Oqaasileriffik pilersinneqarpoq oqaatsit pillugit allaffeqarfissaq pillugu suleqatigiissitap suliaata 1996-imeersup naammassineqarnerata Inatsisartunilu tamakkiisumik akuerineqarnerata kingorna.

1998-imi Oqaasileriffik pilersinneqarpoq ataatsimillu inuttalerneqarluni, aappaaguani sulisut marlunnik ilaneqarput, 2003/04-milu ilinniartunik pingasunik atorfinitsitsinikkut amerlineqaqqillutik.

Oqaasileriffik ullumikkut aqqaneq-marlunnik sulisoqarpoq, tamatuma saniatigut ilinniartunik arfineq-marlunnik ikiorteqarluni.

Oqaasileriffiup suliassaqarfiit annertuut assigiinngitsut tallimat suliaqarfigai:

Oqaasiliortut suliassaataannik isumaginninneq aamma inuit aqqinik suliaqarneq, Nunat Aqqinik Aalajangiisartut suliassaataannik isumaginninneq, oqaatsitigut teknologimik (oqaaserpassualerinermik) ingerlatsineq, kiisalu tusagassiorfinnut kalaallisut oqaatsit pillugit kiffartuussineq.