Oqaatsitta qanoq ineriartortinneqarnissaat pillugu ataatsimeersuarneq
Ilinniartitaanermut, Kultureqarnermut, Timersornermut
Kalaallit oqaasii pillugit ataatsimeersuarneq qulequtaqarpoq: Oqaatsitta atugaaneranni ilinniartitsissutaanerannilu anguniakkat najoqqutallu.
Ataatsimeersuarnermi siunertaavoq kalaallit oqaasiisa atugaanerat nalilersuiffigissallugu siunissamilu qanoq ineriartortinneqarnissaat inassuteqaateqarfigissallugu.
Oktobarimi 2022-mi oqaatsivut pillugit isumasioqatigiinnerup kingorna pisariaqalersut ilagaat kalaallit oqaasiisa siunissami qanoq ineriartortinneqarlutillu atorneqarnissaat pillugu politikkikkut innersuussisoqarnissaa. Naalakkersuisut isumaqarput kalaallit oqaasii tammatsaaliinnarnagit aammali eqqarsaatigilluakkamik ineriartortinneqarnissaannut isumaliutiginnittoqarlunilu innersuussisoqarnissaa pisariaqavissoq. Taamaattumik Naalakkersuisut kissaatigaat inuiaqatigiinni oqaatsit pillugit susassaqartut ingerlatsisullu ataatsimeersuartinneqassasut.
Kalaallit oqaasii qangamut naleqqiullugit tatisimaneqannginnerusutut ikkaluartut siunissamut qanoq allanngoriartornissaannut ineriartortinneqarnissaannullu tunngasut tamanit sammineqartanngillat. Piffissanngorsorinarpoq immitsinnut aperinissarput: Oqaatsivunuku qanoq ineriartortinniarivut, sumullu atorniarpavut?
Avataanit allamiut oqaasiinit sunnigaanerput aatsaat taama ingasatsigilerpoq, taamaattumik piffissanngorpoq oqaatsitta atugaanerat pillugu pisortatigut sunniuteqarfigineqarsinnaasut isummersorluarfigineqarlutillu politikkikkut suliniutissanik inassuteqartoqarnissaa.
Ataatsimeersuarnermi kattuffiit, peqatigiiffiit, soqutigisaqaqatigiiffiit, pisortaqarfiit, suliffeqarfiit, tusagassiuutit, ilinniarfiit, atuarfiit, kommunit, naalakkersuisoqarfiit allallu immikkut oqalliseqataatissallugit piukkunnartut ataatsimeersuarnermi peqataapput.
Ataatsimeersuarnermi ullormi siullermi kalaallisut oqaatsit pillugit killiffissiuisoqarpoq, tassa kalaallisut oqaatsit piffinni suliaqarfinnilu assigiinngitsuni atugaanerat pillugu oqallittarfinni assigiinngitsuni isummersortoqarlunilu nalilersuisoqarluni. Ataatsimeersuarnerup ulluata aappaanni oqallisigineqarpoq kalaallisut oqaatsit ineriartortinneqarnissaat pillugu suut pitsanngorsaaffigineqartariaqarnersut.
Kalaallisut oqaatsit pillugit ataatsimeersuarnermi saqqummiunneqartut eqimattakkuutaarnernilu eqqartorneqartut oqallisigineqartullu eqikkarneqarneri, kiisalu kalaallisut oqaatsit siunissami qanoq ineriartortinneqarnissaat pillugu inassuteqaatit tulliuttuni atuarneqarsinnaapput.
MALUGIUK pdf-it aaneqarsinnaasut tungujortumik qaamasumik qalipaateqarmata.
Pingasunngorneq 29. marsi 2023
OQAATSIVUT NUNARSUARMIOQATAANERUP QEQQANI
Peter P. Olsen · Ilinniartitaanermut, Kultureqarnermut, Timersornermut Ilageeqarnermullu Naalakkersuisoq
- Tikilluaqqusineq
Per Langgård · Oqaasileriffimmi siunnersortaaneq
Aqqaluk Lynge · Naalakkersuisuni Inatsisartunilu ilaasortaasimasoq (1983-1995, 2002-2005)
Karl Kristian Olsen, Paartoq aamma Kaali Olsen · Ilinniartitaanermut Aqutsisoqarfimmi pisortaq
Kuupik Kleist · Inuit Issittormiut Kattuffianni Kalaallit Nunaanni siulittaasoq aamma Carl Chr. Olsen, Puju · Inuit Pisinnaatitaaffii pillugit Siunnersuisoqatigiinni ilaasortaq
ULLOQ SIULLEQ: KALAALLISUT OQAATSIT PILLUGIT KILLIFFISSIUINEQ
Kalaallisut oqaatsit piffinni suliaqarfinnilu assigiinngitsuni atugaanerat pillugu oqallittarfinni assigiinngitsuni isummersortoqarlunilu nalilersuisoqarpoq. Oqallittarfiit immikkut tamarmik allatseqartinneqarput allatsillu oqallittut oqallisigisaannik allattuillutillu eqikkaapput, kingornalu eqikkakkanik saqqummiussillutik.
Oqallittarfiit assigiinngitsunut ukununnga immikkoortinneqarput:
- Angerlarsimaffiit meeqqeriviillu
- Atuarfiit, ilinniarfiit ilinniusiallu
- Tusagassiuineq saqqummersitsisarnerlu
- Suliffeqarfiit
- Pisortat aqutsivii kiffartuussiviilu
- Ilisimatusarfiit
Oqallittarfinni qulaani taaneqartuni nalilersuisussanut nalilersugassatut makku suliakkiutigineqarput:
- Angerlarsimaffiit meeqqeriviillu pillugit oqallittuni:
- Oqaatsitta ilaqutariinni inoqutigiinnilu maannamut atugaanerat nalilersorsiuk.
- Meeqqeriviit meeraaqqeriviillu oqaatsitsinnik atuiffiunerat nalilersorsiuk.
- Pitsaaqutit ajoqutillu nalilersuinissinni allattussavasi.
- Atuarfiit, ilinniarfiit ilinniusiallu pillugit oqallittuni:
- Meeqqat atuarfianni atuartitsineq meeqqat oqaatsitsinnik ilikkariartornerannut qanoq sunniuteqarnersoq nalilersorsiuk.
- Ilinniarfiit kalaallit oqaasiinik atuinerat ineriartortitseqataanerallu nalilersorsiuk.
- Ilinniartitsinermi atortussiat ullumimut kalaallit oqaasiinik atuiffiunerat ineriartortinneqarnerallu nalilersorsiuk.
- Pitsaaqutit ajoqutillu nalilersuinissinni allattussavasi.
- Tusagassiuineq saqqummersitsisarnerlu pillugit oqallittuni:
- Tusagassiuinermi oqaatsitta allamiullu oqaasiisa atorneqarnerat nalilersorsiuk.
- Kalaallisut atuakkiat saqqummersitallu allat oqaatsitta atugaanerannut sunniutaat inerisaaqataanerallu nalilersorsiuk.
- Pitsaaqutit ajoqutillu nalilersuinissinni allattussavasi.
- Suliffeqarfiit pillugit oqallittuni:
- Suliffeqarfinni kalaallit oqaasiinik allannikkut oqalunnikkullu atuineq nalilersorsiuk.
- Suliffeqarfiit innuttaasunik kalaallisut kiffartuussinerat nalilersorsiuk.
- Pitsaaqutit ajoqutillu nalilersuinissinni allattussavasi.
- Pisortat aqutsivii kiffartuussiviilu pillugit oqallittuni:
- Pisortat allaffissornikkut ingerlatsinerminni inatsisiliortarnerminnilu kalaallit oqaasiinik atuinerat nalilersorsiuk.
- Innuttaasunik kiffartuussivinni kalaallit oqaasiisa atugaanerat nalilersorsiuk.
- Pitsaaqutit ajoqutillu nalilersuinissinni allattussavasi.
- Ilisimatusarfiit pillugit oqallittuni:
- Kalaallit oqaasiisa ilisimatusaatitut oqaasilerinikkullu ullumikkut killiffiat nalilersorsiuk.
- Ilisimatusarnikkut oqaatsitta oqaatsinut allanut naleqqiullutik inissisimanerat nalilersorsiuk.
- Pitsaaqutit ajoqutillu nalilersuinissinni allattussavasi.
