Pia Rolsted Andersen


Danmarkiminngaanneerpunga, 62-inik ukioqarpunga.

1979-imi Kalaallit Nunaannut pivunga.

Kalaallit oqaasii tusaaqqaarakkit eqqaammanngilara qanoq eqqarsarsimanertunga, ukiut 40-t qaanngiupput, kisianni nunamut angummullu (uisannut) asannittuulersimagama tusarnertutut tusaasarsimassavara!

Sooq kalaallit oqaasii ilinnialerpigit?

Nunamut angummullu asannittuulersimagama Kalaallit Nunaanut uterusussimaqaanga.
Apeqqutaavoq aamma kalaalimik anaanaveqarnera, inunngoramali meerarsiaagama Danmarkimi inunngorlungalu peroriartortoq qallunaanik angajoqqaaqarlunga.

Ulloq manna tikillugu suli ilinniarpunga! Oqaatsikka ineriartuartarput! ;D Ukiut siulliit qallunaatut oqalunnaveersarpunga, kalaallisut oqalunniartarpunga, kisianni oqaatigisinnaasakka annikingaarmata meerarpalunnagaarmatalu universitetimi ilinniartuusimagaluarlunga inuit eqqarsartarsimasapput: “Una arnaq ajinngikkaluarnerpa? Inersimasutut oqalunneq sapersoq?” Taamatut oqartoqanngilarli! :D

Taavalu ukiut amerlangaatsiartut oqalukkaanngama inuit pikkorinnerartarpaanga.

Pikkorissiartuleramale inuit ilisarisimanngisakka oqartalerput: “Sooq kalaallisut taama oqqarlutsigisarpit? Immaqa kalaaliusorisimavaanga akusaq! :D

Naggataatigut inuit ilisarisimanngisakka sivisuumik oqaloqatigereerlugit ilaannikkut oqarsinnaasarput: Eer, kalaaliuit? :D Soorunami tusaasinnaasimassavaat kalaallisut oqaaserivinngikkiga! :D

Uuminarnerpaasarpoq nalunngikkaluarluni kukkunertalimmik oqalussimalluni kalaallit kalaallisut ilinniartut naqqinneq ajoramisugut. Oqartariaaseq eqqortoq tusarusunnartaraluaqaaq. Kisianni, aappaatigut, ilikkagaqanngaatsiarsimavunga naqqinneqartarsimanngikkaluarlunga, imminut tatiginninnera imaallaat sequmissimanngilaq, akerliani iluarnerpaasimavoq!

Kalaallit oqaasii ilinniarlugit suut iluaqutaappat? (what was beneficial learning Kalaallisut).

  • Siunertaqarluni
  • 1979-1980 ukiaq upernaarlu Københavnimi Folkeuniversitetimi kalaallisut ilinniartarnera sap. ak.-mut unnuit marluk.
  • ernera inunngormalli sapinngisannik kalaallisut oqaluffigisarakku/oqaloqatigisarakku <3
  • savaateqarfimmi/nunaqarfimmi Qassiarsummi inooqataagama kalaallisut oqaluttartut akornani.
  • atuarfimmi timelæreritut sulisimanera, meeqqallu paaseqatigiinniartaratta.
  • uigalu kalaallisut oqaloqatigiiniartaratta.
  • Danmarkimiininni 1988-imi Gaba Thorningimut immikkut tiimeqartarsimagama (oqaasilerineq & allattariarsorneq).
  • Ilinniarfissuarmi ilinniarnera, tassani sumiorpaluutit arlallit paasisalerpakka aamma immikkut kalaallisut atuartinneqartarama ilinniartitsisumik universitetimi ilinniarsimasumik
  • avannaani, Nuummi Kujataanilu najugaqarsimanera
  • ilinniartitsisutut atuartut, angajoqqaat suleqatikkalu kalaallisut oqaloqatigiittaratta ataatsimiittarlutalu aamma allattariarsorneq taamatut ineriartortinneqarsimavoq.
  • uteriitsuulluni aamma naammagittarneq iluaqqutaasimavoq.

Kalaallit oqaasii sakkutut atuinnarnianngikkaani kisianni pimoorullugu ilinniaraanni:

  • inooqataalluni,aallaqqaataani paasisaqarpiaavinngikkaluarluni paatsiveqarpiarnanilu ukiut siulliit.
  • Kalaallit oqaasiinut atuartinneqarluni sukkanerusumik ilinniarneq ingerlassinnaasoraara.
  • aammalumi imminut ataqqeqatigiinneq.