Ujarlerit

Kulusumi Tunumi oqaatsit pillugit oqallinneq

Susassaqartitsinermut atatillugu ukiut pingasut matuma siornatigut Unnuk Kulturisiorfik ingerlattalerniarlugu aalajangerpugut, kisianni nunaqarfitsinni suliffiit ikimmata takorlooruminaatsissimavarput iluatsittumik kitaanitut ingerlasinnaanersoq.

Taamaariarmat allatut ingerlanniarlugu aalajangerpugut.

Pilersaarusiorpugut arfininngorneq sapaallu Kulturip Ulluanik taallugit sammisassaqartitsiniarluta. Taamanili ingerlattalerparput.

Ukioq manna pingajussaat ingerlapparput. Ukiut tamaasa arfininngornermi pisussat allanngorartarput sapaammili pisussat assigiinnapajaartarlugit.

Ukioq manna arfininngornermi nal.13.00-16.00 assinik 60-kkunniit ullumimut assilisat katersukkat saqqummersippagut, takusarneqarluarput. Takusaasut aamma periarfissaqarput kinguaariit allattorsimaffiannik sanasinnaallutik.

Nal.19.00-20.00 Tunumiut oqaasii tammaannassappat? Qulequtaralugu oqallititsivugut, iluatsilluartumik.

Sapaat na.13.00-16.00 ameq ilivitsoq errorneqanngitsoq imullugu qangatut nutsuullugu nukittuniunneq kingullerpaanngortoq ajugaalluni, qimmeq qitimut qilerlugu arpanneq (tasikumiarneq), qangatut arsaanneq. Inuit soqutiginnittaqaat aggialluartarlutik.

Siornatigut ingerlannikuuagut ajagarneq, kaassarneq, kalattoorneq, tivaneq, oqaluttuatoqqanik oqaluttuartitsineq, qivittulersaarneq il.il.

Oqallitsitsineq

-Tunumiut oqaasii tammaannassappat? Qulequtaralugu arfininngorneq 19.01.19 nal.19.00-21.00 oqallititsineq ingerlanneqarpoq. Oqallititsineq ingerlakkusussimavara ilinniartitsisutut malugiartuinnarakku sukkasuumik sumiorpaluutigut allanngoriartortut.

-Oqallititsineq atuarfimmi ingerlanneqarpoq – katersortarfiup kiassaataa ajormat.

-Oqallinnermi inuit amerlanerpaanngormata 70 sinnilaarpaat, soqutiginneqaat.

-Oqallititsineq pilersikkusullugu qangali eqqarsaatigisarnikuuara, meeraaninniit ataataga siulitsinnik pingaartitsisorujussuaq tusaajuaannarakku sunnertinnikuugama siulitsinnut tunngasut ulluinnarni atugariniarsarigakkit. Assersuutigalugu angajoqqaama katersarpassui massakkut katersugaasiveeqqaanni pigaakka.

-oqaatsit tallimat aallarniutigisagut ukuupput: iiji (suu), qinnivalikkaa (qinngasaaraa), mappi (nerpik), uutsiler (igasoq), erdivii (puat)Oqaatsit eqqartorneqartut assut eqiiiallatitsipput inuillu oqaatsinik taakkuninnga atuilersimasut nassuerlutik namminneq maluginagu atulersimallugit, massakkumiillu atorunnaarusullugit.

Ammasumik oqallittoqarpoq kissaatigivaallu kukkugaangamik naqqinneqartarumallutik.

Eqqartorneqartut ilagivaat qarasaasiakkut/fabebook allannermi sumiorpaluutigut eqqugaanerpaasut, uanga taanna isummerfigisinnaasimanngilara facebookimik atuisuunnginnama.

Kisianni aamma eqqartorpagut soorlu inummi taaguutit, uumasut, taggisillu allat sumiorpaluutitsinni allaanerusumik taagorneqartut nittartakkamik pilersitsisinnaagaanni tassunga allattorlugit tammatsaa- liorneqarsinnaagaluartut imaluunniit facebookimi quppernermik pilersitsilluni – kisianni uanga tamakku pikkoriffiginnginnakkit akuuffigisinnaanagit (naak allattugaateqarluaraluarlunga sumiorpaluutitsinnik).

Oqaatsit ataasiakkaat assigiinngitsut saqqummerput oqallisigineqarlutillu -Oqallinnerup kingorna malunnartumik atuartut anginerit oqaatsinik ataasiakkaanik apersuillattaarput ilikkarusutaminnik, taavalu inersimasut angutaanerusut angernermik suu-mik atuilernikut malunnartumik tusarsaajunnaarallarput. Inersimasut eqiiallaqqaqaat oqaatsinik atuinermikkut sissuernerusutut ilerput.

Nunaqarfitsinni kulturi pingaartinneqartorujussuuvoq. Nunatsinni qajartornermik qaffassaaqqittoq Mannarsi M. Kulusumi inuusuttuunikuuvoq qajartornermillu ilinniarluni kalaaleqatiminut ingerlarteqqitaminik. Taavalu tivaneq kitaani tammarnikoq Kulusummiup Milka Kûitse-p Aasivimmi allamik ilaqarluni saqqummerseqqimmagu – tivanerup anersaava siumut aallaqqinnikuuvoq, aamma Milka Europami 70-kkunni angalalluni tivanermik takutitsisarnikuuvoq, ulluinnarlunilu touristinut Kulusummi takutitsisarnikuulluni.

Kulusuk aasamut tunngavilerneqarnerminiit ukiunik 110-nik ukioqalissaaq taamaammat kultoritoqaq qanittuararsuuvoq – “timitsinniilluni”.

-Kingusinnerusukkut oqallittoqartarnissaanik kissaateqartoqarpoq aamma tamanna aalajangiupparput arlaannik qulequtalerluta ingerlateqqikkumaarlugu.