Oqaatsitta ilaqutariinni inoqutigiinnilu maannamut atugaanerat pillugu nalilersuillutik oqallittut oqallisigisaannik eqikkaaneq
- Nammineq ilitsoqqussaralugu oqaatsit atorluarsinnaanngoraanni ajornannginnerusumik oqaatsinik allanik ilikkarsinnaaneq anguneqarsinnaavoq
- Illoqarfiit anginerit avataanni kalaallisut oqaatsit atugaaneri aarlerinartorsiunngillat
- Nuummi marloqiusamik oqaaseqartoqarnera malunnarpoq, illoqarfinnili allani ulluinnarni danskisut oqalunneq ulluinnarsiutaanani
- Meeqqat oqaatsinut allanut alaatsinaannerat tapersersorneqartariaqarpoq, taamaattorli oqaatsinik allanik atuinerat tusarnaaginnarneqartariaqarani akuleruffigineqartariaqarpoq oqaatsinik kukkusumik atuilissanngippata
- Meeqqap mikineraniit inersimasunngornissaanut kalaallisut oqaluuttarnissaa pingaaruteqartorujuuvoq
- Angerlarsimaffinni oqaatsinik aalajangersimasunik atuisinnaaneq killilerneqartariaqarpoq kalaallisut oqaatsit puigorneqassanngippata/Namminneerlutik oqaatsinik atuisinnaanertik aamma aalajangersarsinnaavaat
- Atuakkat atorluarneqarnerusinnaapput
- Teknologiit atorlugit, Ipadit assigisaallu atorlugit, oqaatsinik ”ilinniarnerit” ajornartorsiutaapput, tamanna oqaatsinik iluamik ilikkarnerunngimmat
- Nuuk kisimi kalaallisut oqaluttunik ajornartorsiorfiunngilaq illoqarfinni allani aamma taamaappoq
- Inersimasutut meeqqat oqaatsinik arlaannik atuerusunnerannut pisooqataavugut, akueriinnarutsigu ass. danskisuinnaq oqaluttut kalaallisut oqaluunneqartanngippata kalaallisut ilikkarnavianngillat
- Oqaatsit angerlarsimaffimmi ataqqineqanngippata meeqqat oqaaseqarnerannut sunniuteqartorujuussapput
Meeqqeriviit meeraaqqeriviillu oqaatsitsinnik atuiffiunerat pillugu nalilersuillutik oqallittut oqallisigisaannik eqikkaaneq
- Meeqqat danskisuinnaq oqaasillit nunatsinnut nuunnerminni meeqqerivinni kalaallisut oqalulersinnaasarput, taamaalillunilu angajoqqaajusut kalaallisut oqalunnissamik ilinniartariaqarlersarput
- Ipadit mobiilillu ”paarsisutut” atorpallaarneqannginnissaat eqqumaffigineqartariaqarpoq
- Assilissat oqaasertalerneqarsinnaapput, taamaalilluni oqaatsinik assigiinngitsunik oqaasertusartoqarsinnaavoq
- Meeqqat ilikkajanerat oqaatsinik ilikkarnissaannut isumallualersitsipput
- Meeqqat oqaatsinik atuinerat angerlarsimaffimmit meeqqerivimmiillu pinngortarput, taamaammat siunissamut tunngaviliisuupput
- Sumiorpaluutit oqalunnermi atorneqartarnerisa pingaartinnissaat pingaaruteqarpoq tammariartussanngippata, kikkut tamarmik oqalunnermi kitaamiusut oqaluttariaqanngimmata, taamaalilluni sumiorpaluutit ineriartortinneqassammata
- Oqaluttariaaseq kulturimiippoq aamma oqaloqatigiittarneq annertusarneqartariaqarpoq
- Meeqqat atuffanneqartarnerat tusarnaarsinnaanerannut aamma sunniuteqartarpoq oqaatsinik ilikkarnissaannut tunngaviliisuugami
- Kalaallisut meeqqanut erinarsuutit pilerinartut amigaataapput, ilikkarnerunissaat kissaatigigutsigu
- Kalaallisut oqaatsinik atuineq annikilligaluttuinnarpoq, tuluttut annertusigaluttuinnartoq ernumanarsinnaavoq
- Aalajangersimasumik sulisoqartariaqarneq pingaaruteqarpoq oqaatsit ilinniutigineqassappata
- Oqaatsinik allanik ilinniarniaraanni nammineq oqaatsit ilikkaqqaartariaqarput
Meeqqat atuarfianni atuartitsineq meeqqat oqaatsitsinnik ilikkariartornerannut qanoq sunniuteqarnersoq pillugu nalilersuillutik oqallittut oqallisigisaannik eqikkaaneq
- Meeqqerivik toqqammavittut aallarniutissaq
- Meeqqat atuarfianinngaanniiunngitsoq
- Meeqqerivinni kalaallit oqaasiisa atorneqarneri iluatsittutut nalilerneqarput
- Ilinniusiat nutarterneqartariaqartut tulluussarlugillu
- Kalaallit kinaassusaannut
- Soqutiginarsarlugit ataqatigiissarlugillu (1. klassimit 10. klassimut)
- Teknologii atorluarlugu digitaliusunik ilinniusiorneq
- Issiaannarlutik ilinniartinneqaratik
- Kalaallinik ilinniartitsisunik amerlanerusunik, soorlu ilinniarnertuunngorniarfinni
- Katersuiffiit assigiinngitsut kattullugit atortussanik katersineq
- Ordbogit, suulluunniit kalaallit oqaasinut tunngasut
- Ilinniartitsisoqatigiit naapikulanerusariaqarnerat
- 1. klassimi kalaallit oqaasii toqqammavioqqaartariaqartut
- Qallunaatut tuluttullu ilinniartitsinerit tassani aallartereertarmata
Ilinniarfiit kalaallit oqaasiinik atuinerat ineriartortitseqataanerallu pillugu nalilersuillutik oqallittut oqallisigisaannik eqikkaaneq
- Nuummi ilinniartitaaneq Nuullu avataani
- Avanersuarmi kitaanilu
- Nuummi kalaallisoorumannginnerat
- Pitsaaqutaa; avataanut ilinniariarunik oqaatsinik atuisinnaanerat; qallunaatut
- Nalilersueriaatsit naleqqussarneqatariaqartut
- Aningaasalersuineq ilungersuunneqartariaqartoq
- Ilinniartitsisut allatullu pilersuisut pilersinneqarlik
- Ilinniartitsisunngorniartuni ilinniartinneqarneq pitsanngorli
- Meeqqat atuarfianni oqaaseqqortujunnaartut
- Isummersortarnissaq sungiusarneqarnerusariaqartoq
Tusagassiuinermi oqaatsitta allamiullu oqaasiisa atorneqarnerat pillugu nalilersuillutik oqallittut oqallisigisaannik eqikkaaneq
- Ajoqutit
- Kukkusumik nutserisarneq – oqaaseqatigiinnik oqaatsinillu eqqunngitsumik nutserisarneq
- Taaguusersuutit ilisimaneqannginnerat
- Kalaallisuuisa kingulliullutik saqqummiunneqartarneri
- Kalaallinik aaqqissuisoqarnerup pingaartinneqanngippallaarnera
- Kukkuniiaatip atorneqanngippallaarnera piumasaqaataannginneralu
- Tusagassiortut oqaasilerinerusariaqarnerat
- TV-mi kalaallisut allagartalersuutit sivikippallaartumik nuisatinneqartarnerat
- Kalaallisut oqaatsit eqqarsaatigalugit piumasaqaatikippallaarnerput
- Oqaatsinik allanartunik atuivallaartoqartarnera – oqaasiviunngitsunik oqaasiliortarneq
- Nutserisariaqartuarneq – kalaallisut allaqqaarsinnaasunik pissarsiorsinnaannginnerpugut? Nutserivallaarnerup kukkunernik kinguneqarsinnaasarnera. Tusagassiortut nutserisuinnaanerat.
