Oqaasileriffimmiut Nunat Avannarliit Killiit oqaasilerisui suleqatigilerpaat

TUSAGASSIUTINUT NALUNAARUT

Reykjavik, 24.maj 2016

Oqaasileriffimmiut Nunat Avannarliit Killiit oqaasilerisui suleqatigilerpaat

Islandip Ilisimatusarfiata immikkoortortaata ilaata Vigdis Finnbogadóttir Instituttip aaqqissugaanik Nunat Avannarliit Killiit oqaasilerisui ulluni makkunani (23-24.maj) Reykjoltimi Reykjavikkip avannaatungaani katersuupput siunissamilu suleqatigiissutissaminnik pilersaarusiorlutik. Isumasioqatigiinnerup qulequtaraa Language and Culture Contact in West- Nordic Region, tassa Avannaamioqatigiit Killiit Oqaatsitigut Kulturikkullu Naapinnerat, tamannalu ammarlugu Islandimi præsidentiusimasoq Vigdis Finnbogadóttir tikilluaqqusilluni oqalugiarpoq.

Nunat Avannarliit Killiit peqataatitaaffigisaannik arlalinnik suleqatigiiliortoqarpoq, taakkualu oqaatsit pillugit kiisalu atuakkialerinermik misissukkaminnik paasisaminnik Reykjavikkimi Nunarsuarmi Oqaatsinut Qitiusoqarfiup (International Sprogcenterip) aappaagu apriilimi ammaanersiorneqarnerani saqqummiussissapput.

Nunarsuarmi Oqaatsit Qitiusoqarfissaat nunarsuarmi oqaasilerisunik tusaamasanik siulersuisoqalereerpoq, taakkuttaaq isumasioqatigiinnermi matumani peqataapput, ilaatigut makkuusut professor Bernard Comrie, professor Stig Eliasson, professor il.il.

Isumasioqatigiinnermi Nunatsinniit Oqaasileriffik Ilisimatusarfillu qaaqqusaapput, Oqaasileriffimmiillu saqqummiussissapput Oqaasileriffiup pisortaa Katti Frederiksen, nunatsinni oqaatsitigut inissisimaneq oqalugiaatigissallugu, aammalu Oqaasileriffimmi siunnersortaanerup Per Langgårdip kalaallit oqaasiini sprogteknologiimik suliat oqalugiaatigissallugit.

Isumasioqatigiinneq ataatsimiinnerlu Nordplusimiit aningaasaliiffigineqarpoq.

Inuss.inuull. Oqaasileriffik