqateqarnissaannut oqaatiginiagaat allatsip isumagissavai, tassaasut:

   Oqaasiliortut suleriaasissaanni §6-imi allassimavoq Kalaallit aqqinik akuersisarneq pillugu suliat Oqaasiliortukkoortinneqannginnerini Biskopimut oqaaseqarfigisassanngorlugit tusarniaassutigineqartassasut. Taama suleriaaseqartoqarnissaa pisariaqanngitsoq Oqaasiliortut isumaqarput.

   Oqaasiliortut suleriaasissaanni §7-imi allakkatigut qinersisoqarsinnaannginneranik (taasisoqarsinnaannginneranik) allassimasoqarpoq. Ataatsimiinnermi taamaallaat aalajangiisoqartalerpat kalaallit aqqinik qinnuteqartut sullinnerinut kinguarsaataassasoq Oqaasiliortut ilimagaat. Suliat sukkanerusumik ingerlanneqartarnissaat anguniarlugu allakkatigut akuersisarnerup ingerlanneqartalernissaa Oqaasiliortunit inassutigineqassaaq.

4. Oqaasiliortut suleriaasissaat (forretningsorden) pillugu:Oqaasiliortut suleriaasissaat Naalakkersuisumit atsiorneqarluni atuutilersinneqareermat allannguisinnaanissaq ajornarsereerpoq. Taamaakkaluartorli Oqaasiliortut isumaqarput suleriaasissami pitsanngorsaatissanik siunissami allannguisinnaanissaq periarfissaajuaannarumaartoq.

5. Atsersuinermi innersuussutit:
   Atsersuinermi innersuussutini aaqqitassat aaqqinneqassasut ataatsimiinnissamullu tullermut akuerineqartussanngorlugit piareerneqassasut Oqaasiliortut aalajangiuppaat.Tunumiut Avanersuarmiullu aqqisa qanoq allanneqartarnissaat inuit aqqinik akuersiniartarnermi aporfiujuartarmat inuit aqqinik tunngasunik Oqaasileriffimmi suliaqartoq Tikaajaat Kristensen ataatsimiititaliamik Tunumiut Avanersuarmiullu aqqisa qanoq allanneqartarnissaannik siunnersuusiortussanik pilersitsisoqarnissaanik siunnersuuteqarpoq.

6. Oqaasiliortukkoortut:
   6.1. MIO-mi taaguutit:

• 6.2. Ph.d.-gradimik angusiffiusinnaasut:
  Ilisimatusarfimmi Ph.d.-gradimik angusiffiusinnaasut pingasut kalaallisut ima taaguuserneqarput:6.2.1. Arktiske studier – pædagogik og uddannelsesvidenskab:
  Issittumi ilisimatusarnerit – pædagogikkimik ilinniartitsinermillu ilisimatusarneq6.2.2. Arktiske studier – sundheds- og samfundsforhold
  Issittumi ilisimatusarnerit – peqqissutsimut inuiaqatigiilerinermullu tunngasut

  6.2.3. Arktiske studier – kultur, sprog og samfundsforhold
  Issittumi ilisimatusarnerit – kulturi, oqaatsit inuiaqatigiinnilu pissutsit

  6.3. Ilisimatusarfimmi immikkoortortaq nutaaq ‘Afdeling for Økonomiske & Samfundsvidenskabelige Studier’:

  Ilisimatusarfimmi immikkoortortat marluk Inuiaqatigiilerinermik Ilisimatusarnermut Immikkoortortaq (qallunaatut: Afdeling for Samfundsvidenskab) aamma Aningaasaqarnermut Aqutsinermullu Immikkoortortaq (qallunaatut: Afdeling for Økonomi og Ledelse) ataatsimut kattunneqarnerisa kinguneranik immikkoortortaq nutaaq Afdeling for Økonomiske & Samfundsvidenskabelige Studier pilersinneqarpoq. Immikkoortortaq nutaaq Oqaasiliortut kalaallisut ima taaguuteqassasoq akueraat: Aningaasaqarnermik Inuiaqatigiilerinermillu Ilisimatusarnernut Immikkoortortaq.

  6.4. Mikroplast:
  Eqqakkat mikisuararsuit qallunaartut ‘mikroplast’-inik taaneqartartut ‘eqqakkat arrortinneqarsinnaanngitsut’-nik taaguuserneqarnissaannik siunnersuuteqartoqaraluartoq Oqaasiliortut aalajangerput oqaasersiaatillugu atoraanni paatsoornannginnerussasoq, tassami ‘eqqakkat arrortinneqarsinnaanngitsut’ pineqartillugit ‘mikroplast’-it kisimik eqqartorneqarneq ajorput. Tassa Oqaasiliortut ‘mikroplast’ atorneqassasoq aalajangiuppaat.

  6.5. Namminersulivinneq, namminiilivinneq:
  Politikkikkut ‘selvstændighed’ pineqartillugu oqaatsit ulluinnarsiutaalereersut ‘namminersulivinneq’ aamma ‘namminiilivinneq’ taaguutissatut akuerineqassasut Oqaasileriffimmiit inassutigineqaraluartoq Oqaasiliortut aatsaat ataatsimeeqqinnissami aalajangeerusullutik kinguartitsipput.

7. Taasariaqartut allat:
   7.1. Ataatsimeeqqinnissamut ulluliineq:
   Ataatsimeeqqinnissaq pissaaq decembarip 12-iata 16-atalu akornanni.7.2. 2017-imut pilersaarusioqatigiinnissamut ulluliineq:
   Ulluliisoqanngilaq Oqaasileriffiulli ataatsimeeqqinnissamut oqaluuserineqarsinnaasunik missingersuusiornissaa Oqaasiliortuniit piumasarineqarluni. Ataatsimeeqqinnissami aatsaat ulluliisoqassaaq.7.3. Royal Arctic Line-imiit taaguutit (ilisimatitsissutitut):
   Royal Arctic Line-ip Nuummi umiarsualivittaami allagartanik ikkussuinissaanut Oqaasileriffimmiit siunnersuutigineqartut Oqaasiliortunut ilisimatitsissutigineqartut imaapput:

   7.3.1. Nassiussaleriffik Allaffeqarfillu, Cargo Expedition & Administration
   7.3.2. Sullitat biiliinut inissiivik, Customer parking
   7.3.3. Sulisut biiliinut inissiivik, Staff parking
   7.3.4. Nassiussisarfik aallertarfillu / Nassiussisarfik & aallertarfik, Unloading- & Loading of cargo
   7.3.5. Inniminniisarfik atuisunillu sullissivik, Booking & Customer Service
   7.3.6. Assartugaleriffik umiarsuarnillu kiffartuussivik, Forwarding & Agency
   7.3.7. Key Account Managerit, Key Account Managers
   7.3.8. Umiarsuarnik ingerlatsisut, Fleet Management
   7.3.9. Inuttalersuisut, Crewing
   7.3.10. Pilersaarusiornermik immikkoortortaqarfik, Operations Management
   7.3.11. Atortunik isumaginnittut / Atortuutinik isumaginnittut, Equipment Management
   7.3.12. Terminalilerisut, Terminal operations
   7.3.13. HSEQ-Sillimmasiineq, HSEQ-Assurance

   7.4. Oqaasiliortut suliassaasa killiffiannik ilisimatitsineq:
   Oqaasiliortukkoortussat killiffiannik Oqaasiliortut ilisimatinneqarput.

Oqaasiliortut siulittaasuat                   Allatsi

Bolatta M. Vahl               Minik Jeremiassen