- Aningaasarpassuit tusarnaarneqarpiarneq ajortunut atorneqartarnerat – aningaasat eqqornerusumut atorneqartariaqarput
- Toqqaannavissumik nutserisarneq
- Tusagassiortunngorniarnissamut piumasaqaatikippallaarpugut
- Tikisitanut piumasaqaateqarnerusariaqarpugut
- Taaguusersuuserinerup amigaataanera
- Kalaallisuunngortitsineq nutserinermit salliunneqartannginnera
- Oqaasilerinerup amigaataanera
- Oqaatsit isumaasa ilisimaneqanngippallaarnerat – ordboginik kalaallisuinnaq allassimasumik amigaateqarneq
- Kalaallinut tunngasut, nuannarineqartut, soorlu nuannaartunartut, tusagassiortunit sammineqanngippallaarnerat
- Atuaasut kukkusumik oqaluttarnerat
- Ussassaarutit kukkuneqarpallaartarnerat
- Kukkunerit kinguneqartinneqarpallaartannginnerat
- Tusagassiornermi aningaasassat ikiliartornerat
- Tusagassiortut ikittunnguullutik naammassisarnerat kalaallisullu pikkorissutsimikkut inorsinnaasarlutik
- Kukkullutik oqaluttartut nakkarsarneqarpallaartarnerat
- Oqaatsinik eqqorluinnartumik atueqqusisut nakkarsaavallaartarnerat amerlasuutigullu nassuiaateqartannginnerat
- Naqqiuteqartarnermi pissutaasup nassuiarneqartannginnera – oqaasilerinerup amigaataanera
- Tusagassiortut sulipilutsinneqarpallaarnerat – ilaatigut oqaatsinik marluinnik atuisussaanertik pissutigalugu
- Ajortuinnarnik tusagaqartarnerup kajumissuseerutsitsisarnera
- Oqaasileriffiup tusagassiortunik siunnersuisarnera misissoqqinneqartariaqarpoq
- Pitsaaqutit
- Kalaallisut atuagassaqarluarneq
- Tusagassiat tamarmik nutserneqartarnerat
- Aallakaateqqitat oqaatsinik pissarsilluarfiusarnerat
- Aallakaatitat oqaatsinik pitsaasumik atuiffiusunik ilaqarnerat
- Kalaallisut tusagassiortoqarneq
- Avataaneersunik tusagassaqartitsisarneq siuariarsimaqaaq
- Tusagassiortut kalaallisut oqaasilerisinneqartarnerat iluaqutaasarpoq
- Sinerissamit tusagassaqartitsineq
- Inuusuttut imminnut tatigisut oqallorillutik tusagassiisarnerat
- Kalaallisut tusagassiat atuartartunit/naalaartartunit pingaartinneqarnerat
- Podcastit nuannerineqaqaat
Kalaallisut atuakkiat saqqummersitallu allat oqaatsitta atugaanerannut sunniutaat inerisaaqataanerallu pillugu nalilersuillutik oqallittut oqallisigisaannik eqikkaaneq
- Ajoqutit
- Kukkunersiuinerup amigaataanera (oqaatsit oqaaseqatigiillu eqqarsaatigineqarput)
- Kukkunersiuinermik piumasaqaateqanngippallaarneq
- Kalaallit Atuakkiortut saqqumilaarnerusinnaapput
- Atuakkanik nalilersuisarnerup amigaataanera
- Oqaasilerissutit amigaataanerat
- Assigiinngiiaarnerusunik atuagassaqannginneq – atuagassanik soqutiginartunik amigaateqarneq
- Kalaallisut atuagassianik pisartagaqartut ikiliartornerat
- Atuagassianik assiliartalersuisarnerup amigaataanera
- Kalaallisut atuagassat eqiagineqaleriartornerat
- Angajoqqaat meeqqamut sunniinerusariaqarput, ass. atuffassillutik, atuaqataallutik, erinarsoqataallutik.
- Ilinniutitoqqat saqqummerseqqinneqartannginnerat
- Atuffassissutit naalaagassat amigaataanerat
- Allaasitoqqamik allassimasut allaasitaanngorlugit naqiteqqinneqartannginnerat
- Atuakkanik atuartartut ikiliartornerat – Kalaallit Nunaanniinnaanngitsoq tamanna atuuppoq
- Aallakaatitat pisoqqat naniuminaappallaarnerat – oqaatigineqarporli piginnittussaatitaaneq pissutigalugu KNR-ip saqqummiussinnaanngikkai
- Ebogit amigaataanerat
- Pitsaaqutit
- Kalaallisut atuagassaqarluarneq
- Kalaallisut naalaagassaqarneq
- Atuakkiortut saqqummersitsisinnaatitaanerat (kiffaanngissuseqarneq)
- Atuakkioriaatsip ineriartortinneqarnissaanik soqutiginninneq
- Atuagassat soqutiginartut amerliartornerat
- Kalaallisut erinarsuutit sunniuteqartarnerat
- Sammisat soqutiginartut amerliartornerat
- Atuakkiat oqaatsitsinnut uummarsaataapput
Suliffeqarfinni kalaallit oqaasiinik allannikkut oqalunnikkullu atuineq pillugu nalilersuillutik oqallittut oqallisigisaannik eqikkaaneq
- Allannikkut oqalunnikkullu suliffeqarfinni oqaatsinik atuisarnissami apeqqutaasarput suliaqarfiup suunera, pisortat oqaatsit suut atorneraat sulisullu oqaatsit suut atorneraat
- Sinerissami suliffeqarfiit malunnaatilimmik kalaallisut oqalullutik allallutillu ingerlatsisarput, illoqarfinnili anginerusuni pisortat qallunaatut oqaaseqartuutillugit qallunaatut allannikkut oqalunnikkullu atuisarneq nalinginnaanerusarluni, ataasiakkaannguillu taamaallaat kalaallisut ingerlatsisarlutik
- Kalaallisut oqaatsinik killilimmik atuineq ilaatigut kalaallisut taaguusersuutinik amigaateqarnermik pissuteqartarpoq
- Suliffeqarfinni qallunaatut oqaasilik ataasiinnaatillugu annertuumik naleqqussarneq pisarpoq qallunaatullu oqaatsit atorlugit ingerlatsisoqartarluni suleqatigiit akornanni
- Suliffeqarfinni sulisunut qallunaatut oqaatsinik piginnaasaqarnissaq piumasaqaatigineqartarpoq, kalaallisulli oqaatsit piumasaqaatigineqartarnerat annikinnerusarluni
- Suliffeqarfiit taaguusersuutinik suliaqarnermi peqataasarnerat iluaqutissarujussuuvoq amerlanernillu aallunneqarnissaa kissaatiginarluni
- Suliffeqarfinni oqaatsinik atuinissat pillugit pisortat sulisullu akunnerminni isumaqatigiissutigineqartarnissaat amigaataasarpoq
- Teknologiimik aqqutissat annertunerusumik ineriartortinneqartussatut periarfissiuunneqartariaqarput
- Teknologiimik ineriartortitsinerit iluatsinnerusinnaanerusut akilersinnaanerusullu ujartorneqarniarlik iluatsinngitsut pinnagit
- Sulisussarsiortoqartillugu oqaloqatiginninnerup qallunaatut ingerlanissaa naatsorsuutigineqartariaqarpoq – suliffissarsiornermi pingaaruteqarpoq oqaatsit nammineq atorlugit oqaloqateqarsinnaanissaq
Suliffeqarfiit innuttaasunik kalaallisut kiffartuussinerat pillugu nalilersuillutik oqallittut oqallisigisaannik eqikkaaneq
- Suliffeqarfinni kiffartuussisut oqaatsit atugaannut naleqqussartarneq annertuumik pisarpoq – kalaallisut oqaaseqanngitsut kiffartuussisussaatillugit kiffartuunneqarnissaq ilaanni pinngitsoortarpoq kiffartuussaq kalaallisuinnaq oqaaseqartuutillugu, aammali kiffartuunneqarnissamik pisariaqartitsisoq kalaallisuinnaq oqaaseqartuunini pillugu suliffeqarfinnit kiffartuunneqarnissani tunuarsimaarfigisarpaa kalaallisut oqaatsini atorlugit kiffartuunneqarsinnaanngikkuni.
- Suliffeqarfinnut kalaallisut allalluni saaffiginnissutit piffissaq sivisooq atorlugu akineqartarput – qallunaatut oqaatsinut nutserneqaqqaarlutik akineqarsinnaasaramik – ilaannilu akineqanngivissortarlutik
- Suliffeqarfinnut oqaatsit pillugit politikkit sukanganerunissaat kissaatigineqarpoq
- Suliffeqarfiit qallunaatut oqaatsinik atuinerujussuat inuttaasut peqataasinnaanerannik killilersimaartitsivoq
- Allagartalersuisarneq illoqarfinni minnerni kalaallisut pisarpoq, annerusunili qallunaatuinnaq allassimasut amerlavallaarlutik
- Inatsisissatut siunnersuuteqartoqartillugu suliffeqarfiit tusarniaaffigineqartarput, akissutilli qallunaatuinnaq akissutaasarlutik kalaallisut allanneqarsimanatillu nutserneqarsimanngitsut
Pisortat allaffissornikkut ingerlatsinerminni inatsisiliortarnerminnilu kalaallit oqaasiinik atuinerat pillugu nalilersuillutik oqallittut oqallisigisaannik eqikkaaneq
- Sungiussiinnarsimaneq
- Qallunaatoorsinnaaneq paasisinnaanerlu ileqquliutiinnarnikuuarput sungiusimallugulu.
