Kalaallit aqqinik suliaqarneq pillugu

Inuit aqqinik akuersisarneq aggustimi 2016-imi Oqaasiliortut akisussaaffigilerpaat.

Atuakkami Kalaallit aqqi 2015-imeersumi inuit aqqisa nalunaarsorneqarneri takuneqarsinnaapput.

Oqaasiliortut Danmarkimi inuit aqqi pillugit inatsit malillugu sulisarput.

Atsiiniarnermi najoqqutassat

Oqaasiliortut pillugit Inatsisartut inatsisaat nr. 5, 1. juni 2017-imeersoq, §2, imm. 4: Aqqit siuliaqutit kalaallisuumit pilerfillit akuerisassallugit, inuit aqqinut inatsit naapertorlugu kunngip peqqussutaatigut Kal. Nunaannut atuutilersinneqartumiittut.

Oqaasiliortut aternik akuersisarnerminni najoqqutassatut makku akuersissutigaat:

• • • 1. Aqqit allattaatsit malittarisassaat naapertorlugit allanneqartassapput. Sumiorpaluutit atorneqarsinnaapput. Aterni pioreersuni uiguusersuisoqarsinnaavoq atsiisarnermi ileqquusut najoqqutaralugit, uiguutit allattorsimaffiat takuuk.
      2. Siornatigut atsersueriaaseq (kulturimi oqaluttuarisaanermilu) naapertorlugu atsiunniakkat akuerineqarsinnaapput.
      3. Aqaatit taaguutillu atinngorsimasut akuerineqarsinnaapput.
      4. Qallunaat aqqi kalaallisuunngorsakkat kalaallisulluunniit uiguusikkat akuerineqarsinnaapput. Assersuutit ilanngussat takukkit.
      5. Aqqit qallunaarpaluttut Danmarkimut qinnutigineqartassapput.
      6. Aqqit Oqaasileriffiup nalunaarsugaaniinngitsut, taamalu akuerisaanngitsut, akuersissummik peqqaarluni atsiunneqarsinnaapput. Tamatumunnga tunngasumik akueritinniarluni qinnuteqaat Oqaasiliortunut nassiunneqareersimassaaq atsiinissaq sivikinnerpaamik ullunik qulinik sioqqullugu.
      7. Atertut akuerineqarsinnaanngillat:
         • Aqqit/uiguutit ittoorutaasinnaasut kanngusutsitsisinnaasulluunniit.
           
         • Upperisarsiornermut anersaarsiornermullu tunngasut innimigisariaqartut.
           
      8. Siuliaqutit tallimanit amerlanerunissaat inassutigineqanngilaq. Aqqit marluk akornisigut kittoraateeralerlugit ataasiinnanngortinniakkat marlunnik naleqartassapput
      9. Atsersuinermut ilitsersuutit decembarip 14-ianni 2016-imeersut atorunnaarput.

• • Oqaasiliortunit akuersissutigineqarput Nuummi februaarip 26-anni 2020-mi.
  • • Atsersuinermi najoqqutassat nassuiaataat
    • Qinnuteqaat immersugaq oqaasileriffik@oqaasileriffik.gl-imut nassiunneqassaaq