Decembarip 17-ianni 2025-mi Oqaasiliortut ataatsimiinnerminni aalajangerput Samuel Kleinschmidtip 1851-imi allattaasiliaa, allattaasitoqqamik taaneqartartoq, januaarip aallaqqaataat 2026 aallarnerfigalugu pisortatigoortumik allattaatsitut atorunnaarsinneqassasoq. Tamatuma kingorna kalaallisut allattaaseq pisortatigoortumik atuuttoq ataasiinnanngussaaq, tassa Landsrådip ileqqoreqqusaa kalaallit allattaasianni allannguutissat pillugit 14. maaji 1973-imeersoq tunngavigalugu atuutilersinneqarsimasoq, allattaasitaamik taaneqartartoq.
Inatsisitigut tunngavik
Aalajangiineq Inatsisartut inatsisaat nr. 5, 1. juuni 2017-imeersoq Oqaasiliortut pillugit inatsit naapertorlugu pivoq. Inatsimmi aalajangersarneqarpoq Oqaasiliortut piginnaatinneqartut pisortatigoortumik kalaallisut allattaaseq aalajangersassallugu aamma tamanut saqqummiutissallugu.
Oqaasiliortut pillugit Inatsisartut inatsisaanni 2017-imeersumi aalajangersarneqarpoq Landsrådip ileqqoreqqusaa kalaallit allattaasianni allannguutissat pillugit 14. maaji 1973-imeersoq atuutissasoq Oqaasiliortut allattaaseq pillugu aalajangersaanissaata tungaanut. Maanna Oqaasiliortut piginnaatitaanertik naapertorlugu allattaaseq pillugu aalajangersaapput.
Aalajangiinermut tunngaviusoq
Landsrådip ileqqoreqqusaani aalajangersarneqarpoq Samuel Kleinscmidtip allattaasiliaa allattaatsimik allamik taarserneqassasoq allattaaserlu taanna nutaaq ilinniartitsinermi atortussat pisariaqartut suliarineqarnerannut peqatigitillugu 1973-imi ukiup atuarfiusup aallartinneranit atuutsikkiartuaarneqassasoq. Taamaattorli taamanikkut kingornalu aalajangersarneqanngilaq allattaasitoqaq qaqugu qanorlu pisortatigoortumik atorunnaarsinneqassanersoq.
Oqaasiliortut naliliipput allattaasitoqaq ullumikkut pisortatigoortumik atorneerutereersoq, ilinniusiat, pisortani allakkiat, atuakkiat, TV-kkut aallakaatitat saqqummersitallu allat allattaasitaaq atorlugu saqqummiunneqartarmata.
Oqaasiliortut allattaaseq pillugu aalajangiinerat taamaalilluni periutsimik ukiorpassuanngortuni atuutereersumik pisortatigoortumik aalajangersaaneruvoq, pissutsinik atuuttunik allannguingaartussaanngitsoq.
Allattaasitoqqap atuukkunnaarsinneqarnissaata kingunissai
Kalaallisut allattaaseq pisortatigoortumik atuuttoq ataasiinnanngussaaq, tassalu allattaasitaamik taagorneqartoq kisimi pisortatigoortumik atuutilissalluni. Oqaasiliortut allattaaseq pillugu aalajangersaagaangamik allattaasitaaq kisiat tunngavigalugu aalajangersaasassapput. Tamatuma kingunerisaanik inuit aqqi kalaallisut pilerfillit Oqaasiliortunut qinnutigineqartut allattaasitaaq naapertorlugu taamaallaat akuersissutigineqarsinnaassapput.
Oqaasiliortut erseqqissaatigaat aalajangiineq innuttaasut pisortanut allanulluunniit allattaasitoqaq atorlugu saaffiginnissinnaanerannik killerlersuissutaassanngimmat. Kikkulluunniit allattaasitoqaq atorlugu pisortanut assigisaannulluunniit suli saaffiginnissuteqarsinnaapput, pisortatigoortumilli akissutit allattaasitaaq naapertorlugu allanneqartassapput.
Attavissat
- Beatrine Heilmann, Oqaasileriffimmi pisortaq, tlf. 38 40 61, behe@oqaasileriffik.gl
- Mariia Simonsen, Oqaasiliortunut siulittaasoq, tlf. 55 78 46, mariias296@gmail.com