- Inatsisit
- Tunngaviusumik: qallunaatut allanneqaqqaartut kalaallisut nutserneqartarput.
- Piffissarujussuaq inatsilerituunit kalaallisut oqaaseqanngitsunit suliarineqartarput kukkunersiorneqarlutillu. Kalaallisut nutserneqarnerini inatsisilerituunit kalaalisut oqaasilinnik suleqatissaaleqineq kukkunersiuinerillu amingaataasarput
- Juristit oqaatsit atugaat kalaallisut nutserneqaraangamik paasiuminaatsorujuusarput.
- Sprogpoltikkeqarneq pappiliaannartigut piuvoq
- Nutserineq
- Marloqiusamik sulinerujussuaq piuvoq
- Nutserinermi oqaatiginiakkat ”equngalertarput”
- Taaguusersuineq amingaataasarpoq – oqaatsinik nammineq nassaassarsiorneq pisarpoq
- Saaffiginninneq
- Saaffiginnittoq: ”Kalaallisut qallunaatulluunniit?”
- Kalaallisut allalluni saaffiginnissutit akineqarniaruusaartarput qallunaatulli saaffiginnissutit akineqarnerat sukkanerusarluni
- Atorfillit/suleqatigiit
- Suleqatigiit kalaallit amerlappata attaveqatigiinneq oqaatsit ataatsit atorlugit sukkanerusumik ingerlasarpoq
Pisortat innuttaasunut kiffartuussiviini, allatullu inuiaqatigiinnut nalunaartarneranni kalaallit oqaasiinik atuisarneq pillugu nalilersuillutik oqallittut oqallisigisaannik eqikkaaneq
- Kalaallisut oqaatsigut piumasaqaatitaqartariaqarput – tamanit atorneqarsinnaasariaqarput
- Inatsisit
- Inatsisiliornermi maleruagassat allanngortinneqartariaqarput tamanit paasineqarsinnaasunik allanneqartarlutik kalaallit oqaasii atorlugit
- Kalaallisut allaqqaarneqartarnissaat sutigut tamatigut iluaqutitaqassaaq
- Sprogpolitik pingaartinneqarusariaqarpoq timitalersorneqarlunilu
- Nutserineq
- Nutserisoqartuaannartussaavugut
- Nutserisut peqqissaartumik paasinartumillu suliaqassappata aningaasalerneqarnerusariaqarput
- Taaguusersuuserineq aallunneqarnerusariaqarpoq
- Saaffiginninneq
- Oqaatsigut nammineq atorlugit sullinneqarsinnaaneq piumasaqaataasariaqarpoq – apeqqutaatinnagu ataasiinnarmik oqaaseqarneq
Kalaallit oqaasiisa ilisimatusaatitut oqaasilerinikkullu ullumikkut killiffiat pillugu nalilersuillutik oqallittut oqallisigisaannik eqikkaaneq
- Ilinniusiat, taaguusersuutit (suliaqarfinni tamani, sualummillu oqaasilerinermi), GU-mi soraarummeerutaasartut oqaasilerisinnaanermik ilaqartariaqarput
- Ilisimatusarfimmi sulisunut kalaallisut oqaasilinnut atugassarititat (marloqiusamik sulineq)
- Suliffiup saniatigut phd-nngorniarsinnaaneq/ tapersersorneqarnerunissaq
- Ilisimasanik siammarterineq kalaallisut kalaallinut aamma sinerissamut
- Qallunaatut ilinniartitsineq ajornartorsiutaasarpoq ”kalaaleq qallunaatut eqqarsartaaseqartariaqarpoq”
- Tekniskiusumik kalaallisut oqaasilerisinnaasut amerlanngillat. Oqaatsinik suliaqarfiit (ass. Oqaasileriffik) aningaasaliiffigineqartariaqarput annertunerusumik.
- Kalaallisut oqaaseqartuusut suliai annertunerusarput
Ilisimatusarnikkut oqaatsitta oqaatsinut allanut naleqqiullutik inissisimanerat pillugu nalilersuillutik oqallittut oqallisigisaannik eqikkaaneq
- Tuluttut qallunaatullu ilisimatusarnikkut oqaatsit salliutinneqarput
- Oqaatsigut naleqartinnginneqarpallaartut
- Ass: inuk ataaseq kalaallisut oqalussinnaanngippat allamiusut oqaluttariaqalertarneq, kalaallisut oqaaseqartut ”atorsartilerlugit”
- Oqaatsinik assigiinngitsunik atuisinnaaneq matorpassuarnik ammaasisarpoq (pisariaqarpoq)
- Naggueqatitsinnut sanilliulluta siuarsimanerujussuupput
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter P. Olsen ataatsimeersuarneq aallartillugu tikilluaqqusivoq.
KNR-ip aallakaatitassiaani qulaaniittumi Naalakkersuisup tikilluaqqusinera isiginnaaruk: 0:00-imit 6:15-imut.
Oqaasileriffimmi siunnersortaanerup Per Langgårdip saqqummiussinera. Saqqummiussaa ima qulequtaqarpoq: Kalaallit oqaasii peqqilluinnarput! Imaluunniit?
KNR-ip aallakaatitassiaani qulaaniittumi isiginnaaruk: 10:00-imit 49:15-imut.
Naalakkersuisuni Inatsisartunilu ilaasortaasimasup Aqqaluk Lyngep saqqummiussinera. Saqqummiussaa ima qulequtaqarpoq: Pisortatigoortumik oqaatsit – kissaativut piviusorlu
KNR-ip aallakaatitassiaani qulaaniittumi isiginnaaruk: 50:20-mit 1:13:22-mut.
Karl Kristian Olsenip (Paartoq) Kaali Olsenillu (Ilinniartitaanermik Aqutsisoqarfimmi pisortaq) saqqummiussinerat.
Saqqummiussaat una qulequtaqarpoq: Oqaatsitta atuartitsissutaasarnerat ilinniartitsissutaasarnerallu.
KNR-ip aallakaatitassiaani qulaaniittumi isiginnaaruk: 0:00-imit 36:30-mut.
Inuit Issittormiut Kattuffianni Kalaallit Nunaanni siulittaasoq Kuupik Kleistip aamma Inuit Pisinnaatitaaffii pillugit Siunnersuisoqatigiinni ilaasortap Carl Chr. Olsenip (Puju) saqqummiussinerat. Saqqummiussaat ima qulequtaqarpoq: Nunat inoqqaavisut pisinnaatitaaffiit, naggueqatittalu oqaatsiminnik ineriartortitsinerat
KNR-ip aallakaatitassiaani qulaaniittumi isiginnaaruk: 39:00-imit 1:20:13-imut.
Oqallittarfiit assigiinngitsunut ataaniittunut immikkoortinneqarput oqallittullu eqqartugaat eqikkarlugit qulaani isiginnaagassiami saqqummiunneqarput:
- Angerlarsimaffiit meeqqeriviillu
- Atuarfiit, ilinniarfiit ilinniusiallu
- Tusagassiuineq saqqummersitsisarnerlu
- Suliffeqarfiit
- Pisortat aqutsivii kiffartuussiviilu
- Ilisimatusarfiit
Sisamanngorneq 30. marsi 2023 · OQAATSIVUT SIUNISSAMI
Nukaraq Eugenius · Oqaasileriffimmi attaveqaqatigiinnermut siunnersorti
Per Langgård · Oqaasileriffimmi siunnersortaaneq
Naaja Nathanielsen · Aningaasaqarnermut Naligiissitaanermullu Naalakkersuisoq
Erseqqissaatigineqassaaq Naaja Nathanielsen saqqummiisussatut qaaqquneqarmat qallunaatut oqaaseqartutut kalaallisut oqaatsinik ilinniarnissamik periarfissat pillugit inuttut misilittakkaminik saqqummiusseqqullugu.
