21.02.2026
Ukioq 2026-mi UNESCOmit qulequtaritinneqartoq
Oqaatsit arlallit atorlugit ilinniartitaaneq
pillugu inuusuttut isumaat
Ukioq manna Nunarsuaq Tamakkerlugu Ilitsoqqussaralugu Oqaatsit Ulluannut UNESCO-mit qulequtaritinneqartup naqissuserpaa inuusuttortavut oqaatsinik assigiinngissitaartunik kingornussisussaannaanngitsut, aammali tassaasut siunissaminnut pingaaruteqarluinnartut peqataallutillu ineriartortitseqataasussaasut.
Inuusuttut misilittagaat, isiginnittariaasiat aammalu peqataatinnissaat ilinniartitaanerup ineriartortinneqarnerani pingaaruteqarluinnarput, taakkumi peqatigalugit ilinniartitaaneq tamanik peqataatitsisoq piujuartitsisumillu tunngaveqartoq taamaallaat qulakkeerneqarsinnaavoq.
Sooq ilitsoqqussaralugu oqaatsit pingaaruteqarpat?
Ilitsoqqussaralugu oqaatsit tassaapput:
- kinaassutsimut attuumassuteqartut kulturikkullu ataatsimoortitsisut
- ilinniarnissamut eqqarsartaatsimillu ineriartortitsinissamut aqqutissaasut
- inuiaqatigiinni peqataanissamut aammalu oqartussaaqataanermut aqqutissaasut
Ilisimatusarnerit takutippaat ilitsoqqussaralugu oqaatsinik tunngaveqarluni ilinniartitsineq ilinniarnermi angusaqarnerusitsisartoq, kiisalu oqaatsinik allanik ilinniarnermut iluaqutaasartoq.
Oqaatsinik arlalinnik oqaaseqarneq atortorissaarutillu digitaliusut ineriartortinneqarnerat
Ikiuutissanik digitaliusunik ineriartortitsinerujussuup silassorissuusianillu atortut tunngaveqartut annertusiartuinnarnerisa nalaanni pingaaruteqaleraluttuinnarpoq oqaatsit assigiinngissitaartut tamakkunani aamma piunissaat qulakkeerniassallugu. Internetsimi allassimasut takusassiallu, kiisalu silassorissuusianik atortut amerlanertigut tassaasarput oqaatsinik nunarsuarmi atorneqarnerpaanik imalinnik tunngaveqartut. Taamaattumik oqaatsit minnertut taaneqartartut aammalu nunat inoqqaavisa oqaasii atortuni digitaliusuni peqataatinneqarnissaat immikkut suliniutigineqartariaqarpoq.
Ilitsoqqussaralugu Oqaatsit Ulluannik malunnartitsinermi UNESCO-mit qulequtaritinneqartoq eqqarsaatigalugu immikkut makku sammisassatut oqallisigisassatulluunniit piukkunnarput:
- inuusuttut oqaatsinut ilinniartitaanermullu isiginnittariaasiat
- oqaatsit arlallit atorlugit ilinniartitsinerup pingaaruteqarnera
- oqaatsit inuiaqatigiinni aammalu siunissaq eqqarsaatigalugu ineriartortitsinerni inissisimanerat
PLAKATIT
