Ujarlerit

Oqaasiliortut 2018 – 5

OQAA.20.09.18

Oqaasiliortut ataatsimiinnerat sisamanngorneq 20.09.2018 nal. 10-12.00,

Ilimmarfiup atuagaateqarfiata ataatsimiittarfiani

 

Peqataasut:

Oqaasiliortut: Mariia Simonsen, Knud Møller, Angunnguaq Karlsen aamma Juaaka Lyberth
Oqaasileriffimmit: Katti Frederiksen
Mette Larsen Lyberth suliffimminut atatillugu angalagami peqataanngilaq.

 

Oqaluuserisat:

1. Oqaluuserisassat akuerineqarnerat.
Oqaluuserisassat akuerineqarput.

2. Imaqarniliap akuerineqarnera.
Juunip 20-anni 2018-imi ataatsimiinnermit imaqarniliaq akuerineqarpoq.

3. Oqaasiliortunut ilaasortaq nutaaq pillugu ataasiakkaarluni ilisaritinneq pivoq.
Angunnguaq Karlsen Nunatta Atuagaateqarfianiit Naalakkersuisunut innersuussaavoq, Juana Petrussen, upernaaq tunuartoq, taarserlugu ilaasortanngorpoq. Angunnguaq Karlsen Ilinniartitaanermik Aqutsisoqarfiup Ilinniusiorfittaani sulisuuvoq.

4. Siulittaasumit Oqaasileriffimmiillu ilisimatitsissutit ilaasortanut apuunneqarput.
Oqaasileriffimmiit sulisoqarneq suliallu assigiinngitsut pillugit ilisimatitsisoqarpoq.

5. Aternik akuersineq.
Aternik aalajangiiffigisassaqanngilaq, taamaattorli aqqit akuersissutigineqarsimasut kingulliit ilisimatitsissutigineqarput, tassaasut Asasaq, niviarsiaqqat atiattut, kiisalu Sinni, nukappiaqqat niviarsiaqqallu atiattut.

6. Aalajangiiffissat allat:
Taaguutinik suliaqarnerup pitsanngorsarneqarnissaanut tunngasut Siumup kiisalu Inuit Ataqatigiit Inatsisartunut aalajangiiffigisassatut siunnersuutaat Oqaasiliortut oqaluuseraat.
Oqaasiliortut saaffiginnissutit pineqartut pillugit naatsumik akissusiussallutik isumaqatigiissutigaat, siullermilli akissusiornerminni erseqqissarneqartariaqarsoraat maanna Oqaasileriffimmi pissutsit (sulisoqarnikkut aningaasaqarnikkullu) qanoq ittuunerat. Oqaasiliortut taaguusersuuserinermi suliat tamakkiinerusumik ataavartumillu ingerlanneqarnissaasa maannamit pitsaanerusumik sinaakkutaqartinneqarnissaat ujartorpaat, taamaaliortoqassappallu Oqaasileriffimmi minnerpaamik sulisumik immikkut taaguutilerisoqalernissaa, tassa qitiusumik pisortatigoortumillu ataqatigiissaarisussaqalernissaa, piviusunngortinneqartariaqartoq oqaatigaat. Maanna oqaaserpassuit katersaataareersut iluamik siunertanut aalajangersimasunut naapertuuttumik ineriartortinneqarsinnaanngornissaat atorfinitsitsinikkut aningaasaliinikkullu aatsaat iluamik ingerlanneqarsinnaalissapput.
IA-p aalajangiiffigisassatut siunnersuutaani inatsiseqarnikkut taaguutit eqqartorneqarput, inatsisilerinerli immini siammaseqimmat Oqaasiliortut erseqqissarneqartariaqarsoraat
inatsisilerinermi suliaqarfiit sorpiaat  saaffiginnissummi pineqarnersut.
Qulaani nassuiaatigineqartut tunngavigalugit taaguutilerinermik ineriartortitsineq pillugu naliliisoqarnissaa Oqaasiliortut tikilluaqquaat, aammali politikerit saaffiginnillutik nassuiaanneqarnissaminnik pisariaqartitsissagaluarunik tikilluaqquneqartut  erseqqissaatigalugu.

7. Suliat allat pillugit ilisimatitsineq.
Oqaasiliortut periusissiaanni maanna suliarineqartumi suleqatigiit oqaasertaliussassatut siunnersuutigisimasaat imaalillugit akuersissutigineqarput:

Anguniagassatut takorluukkat (vision)
Oqaasiliortut oqaatsinik katersinermikkut, nalunaarsuinermikkut ilisimasanillu tunngaveqarlutik nutaaliornermikkut innuttaasut suliffeqarfiillu oqaatsinik atuinerat suli
pitsaanerulersissavaat nukittorsarlugillu.

Naammasserusutat (mission)
Oqaasiliortut kalaallit oqaasii ataavartissavaat, siuarsarlugit patajaallisarlugillu, siunnersuinikkut, ilitsersuinikkut qaammarsaanikkullu.

8. Ataatsimiinnissap tulliup ullulerneqarnera.
Piffissami uani ataatsimiittoqaqqissaaq: 29.okt – 2.nov. 2018

9. Tamalaat
Juaaka Lyberthip Oqaasiliortunit ilaasortaanerminit tunuarniarnini ilisimatitsissutigaa, Kalaallit Atuakkiortullu innersuussassaannik nutaamik nassaaruni tunuarniuteqarumaarnini oqaatigalugu.

 

Mariia Simonsen, Oqaasiliortut siulittaasuat                  

Mette Larsen Lyberth, Oqaasiliortut siulittaasuata tullia

Juaaka Lyberth, Oqaasiliortuni ilaasortaq                    

Knud Møller, Oqaasiliortuni ilaasortaq