NAja B. Trondhjem · Oqaatsinik Ilisimatusarfimmi pisortaq
Minik Jeremiassen · Oqaasileriffimmi immikkut siunnersorti
Katti Frederiksen · Namminersortoq
Ole Heinrich · Inatsisartut Allattoqarfianni nutserisoq
- Oqaatsivut · Oqaatsitta qanoq ineriartortinneqarnissaat pillugu isummersoqatigiinneq – seqersittakkut saqqummiussaq (pdf) – kalaallisut
Ole Birch · Namminersorlutik Oqartussat Nutserisoqarfianni pisortaq
ULLUP AAPPAA: OQAATSIVUT SIUNISSAMI ATUGAANISSAAT PILLUGIT EQQARSAATERSUUTIT INASSUTEQAATISSANULLU SIUNNERSUUTIT
Kalaallisut oqaatsit piffinni suliaqarfinnilu assigiinngitsuni siunissami atugaanissaat pillugu oqallittarfinni assigiinngitsuni eqqarsaatersuutit saqqummiunneqarput inassuteqaatissanullu siunnersuusiortoqarluni.
Oqallittarfiit immikkut tamarmik allatseqartinneqarput allatsillu oqallittut oqallisigisaannik siunnersuutaannillu allattuillutillu eqikkaapput, kingornalu eqikkakkanik saqqummiussillutik.
Oqallittarfiit assigiinngitsunut ukununnga immikkoortinneqarput:
- Angerlarsimaffiit meeqqeriviillu
- Atuarfiit, ilinniarfiit ilinniusiallu
- Tusagassiuineq saqqummersitsisarnerlu
- Suliffeqarfiit
- Pisortat aqutsivii kiffartuussiviilu
- Ilisimatusarfiit
Oqallittarfinni qulaani taaneqartuni siunissami oqaatsitta qanoq atugaanissaat ineriartortinneqarnissaallu pillugit inassuteqaatissanut siunnersuusiortoqarnissaa siunertaralugu oqallittarfinnut makku oqallisigisassatut suliakkiutigineqarput:
- Angerlarsimaffiit meeqqeriviillu pillugit oqallittuni:
- Oqaatsitta ilaqutariinni inoqutigiinnilu siunissami qanoq atugaanissaat eqqarsaatersuutigisiuk inassuteqaatissamullu siunnersuuteqarlusi.
- Meeqqeriviit meeraaqqeriviillu kalaallisut oqaatsit atorlugit ineriartortitsinissaq inassuteqaateqarfigisiuk.
- Atuarfiit, ilinniarfiit ilinniusiallu pillugit oqallittuni:
- Meeqqat atuarfiini kalaallit oqaasiisa atuartitsissutini tamani siunissami qanoq atugaatiginissaat eqqarsaatersuuteqarfigisiuk inassuteqaatissamullu siunnersuusiorlusi.
- Ilinniarfinni kalaallit oqaasiisa ilinniutisigut ilinniartitsisoqarnikkullu qanoq siunissami ineriartortinneqarsinnaanerat inassuteqaateqarfigisiuk.
- Siunissami ilinniusiani kalaallit oqaasii atorlugit ineriartortitsinissaq eqqarsaatersuuteqarfigisiuk inassuteqaasiorlusilu.
- Tusagassiuineq saqqummersitsisarnerlu pillugit oqallittuni:
- Tusagassiorfiit oqaatsit tungaasigut siunissami qanoq ineriartortitsinissaat isumaliutigisiuk inassuteqaasiorlusilu.
- Atuakkiornikkut allanillu saqqummitsisarnikkut kalaallisut allaqqaakkat siunissami qanoq siuarsaavigineqarsinnaanersut isumaliutigisiuk siunnersuusiorlusilu.
- Suliffeqarfiit pillugit oqallittuni:
- Suliffeqarfinni namminersortuni pisortallu pigisaanni kalaallit oqaasiinik atuilluni ineriartortitsisoqarnissaa inassuteqaasiorfigisiuk.
- Suliffeqarfiit kiffartuussinerminni kalaallit oqaasiinik atuinerullutik ingerlatsinissaat qanoq aaqqissuunneqarsinnaanersoq inassuteqaasiorfigisiuk.
- Pisortat aqutsivii kiffartuussiviilu pillugit oqallittuni:
- Pisortat allaffeqarfiini kalaallit oqaasiinik atuilluni ineriartortitsinissaq eqqarsaatersorfigisiuk inassuteqaateqarlusilu.
- Pisortat innuttaasunut kiffartuussiviini, allatullu inuiaqatigiinnut nalunaartarneranni kalaallit oqaasiinik siunissami atuinissaq siunnersuusiorfigisiuk.
- Ilisimatusarfiit pillugit oqallittuni:
- Ilisimatusarnikkut kalaallit oqaasiisa siunissami qanoq inissisimatinneqarnissaat isumaliutersuutigisiuk.
- Kalaallit oqaasiisa ineriartortinneqarneranni ilisimatusarnikkut oqaasilerinikkullu siunissami suut pingaarnertut anguniagassaassanersut siunnersuuteqarfigisigit.
Oqaatsitta ilaqutariinni inoqutigiinnilu siunissami qanoq atugaanissaat pillugu eqqarsaatersuutit inassuteqaatissamullu siunnersuutissat pillugit oqallittut oqallisigisaannik eqikkaaneq
- Atuakkat soorlu timip qanoq taajuuteqarnerinik allaqqasut meeqqanut angajoqqaanullu iluaqutaassussat pigineqartariaqarput
- Meeqqat inersimasutut oqaluunneqartariaqarput oqaatsinik piginnaanngorsarnerat kinguarsarneqassanngippat, meeqqalli nipimik ilisarsisinnaaneranut ilinniarneranut innarliinani
- Angajoqqaat sakkussaannik oqaatsinik piginnaanngorsaataasinnaasunik digitalimik saqqummilaarnerusoqartariaqarpoq, tassunga ilanngullugu innarluutilinnut, assersuutigalugu KNR suleqatigalugu saqqummiussisoqarsinnaavoq YouTube atorluguluunniit
- Meeqqat kalaallisut ilinniartinneqarnissaat salliutinneqartariaqarpoq
- Oqaatsinik ilinniarnermi avatangiisit aallaaviusariaqarput, tassungalu atatillugu katersuiveqartariaqarpoq
- Sumiorpaluutit atorneqarnerat aallunneqartariaqarput
- Angajoqqaat peqatigalugit meeqqat pinngortitameeqatigalugit atuagarsorneq kisiat salliutinnagu
- Meeqqat angajoqqaaminnit sammineqarluartut kingusinnerusukkut angusarissaarnerusarput
- Meeqqat oqaluutiinnarnagu oqaloqatigiuk
- Oqallissinnaaneq sungiusarneqartariaqarpoq
- Angajoqqaanut paasititsiniutigisariaqaraluarpoq meeqqat namminneq oqaatsiminnik pitsaasumik tunngavissinneqarunik oqaatsinik allanik ilikkarsinnaanerat annertunerussammat
- Ilaqutariit iluanni digitalimik atuineq killililaarneqartariaqarpoq
- Ilaqutariinnut familiecenterimik pilersitsisoqarsinnaavoq angajoqqaanut siunnersuisoqarfittut atorneqarsinnaasoq – qitiusumik saaffiginittarfiusinnaasoq (sundhedspleje-mut assigusumik) soorlu MANU oqaatsinut tunngasut ilanngullugit
- Nipisiuisinnaanermut sakkussat saqquminerusut soorlu youtube aqqutigalugu
- Sunaana tunuarsimaarnermut peqqutaasoq? Naqqinneqaannartaruit ilikkarnissamut kajuminnerit annertusinavianngilaq, nipangersaasarnerillu unitsinneqartariaqarput
- Atuakkanik atuffassineruneq
Meeqqerivinni meeraaqqerivinnilu kalaallisut oqaatsit atorlugit ineriartortitsinissaq pillugu inassuteqaatissanut siunnersuutissat pillugit oqallittut oqallisigisaannik eqikkaaneq
