atuarneq

Oqaaseq atuarneq kalaallisut oqaasertaqarsimanngikkaluartoq, kalaallit atuarnermik ilisimasaqalinngikkallarmata. Hans Egedep ajoqersuiartortitallu allat nunatsinnut tikinnerisa kingorna kalaallit atuartinneqartaleramik atuarneq oqaasertalersimavaat.

Siornatigut nunatsinni piusimanngitsut niuertunit ajoqersuiartortitanillu eqqunneqarsimasut kalaallisut oqaasertalerneqarsimasut ilaatigut makkuupput; suaasat (ris), umiarsuaq (skib), qerititsivik (fryser), amusartoq (skuffe), ujalussiaq (tråd), qamutilik (kanon) il.il.

Sunik nutaanik takkuttoqartillugu oqaatsini nutaaliorneq takornartaanngilaq. Kalaallisut uiguusersuisinnaaneq iluaqutsiullugu oqaatsinik nutaaliorneq ajornanngitsunnguamik pisinnaavoq.

· Taaguut assingutitamut taaguutigisaq uiguutinik {–usaq/-usat} assingutitamut taaguusiunneqarsinnaavoq; suaasat, qajuusat, kumaasat, inuusaq il.il.

· Nalunngisamit anginerusoq uiguut {–suaq}atorlugu anginerutitamut taaguusiuunneqarsinnaavoq; umiarsuaq, tuttorsuaq, quersuaq il.il. 

· Qanoq iliorfigisartakkamut imaluunniit peqarfiusumut, uiguutit {–fik/-vik} atorlugit taaguusiisoqarsinnaavoq; qerititsivik, atuarfik, siniffik, sinittarfik il.il.

· Taggisinngortitsineq, uiguutit {-toq/-soq} atorlugit taaguusiortoqarsinnaavoq; amusartoq, igasoq, oqaluttartoq il.il.  

· Atugassatut siunertaasut uiguut {–ssiaq} atorlugu taaguusiarineqarsinnaapput (uiguutit {-ssaq & -liaq} aamma taama atorneqartarput); ujalussiaq, puussiaq, qarmasissiaq, atuagassiaq il.il.

· Oqaatsip nagguianik pigisaqartumik taaguusiisoqarsinnaavoq uiguut {–lik} iluaqutsiullugu; atorfilik, noqartilik, tingerlaataannalik il.il.

Oqaatsit kalaallisut nutaaliat kingulliit makku ilagaat; qarasaasiaq, oqarasuaat, nittartagaq il. il. 

Nalunngiliuk...?