- Atuakkat soorlu timip qanoq taajuuteqarnerinik allaqqasut meeqqanut angajoqqaanullu iluaqutaassapput
- Meeqqat inersimasutut oqaluunneqartariaqarput oqaatsinik piginnaanngorsarnerat kinguarsarneqassanngippat
- Angajoqqaat sakkussaannik oqaatsinik piginnaanngorsaataasinnaasunik digitalimik saqqummilaarnerusoqartariaqarpoq, tassunga ilanngullugu innarluutilinnut, assersuutigalugu KNR suleqatigalugu saqqummiussisoqarsinnaavoq YouTube atorluguluunniit
- Nunap pii qanoq taaguuteqarnersut meeqqatta ilisimasaqarfiginerusariaqarpaat tigussaasunik sakkulersorlugit
- Illoqarfiit akornanni ikinngutigiittoqarsinnaavoq taamaalilluni paasisaqarnerusinnammata
- Oqaatsinik ilinniarnermi avatangiisit aallaaviusariaqarput, tassungalu atatillugu katersuiveqartariaqarpoq
- Sulisut meeqqanut oqaatsinik ilikkartitsissagunik piginnaanngorsarneqartariaqarput
- Sumiorpaluutit atorneqarnerat aallunneqartariaqarput
- Sulisut utaqqiinnaratik aamma namminneerlutik sakkussarsiorsinnaapput
- Meeqqat oqaluutiinnarnagu oqaloqatigiuk
- Meeqqerivinni annerusumik sulisut oqalunnerusarput meeqqallu oqaaseqatigiinnik annertuallaanngitsuinnarnik atuisarlutik, kaammattorneqarnerusariaqarput
- Erinarsornerit timilu atorlugu pinnguarnerit inerisarneqarsinnaapput, meeqqamut takorluuisinnaaneranut ineriartuutaasinnaapput
- Meeqqat danskinik angajoqqaallit kalaallisut oqaluttut kaammattorneqartariaqarput allineranni aamma angajoqqaat kalaallisut ilikkarsinnaanerat ingerlateqqinneqarsinnaammat
- Periutsit sakkugineqarsinnaasut pitsaasumik kalaallisut danskisullu atorneqarsinnaasut pisariaqartinneqarput immikkoortinngikkaluarlugit
- Meeqqat oqaaseqarpallaanngitsut qanoq oqaasertusarneqarsinnaanerat aqqutissiuunneqartariaqarpoq
- Periutsit/ilinniutit meeqqerisut atorsinnaasaat amerlanerusariaqarput
- Meeqqerivinni annerusumik atuffatsittarneq ingerlanneqartariaqarpoq
- Tamanut ammasumik oqalussinnaaneq ilinniarneqartariaqarpoq
- Ulluinnarni pingaartitat tunngaviusumik ilinniartitsissutigineqartariaqarput atualernissaannut piareersaatitut
- Naqinnernik ilisarinnissinnaaneq anguniarlugu meeqqat mikineranniit aallartinneqarsinnaapput pinnguarneq nipillu aqqutigalugit
- Meeqqerivinni sulisut sakkussaannik pitsaanerusunik tunineqarsinnaapput, ass. Eqqumiitsuliortut suleqatigalugit
- Meeqqat piginnaatitaaffii erseqqissarneqartariaqarput
- Oqaatsinik atuineq annertunerussappat annermik aningaasaliisoqartariaqarpoq
- Sulisut amerlanerusut pisariaqartinneqarput
- Perorsaasunngornianut fagi kalaallisut ilinniartitsissutigineqartariaqarpoq
- Pinnguarnikkut oqaatsinik ilikkarsinnaanerat annerusarpoq
Meeqqat atuarfiini kalaallit oqaasiisa atuartitsissutini tamani siunissami qanoq atugaanissaat pillugu eqqarsaatersuutit inassuteqaatissamullu siunnersuutissat pillugit oqallittut oqallisigisaannik eqikkaaneq
- Meeqqat atuarfianni
- Ilinniusiat amerlanerit
- Pinnguaatertillugit ilinniartinneqartalerlik
- Timitalerlugit ilinniartitsineq
- Meeqqat tigussaasumik malinnaatinneqarnissaat ass.; inuttalerlugit qimussertartunik imlt. Savaatilinnik, paarlaasseqatigiinneq
- Ilinniusiat
- Kalaallit kulturikkut suliaqartut pikkoriffii atorlugit ilinniusiorneq
- Ilinniartitsitsisunngorniartunut
- Oqaatsigut pingaartillugit atorneqarnissaat ß immikkut sammisarneqarsinnaasut soorlu iivit pillugit
- Kalaallit oqaasii ilinniaqqiffissanut naammattariaqarput
- Ilinniaqqiffinni kalaallisut oqaatsit atorneqarsinnaariaqartut
Ilinniarfinni kalaallit oqaasiisa ilinniutitigut ilinniartitsisoqarnikkullu siunissami qanoq ineriartortinneqarsinnaanerat pillugu inassuteqaatissanut siunnersuutissat pillugit oqallittut oqallisigisaannik eqikkaaneq
- Ilinniartitaaneq kalaallinut tulluussarneqartariarpoq
- Ilinniarfinni qallunaatut sullissineq ilinniartarpaat (tunngaviit) kalaallisut nalimmassartariaqarput; kalaallisut sullissineq ilinniartariaqarpaat
- Ilinniusiat amerlanerusut
- Kalaallinut tulluarsakkat
- Ataqatigiissut 1. klassimit 10. klassimut
- Soqutiginarsakkat soorlu; atuakkat ersinartulersaarutit, pissanganartuliat il.il.
- Misissuinerit akulikinnerusut
- Pitsaassutsimik nalilersuineq
- Naliliinerit akulikinnerusut
- Oqaasilerinerup allatut soqutiginarsarnissaa
- Aalajangersimasunik peqartariaqartoq
- Peqqissaartumik suliarineqarnissaat
- Oqaasilerinermik tamakiisumik ilinniusiortoqarnissaa
Siunissami ilinniusiani kalaallit oqaasii atorlugit ineriartortitsinissaq pillugu eqqarsaatersuutit inassuteqaatissamullu siunnersuutissat pillugit oqallittut oqallisigisaannik eqikkaaneq
- Ilinniartitsisut piginnaasaasa atorluarnerunissaat
- Pikkorissarneqarnerusarnissaat, katersuuffeqarnerunissaat
- Ilinniusiornissap periarfissaqarnissaa
- Tamakkiisumik aallunneqartarnissaa aamma atorfiup saniatigut
- Nuummi atuartitsineq sinerissami atuartitsinermit allaanerusoq
- Kalaallisut qallunaatullu oqaatsit fagimi ataatsimi
- Teknologip atuartitsinermi atorluarnissaa
- Ilinniartitsisut akissaatiginnerunissaat
- Atuartunut/ilinniartunut piumasaqaatit sakkortunerusut
- Ilinniarfinni kalaallisoortarnerup qaffasinnerunissaa
Tusagassiorfiit oqaatsit tungaasigut siunissami qanoq ineriartortitsinissaat pillugu isumaliutersuutit inassuteqaatissamullu siunnersuutissat pillugit oqallittut oqallisigisaannik eqikkaaneq
- Kalaallisut allaqqaakkat amerlanerunissaat
- Qallunaatut nutaarsiassiisanerit ikinnerutinneqarsinnaapput
- Kalaallisut oqaatsit tunngaviusariaqarput
- Kalaallisut immikkut aaqqissuisoqartarneq
- Tusagassiortut piginnaanngortarneqartarnissat
- Tusagassiortut oqaatsinik atuinerat = inuiaqatigiit oqaatsinik atuinerat.
Kalaallisut atuartitsinerup inerisarneqarnissaa.
- Tusagassiortut oqaatsinik atuinerat = inuiaqatigiit oqaatsinik atuinerat.
- Tusagassiortut najoqqutassaqartinneqarnissaat
- Oqaasilerinermut tunngasunik
- Taaguusersuutinik
- KNR-ip immiussaataasa oqaatsinut kulturimullu tunngasut pissarsiareriaannanngortinneqarnissaat
- Naalaartartut / atuartartut amerlassusiannik misissuineq
- KNR-ip aallakaatitsisarnerani nipilersukkat ikinnerulersinneqarsinnaapput kulturimullu tunngasut amerlanerulersinneqarlutik
- Tusagassiortut piareersarluarfeqartitaanissaat
- Pilersaaruteqartarneq / periusissiaqartarneq
- Innarluutillit, ass. tusilartut, eqqarsaatigineqarnerusariaqarput
Atuakkiornikkut allanillu saqqummersitsisarnikkut kalaallisut allaqqaakkat siunissami qanoq siuarsaavigineqarsinnaanerat pillugu isumaliutersuutit siunnersuutissallu pillugit oqallittut oqallisigisaannik eqikkaaneq
- Unammisitsisarnerit amerlanerussapput
- Atuakkiornikkut
- Naalaagassiornikkut
- Atuakkat assiliartallit amerlanerusut
- Illoqarfiit aviisii (lokalavis) nungulermata siuarsartariaqarpavut
- Kukkunersiuinerup piumasaqaatinngortinneqarnissaa
- Angajoqqaat piumaffigineqarnissaat
- Angerlarsimaffimmi atuffassisarneq
- Meeqqanut soqutiginartunik sammisassaqartitsisarneq
- Suliffeqarfiit atuakkiornissamut periarfissiinerusinnaapput
- Pikkorissaasarneq
- Atuakkiornermik
- Allannermik
- Meeqqat atuarfiannit aallarnersumik allannermik ilinniartitsinerup pitsanngorsarneqarnissaa
- Atuakkiortut pisisussamik soqutigisaat eqqarsaatigisariaqarpaat
- Atuffassisunik naalaagassaqarneq
- Nersornaatisisitsisarneq
- Pisortanit tapiissutit pissarsiariuminarnerunissaat
- Atuakkiornissamut
- Kukkunersiuineq piumasaqaatinngussaaq, taamalu kukkunersiuititsinissamut tapiiffigineqarnissamut periarfissarissaartoqarnerusariaqarpoq
- Kalaallisuunngortitsinerit amerlanerusinnaapput (kalaallisut allaqqaagaanngikkaluarput, soqutiginnilersitsisarpulli)
- Teknologiimut tunngasut, soorlu iPadit, siuarsaaffigineqarnissaat
- Ebogit
- Nuannarineqartunik, soorlu Disneymeersunik, kalaallisut oqaasertalersuineq
Suliffeqarfinni namminersortuni pisortallu pigisaanni kalaallit oqaasiinik atuilluni ineriartortitsisoqarnissaa pillugu inassuteqaatissamut siunnersuutissat pillugit oqallittut oqallisigisaannik eqikkaaneq
- Kalaallit Nunaannut suliartortussat tikinnginnerminni kalaallisut pikkorissartinneqartassapput, suliffeqarfiillu tamatuminnga piviusunngortitsisuussapput – apeqqutaatinnagu piffissaq Kalaallit Nunaanniiffissaq
- Oqaatsit pillugit politikki suliffeqarfinnut pisussaaffiliinerusumik sukaterneqassaaq malinneqarnissaalu nakkutigineqassaaq
- Kalaallisut oqaatsinik piginnaasaqarneq pilerinarnerulersinneqassaaq
- Kalaallisut allagartalersuineq nittarsaassinerlu minnerpaaffiussaaq kalaallisullu amerlanerpaat allaqqaarneqartassapput, malinneqarnissaalu nakkutigineqassaaq
- Kalaallisut oqaasillit qaffasissumik allattariarsornikkut piginnaanngorsarsinnaassapput – pikkorissarfissat ataqatigiissut naleqquttullu periarfissaassapput
- Kalaallisut oqaatsinut ikiuutissat aqqutissiuunneqassapput pilersorneqarlutillu, soorlu nutserutissat
- Kalaallisut oqaaseqanngitsunik kalaallisoortitsineq pisussaaffiussaaq suliffeqarfiillu akisussaatinneqassapput aningaasartuutissanullu qinnuteqarfissat periarfissaassapput
- Atorfinitsitsisarneq pillugu politikkeqassaaq kalaallisut oqaatsit pillugit piumasaqaatitalimmik
- Sulinerup nalaani kalaallisut pikkorissartoqarsinnaassaaq sulisitsisunit tapiissutit atorlugit
- Suliffeqarfiit CSR-ianni kalaallisut oqaatsit ilaanissaat piumasaqaataassaaq
- Suliffeqarfiit taaguusersuutinik ineriartortitseqataanissaat piumasaqaataassaaq
Suliffeqarfiit kiffartuussinerminni kalaallit oqaasiinik atuinerullutik ingerlatsinissaat qanoq aaqqissuuneqarsinnaanersoq pillugu inassuteqaatissamut siunnersuutissat pillugit oqallittut oqallisigisaannik eqikkaaneq
- Kiffartuussilluarneq tassaavoq kulturimik paasinninneq aamma oqaatsinik atuilluarsinnaaneq – tamanna suliffeqarfiit naammassisinnaassavaat kalaallisut oqaasilinnik ataqqinninnerullutillu salliutitsinerussallutik
- Akuunerulersitsinissamik politikki piussaaq
- Kalaallisut oqaaseqanngitsut kalaallisut oqaatsinik ilinniarnissaat piumasaqaataassaaq
- Kalaallisut oqaasillit ilinniarfissanik periarfissaqarnerulissapput
- Nittarsaassat allagartalersuinerillu kalaallisut allassimassapput amerlanerillu kalaallisut allaqqaarneqassapput
- Minnerpaamik kalaallisut oqaatsit atorlugit kiffartuussisoqarsinnaassaaq, ass. sulisoq ataaseq kalaallisut oqaasilik
- Atorfinitsitsiniarnermi atorfiit kalaallisut oqaasilinnik kiffartuussisussaatillugit minnerpaamik kalaallisut oqaatsinik kiffartuussisinnaasumik sulisoqassapput
- Pisortanit aningaasaliiffigineqartut piumaffigineqassapput erseqqissumik oqaatsit pillugit politikkeqarnissaannik
Pisortat allaffeqarfiini kalaallit oqaasiinik atuilluni ineriartortitsinissaq pillugu eqqarsaatersuutit inassuteqaatissamullu siunnersuutissat pillugit oqallittut oqallisigisaannik eqikkaaneq
- Kalaallit oqaasiinik ineriartortitsineq aningaasalerneqartariaqarpoq
- Taaguusersuineq
- Suliffeqarfiit iluminni namminneerlutik taaguusersuuserineq ingerlattariaqarpaat – aalajangeruminaatsut Oqaasiliortunut ingerlateqqinneqartassapput – sulianik eqaallisaaneq eqqarsaatigalugu
- Vidensbank
- oqaatsit taaguutillu pillugit suliffeqarfiit akimorlugit suleqatigiiffiusinnaasoq pilersinneqartariaqarpoq
- Oqaasilerineq
- Sulisut kalaallisut oqaluttut kalaallit oqaasii pillugit pikkorissartinneqartalertariaqarput
- Ilinniarfinni atuarfinnilu piorsarneqartariaqarpoq
- Oqaatsit pillugit ineriartortitsineq pillugu isumasioqatigiinnerit akulikinnerusariaqarput
- Oqaatsit pillugit akissarsiatigut tapeqartitsisoqartariaqarpoq
- Atorfillit kalaallisut qallunaatullu oqalussinnaallutillu allassinnaasut sulinerusarput
- Piumasaqaateqarnerusariaqarpugut
- Avataaniit atorfinitsitsinermi atorfinittut kalaallisut oqalussinnaalernissamik piumasaqarfigisariaqarpagut
- Suliffeqarfitsialak
- Kalaallit oqaasiinik atuisut unammisilaartarlugit
Pisortat innuttaasunut kiffartuussiviini, allatullu inuiaqatigiinnut nalunaartarneranni kalaallit oqaasiinik siunissami atuinissaq pillugu siunnersuutissat pillugit oqallittut oqallisigisaannik eqikkaaneq
- Pikkoriffiginerusariaqarpagut qanga pioreersut taaguutit uterteqqissallugit (qallunaatut tuluttullu taapajuinnarnagit)
- Allaffissornermi marluinnik oqaatsinik atuineq unitsinneqarluinnartariaqarpoq
- Pinngittooratik kalaallisut allanneqartassapput siammarterneqartassallutillu
- Killiliisariaqarpugut
- Oqaatsigut pingaartinniaratsigut immitsinnut salliutittariaqarpugut allamiunut naleqqussarata
- Inatsisini oqaatsit pillugit allaqqareersut timitalersornerusariaqarpagut
Ilisimatusarnikkut kalaallit oqaasiisa siunissami qanoq inissisimanissaat pillugu isumaliutersuutit pillugit oqallittut oqallisigisaannik eqikkaaneq
- Amerlanernik kalaallinik oqaaseqartuusunik ilinniarsimasunik ingerlallualissasjunnarsivugut, kisianni massakkutut ingerlagutta taamaaginnartussaavugut.
- (Ph.d. katuami) kalaaleqatigut oqaatsigut atorlugit saqqummiisut pisuunnguallatsitsivoq.
- Ilisimasanik katersuiffik, innuttaasunik akuliutsitsineq.
- Periuseq
- Ordbogi
- Akisussaaffiit ataatsimoortillugit, ass. Suliffeqarfiit assigiinngitsut ataatsimut suleqatigiit.
- Kalaallisut ilisimatusartut arlaatigut ataatsimoortinneqarpata nukinik katersiviussooq.
- Kalaallit amerliartorput tamanna malitsigalugu kalaalinngorsarneqarsinnaavoq.
- Sumiorpaluutit tunngatillugit eqqartueqatigiinnerusariaqarneq. Tamattaalluta oqaatsinut atukkatsinnut assersuullugit iliniartinnissai, Inatsisit pioreersut qaammarsarnissa.
- Oqaasilerisut suliai pingaarnersiorlugit. Sunik tamanik noqqaanata
Kalaallit oqaasiisa ineriartortinneqarneranni ilisimatusarnikkut oqaasilerinikkullu siunissami suut pingaarnertut anguniagassaassanersut pillugit siunnersuutissat pillugit oqallittut oqallisigisaannik eqikkaaneq
- Oqaatsini tunngaviusuni nassuiaasersukkanik peqarnissaa
- Inuiaqatigiinnut tamanut, ilisimatusartunuinnaanngitsoq, immikkut aallakaatitsivik ilisimasat pillugit.
- Meeqqat atuarfianiit aallartinneq
- Allattaasissatut malittarisassat uninngatiinnarnagit aamma nutarterneqartariaqarput.
- Taaguusersuutit kalaallisuunngortillugit.
- Computerimi nutserisartoq ilisimatusarfimmi ilinniartitsissutigineqarnissaa, siunissami sulilerunik ilinniarteqqaartariaqarnagit. (nutserisut)
- Ilisimatusarfimmi ilinniusiat kalaallisut nutserneqarnikuunngitsut nutserneqartariaqarput aningaasaliiffigineqarlutik.
- Ilisimatusarfik kalaallit inooriaasiannut, kulturiannut, (sinaakkut) ingerlanneqartariaqarpoq. (ass. qanittukkut phd-iliortut)
- Uku eqqartukkagut assigiinngitsut Naalakkersuisut ilumut ataavartissagaat asuliinnarsuaq inerniliussat uninngatiinnarnagit.
1. Siunissami naalakkersuisunngortartut kikkuugaluarpataluunniit allanngortikkuminaatsumik iliuusissartalimmik periusissiornissaq anguniarlugu suleqatigiissitanik pilersitsisoqarnissaa.
2. Kalaallit oqaasiisa sutigut tamatigut tatisimaneqanngitsumik salliutinneqarlutik inissisimanissaat anguniarlugu inatsisiliornikkut nakkutigineqarsinnaasunik atuutsinneqarsinnaasunillu pisortat suliffeqarfiini ingerlatsiviinilu malittarisassiuussinissaq.
3. Kalaallit oqaasiisa ineriartornerisa malinnaavigineqarlutillu inuiaqatigiinnut iluaqutaasumik ilisimatusarfigineqarnissaat sapinngisamik assigiissaakkamik ingerlanneqartup qulakkeerneqarnissaa.
4. Tusagassiornikkut saqqummersitsisarnikkut kalaallit oqaasiisa tunulliunneqaratik salliutinneqarnissaat anguniarlugu periarfissanik misissuinissaq, periusissiamut ilanngunneqartussamik.
5. Kalaallit oqaasiisa qarasaasiat atorlugit atoruminarsarnissaat anguniarlugu oqaaserpassualerinerup immikkut suliatut tapiffigineqartarnissaa.
6. Ataatsimeersuarnerup siuliani 2022-mi oqaatsitta ilisimatusaatigineqarnerat pillugu isumasioqatigiinnermit inassuteqaatigisat periusissiamut ilanngunneqassapput.
7. Kalaallisuinnaq oqaaseqarneq atugarlunnerunermik kinguneqassanngilaq. Kalaallisuinnaq oqaasillit ilinniakkatigut appasinnerusunik periarfissaqassanngillat.
1. Oqaatsitsinnik atuartitsineq ilinniusiornerlu ataqatigiissoq, taakkunanngalu ilinniartitsisinnaasut amerlanerusut.
2. Kalaallisut ilinniusianik atortussanillu ineriartortitsineq digitalinngorsaanerlu.
3. Oqaatsitsinnik suliat ilisimatusaatillu tamanut saqqummiunneqarlutillu ilaqutaanerunissaat.
4. Oqaatsit ilisimatusaatigineranni aningaasalersuinissamut ajornannginnerusmik aaqqissuussisoqarnissaa.
5. Oqaaserpassualerinerup sprogteknologip inerisarneqarlunilu inatsisitigut tunngaveqalernissaa.
6. Oqaatsivut pillugit inatsisit iluarsaanneqarnissaat.
7. Oqaatsitsinnik ilisimatusarfiup ataavartup pilersinneqarnissaa.
8. Inatsisinik nutserisoqarfik pilersinneqassaaq.
9. Oqaatsivut pillugit nutaanik suliniuteqartoqassatillugu immikkut aningaasaliisoqartarnissaa pisariaqarpoq.
10. Oqaatsivut pillugit suliniuteqarluartut inerisaasullu tapersersorneqartarnissaat malugiarneqartarnissaallu.
Oqaasileriffimmi siunnersortaanerup Per Langgårdip saqqummiussinera. Per Langgårdip saqqummiussaa ima qulequtaqarpoq: Kalaallisut oqaaseqanngitsunik kalaallisoortitsineq oqaaserpassualerineq tapertaralugu
KNR-ip aallakaatitassiaani qulaaniittumi isiginnaaruk: 0:00-imit 25:50-imut.
Aningaasaqarnermut Naligiissitaanermullu Naalakkersuisup Naaja Nathanielsenip saqqummiussinera.
Erseqqissaatigineqassaaq Naaja Nathanielsen saqqummiisussatut qaaqquneqarmat qallunaatut oqaaseqartutut kalaallisut oqaatsinik ilinniarnissamik periarfissat pillugit inuttut misilittakkaminik saqqummiusseqqullugu.
KNR-ip aallakaatitassiaani qulaaniittumi isiginnaaruk: 25:50-imit 1:04:30-mut.
Oqaatsinik Ilisimatusarfimmi pisortap Naja B. Trobdhjemip saqqummiussinera. Saqqummiussaa ima qulequtaqarpoq: Oqaatsitta sumiorpaluutaasa allattarnermut sunniutaat.
KNR-ip aallakaatitassiaani qulaaniittumi isiginnaaruk: 1:06:40-mit 1:46:39-mut.
Oqaasileriffimmi immikkut siunnersortip Minik Jeremiassenip saqqummiussinera. Minik Jeremiassenip saqqummiussaa ima qulequtaqarpoq: Oqaatsitta atugaanerat ineriartornerallu.
KNR-ip aallakaatitassiaani qulaaniittumi isiginnaaruk: 0:00-imit 28:47-mut.
Oqaasileriffimmi pisortaasimasup namminersortup Katti Frederiksenip saqqummiussinera. Saqqummiussaa ima qulequtaqarpoq: Oqaatsitta piunerat aamma siunissaat.
KNR-ip aallakaatitassiaani qulaaniittumi isiginnaaruk: 28:47-mit 52:10-mut.
Inatsisartut Allattoqarfianni nutserisup Ole Heinrichip saqqummiussinera. Saqqummiussaa ima qulequtaqarpoq: Oqaatsitta qanoq ineriartortinneqarnissaat pillugu isummersoqatigiinneq.
KNR-ip aallakaatitassiaani qulaaniittumi isiginnaaruk: 52:10-mit 1:09:20-mut.
Namminersorlutik Oqartussat Nutserisoqarfianni pisortap Ole Birchip saqqummiussinera. Saqqummiussaa ima qulequtaqarpoq: Nutserisoqarfik – suliarisartagaalu.
KNR-ip aallakaatitassiaani qulaaniittumi isiginnaaruk: 1:09:20-mit 1:30:02-mut.
Oqallittarfinni assigiinngitsuni oqallittut ataaniittunut immikkoortinneqartut eqqartugaat innersuussutissatullu siunnersuutaat eqikkarlugit qulaani isiginnaagassiami saqqummiunneqarput, kiisalu isiginnaagassiap naanerata nalaani innersuussissutit saqqummiunneqarlutik:
- Angerlarsimaffiit meeqqeriviillu
- Atuarfiit, ilinniarfiit ilinniusiallu
- Tusagassiuineq saqqummersitsisarnerlu
- Suliffeqarfiit
- Pisortat aqutsivii kiffartuussiviilu
- Ilisimatusarfiit